LEXO PA REKLAMA!

SHKARKO APP

"Grupet kriminale mezi presin të mbyllim sytë"/ Balla, nga Elbasani: Kontrolle në çdo makinë për armë

27 Shtator 2023, 15:19, Politikë CNA
"Grupet kriminale mezi presin të mbyllim sytë"/ Balla, nga
Ministri i Brendshëm, Taulant Balla

Ministri i Brendshëm, Taulant Balla, takoi sot Forcat Operacionale të Drejtorisë Vendore të Policisë së Elbasanit për t’i përgëzuar në lidhje me rezultatet e arritura në kuadër të operacionit “Tempulli” si dhe për t’u njohur me zbatimin e masave lidhur me “paketën e sigurisë në shkolla”.

Ministri vlerësoi punën e bërë nga strukturat e DVP Elbasan, dhe njëherësh kërkoi angazhim të fortë në zbulimin e ngjarjeve të ndodhura në të kaluarën.

Balla nënvizoi gjithashtu se detyrë primare e punës së policisë është parandalimi e më pas zbulimi i veprave penale.

"Dua të jem shumë i qartë dhe shumë i prerë në rolin që ka Policia e Shtetit, për sa i përket luftës kundër kriminalitetit. Nuk mund të mjaftohemi thjesht dhe vetëm me këtë operacion ose këtë vëmendje. Natyrshëm kjo është një vëmendje kryesore. Na duhet që të punojmë fort me zbulimin e krimeve të ndodhura në të kaluarën. Për këtë Drejtori i Përgjithshëm i policisë ju ka nisur një udhëzim të posaçëm për evidentimin e personave që janë në kërkim dhe për rritjen e zbulueshmërisë së akteve kriminale. Dhe unë kam shumë besim që drejtoria e Elbasanit ka shumë për të zbuluar pra, vepra kriminale të ndodhura në të shkuarën. Mos harroni një gjë që është shumë e rëndësishme: – grupet kriminale mezi presin që ne të mbyllim një sy apo një vesh për të mos dëgjuar apo një sy për të mos parë, dhe ata janë të gatshëm të rikthehen dhe të godasin përsëri. Kështu që ne na duhet të nisim gatishmërinë, të rrisim prezencën tonë në territor, në mes lagjeve, në rrugë dhe ndërkohë sapo ndodh një ngjarje kriminale, ne të kemi të gjithë rrjetën tonë, për të identifikuar dhe për të ndaluar në kohë, autorin apo autorët. Ne na duhet që të kontrollojmë çdo makinë, çdo kroskot, çdo tapiceri ku fshihet një armë, e cila mund të jetë burimi i një vepre të rëndë kriminale", u shpreh Balla.

Në lidhje me paketën e sigurisë në shkolla, ministri Balla u shpreh se "paketa e sigurisë në shkolla është një përgjegjësi direkte e drejtorit të Policisë Vendore, i cili në bashkëveprim me kryetarët e bashkive dhe të gjitha agjencitë e tjera ligjzbatuese të shtetit, duhet të garantojë që brenda perimetrit të sigurisë në shkolla, ne të mos kemi asnjë incident. Unë kam besim te ju dhe jam shumë i sigurt që do të kemi rezultate shumë të mira”.

Drejtori i Përgjithshëm i Policisë së Shtetit, Rrumbullaku, duke folur rreth rezultateve të policisë sidomos në kuadër të sigurisë në shkolla, tha se ky operacion i ka shërbyer më së miri paketës në lidhje me masat e sigurisë në shkolla që është detyrë prioritare e Policisë së Shtetit.

"Mund t`ju them z. Ministër që Drejtoria e Policisë Elbasan, nën drejtimin e Drejtorit, ka kapacitetet më të mira profesionale për të qenë shembull në të gjitha drejtoritë vendore të policisë në shkallë vendi, jo vetëm për operacionet antidrogë, por edhe për operacionet e tjera të krimit kundër personit, ku mund të themi, ka pasur rezultate dhe kemi pritshmëri për rezultate të ardhshme”, u shpreh Rrumbullaku./CNA

 

 

Lajmet e fundit nga