Deklarata e kryebashkiakut të inceneratorëve/ Reagon PD-ja: Si u bë për remont pa filluar ende nga puna
4 Gusht 2022, 13:55, PolitikëCNA
Nënkryetari i Partisë Demokratike, Luçiano Boçi
Nënkryetari i Partisë Demokratike, Luçiano Boçi, ka reaguar pas deklaratës së kryebashkiakut të Elbasanit, Gledian Llatja, i cili gjatë një interviste ka bërë një mashtrim publik duke thelluar më tej skandalin e inceneratorëve, duke u shprehur se inceneratori i Elbasanit është në remont.
Në një deklaratë për mediat, Boçi i është drejtuar me 5 pyetje qeverisë Rama, që shqiptarët të kuptojnë si bëhet remont për një incenerator që nuk është vënë ende në punë.
“Me paratë e kujt po bëhet remonti? Pse nuk parashikohet remonti në kontratë edhe pse është marrë një pajisje që ka nevojë direkt për remont?”, janë disa prej pyetjeve që PD i drejton qeverisë dhe Edi Ramës.
Ndër të tjera, Boçi thekson se inceneratorët janë një megaaferë dhe se Edi Rama ndan paratë e djegësve me Arben Ahmetajn, Ëngjëll Agaçin, Erion Veliajn, Klodian Zoton dhe Stela Gugallen.
“Kryetari i Bashkisë së Elbasanit, i pyetur nga Euronews 'nëse inceneratori i Elbasanit është funksional' u përgjigj: 'Inceneratori është në fazën e remontit. 'Është si të çosh makinën në servis'.
Edhe sipas kontratës korruptive që Edi Rama ka miratuar, në kundërshtim me qëndrimin e Agjensisë së Prokurimeve Publike (APP), Inceneratori do të duhet të ishte funksional dhe në pronësi publike qysh prej një viti.
Ja edhe disa pyetje fare të thjeshta:
1. Pse Edi Rama miratoi kontratën me treshen seksere Gugallja-Mertiri-Zoto, ndonëse APP i shkruajti troç se kjo ishte procedurë e kundraligjshme?
2. Çfarë karakteristikash ka inceneratori? Shihni çfarë shkruhet ne Fletoren Zyrtare të Shtetit: Karakteristikat do i keni ne aneks. POR shihni aneksin e Fletores Zyrtare: A ka ndonje fjalë të kuptueshme? Edhe kur blen një makinë të thjeshtë të thuhet sa kuaj fuqi ka dhe sa gazra emëton, ndërsa për këtë impiant asnjë fjalë. PSE?
3. Për t’iu referuar paraleles së hequr nga kryebashkiaku "Të bësh remontin e djegësit është si të çosh makinë në servis”, kush e çon makinën në servis shumëmujor qysh vitin e parë që e merr? Si u bë për remont pa filluar ende nga puna?
4. Me paratë e kujt po bëhet remonti? Pse nuk parashikohet remonti ne kontratë dhe pse është marrë një pajisje që ka nevojë direkt për remont?
5. Ky do duhej të ishte incenerator rajonal. A pyeti ndokush bashkitë e tjera të qarkut? Kush do paguajë paratë tani që çmimi i naftës u dyfishua?
Partia Demokratike denoncon për të disatën herë mega-aferën e inceneratorëve si një vepër korruptive ku Rama, Ahmetaj, Agaçi, Veliaj, krijuan grup të strukturuar kriminal me qëllimin për të përlarë 430 milionë euro së bashku me sekserët Zoto-Gugallja-Mertiri.
Ndaj nuk pyetën as për ligj, as për procedura dhe 8 vite më pas asnjë incenerator nuk funksionon.
Këto janë pyetje shumë të thjeshta për shqiptarët, por të pamundura për drejtësinë e kapur nga Rama.
Ne mendojmë se inceneratorët janë mega-aferë ku Edi Rama ndan paratë me Agaçin, Ahmetaj, Veliajn, Zoton, Mërtirin dhe Gugallen, ndaj nuk ndalohen pagesat dhe ndaj drejtësia nuk sekuestron produktet e krimit”, ka deklaruar Luçiano Boçi./ CNA.al
