Ngrihuni në këmbë sot, të respektojmë mësuesin!

9 Shtator 2024, 13:57, Opinione Mentor Kikia

Ngrihuni në këmbë sot, të respektojmë mësuesin!

Nxënësit në shkollë

Në çdo “1 Shtator”, pavarësisht se në cilën datë “bie” kjo datë, unë dua të uroj më së shumti mësuesit. E mbaj mend mësuesen e klasës së parë, Myzejen Kardhashin. Unë, si qaraman, qaja se doja të shkoja në klasën e vëllait më të madh, por ajo më ledhatonte dhe më premtonte se do të kënaqesha shumë në klasën time. Na jepte kaq shumë dashuri, sa na bënte të shkonim në shkollë me qejf… Pastaj në shkollë të mesme “gjeta” mësuesin e letërsisë, Bardhyl Daklin (për koincidencë, jetonin të dy në të njëjtën lagje e rrugicë). Ai më drejtoi udhën e librave…

Por, kujtoj të gjithë mësuesit pa përjashtim, përkushtimin, durimin, profesionalizmin e tyre. Sa autoritarë ishin mësuesit. Pas policit, mësuesi ishte ai që kishim më shumë “frikë”. Mësuesi ishte “pushtetari” më i rëndësishëm edhe për prindërit tanë…

Kohët ndryshuan. Shkolla u bë më demokratike, më e hapur. Mësuesi u bë më pak autoritar dhe më pak “i frikshëm” dhe fëmijët njohën më shumë të drejtat e tyre.

Por rrugës gjërat u prishën, si në shumë drejtime. U harrua raporti mes të drejtave dhe detyrimeve. Nëpër klasa varëm vetëm tabelat me “Të drejtat” dhe harruam “Detyrimet”. Autoriteti dhe dinjiteti i mësuesit ra, si para nxënësve, para prindërve dhe para shoqërisë. Mësuesit nuk guxojnë sot as të ngrenë zërin në klasë, sepse nxënësit u bëjnë video dhe kjo quhet “dhunë verbale”. Videoja u dërgohet “emisioneve investigative” dhe pastaj mësuesin e hedhin në rrugë shpejt e shpejt. Ndërsa në rrjet ne i marrim erzin publikisht.

Gazetari Mentor Kikia

Vetë shteti kontribuoi shumë në këtë zhvlerësim.

Sot, të bësh punën e mësuesit është shumë e vështirë. Shumica e familjeve mendojnë se është detyrë e shkollës t’ua bëjë fëmijën të mençur, të ditur, të edukuar e çfarëdo tjetër.

Bashkëpunimi mes prindërve dhe mësuesve është sfidë më vete. Harrohet se për të “ndërtuar” një fëmijë duhet bashkëpunim i ngushtë familje-shkollë.

Si kudo, edhe në shkolla ka mësues që ndoshta nuk e meritojnë këtë titull dhe këtë profesion. Si për nga shkalla e formimit profesional, ashtu dhe integriteti. Nuk mund të jetë mësues ai që i drejton nxënësit që të shkojnë te passhkollori X që i jep një honorar për këtë, apo ai që i fton nxënësit në shtëpi të bëjnë kurse për lëndën që jep në shkollë.

Megjithatë, sot unë dua të nderoj pikërisht figurën e mësuesit, të mësuesit që duhet të mbetet heroi i fëmijëve dhe shoqërisë.

Sot dua t'i ftoj të gjithë që ta respektojmë figurën e mësuesit dhe ta ngremë atë sa më lart në sy të fëmijës.

Sepse unë mendoj se shkolla nuk është godina, shkolla është ajo që bëhet brenda godinës. Një ndërtesë mund të jetë vërtet shumë moderne, por nuk do të thotë se ajo është një shkollë e mirë.

Në klasën time të parë, në mes të klasës vendosnim një legen kur binte shi, sepse çatia pikonte.

Ne ngroheshim me një sobë modeste me dru. Por ajo që i ngrohte më shumë shpirtrat tanë ishte mësuesja, që na donte dhe e donim shumë.

P.S: Këtu ndodhet edhe vajza ime...