web counter
LEXO PA REKLAMA!

SHKARKO APP

App Store
Google Play

Itali/ Gazetarët e "RAI"-t, grevë kundër tendencave për censurë nga Meloni

26 Prill 2024, 09:45, Kosova & Bota CNA

Itali/ Gazetarët e "RAI"-t, grevë kundër tendencave

Gazetaret dhe gazetarët e medias publike të Italisë, "RAI", për të protestuar kundër tentativave të kryeministres së ekstremit të djathtë Giorgia Meloni duan të hyjnë në grevë. Sindikata "Asigrai" ka bërë thirrje për një grevë 24-orëshe më 6 dhe 7 maj, pasi në bisedimet me drejtuesit e "RAI"-it nuk u arrit të shmangen rezervat.

Arsyeja kryesore për grevën është "kontrolli i rreptë i punës gazetareske" dhe "përpjekja për ta reduktuar 'RAI'-n në një organ zëdhënës të qeverisë", komunikoi sindikata. Po ashtu kritikohet mungesa e personelit dhe kushtet jo të mira të kontratave të punës.

Një tjetër sindikatë, "Unirai", deklaroi se nuk do të marrë pjesë në grevë. Ajo e cilësoi grevën "politike". "RAI" duhet të kthehet në një media të raportimit "pluralist".

Dyshimet lidhur me pavarësinë e medias publike italiane, "RAI", po shtohen qëkurse ka ardhur në pushtet qeveria e Melonit në vitin 2022. Fundjavën e kaluar pati akuza se "RAI" ndaloi publikimin e një shkrimi të një autori kritik ndaj Melonit. Ishte planifikuar që ky autor të mbante një fjalim në vigjilje të ditës së çlirimit. Italia kremton çdo vit më 25 prill si ditën e humbjes së fashizmit dhe nazizmit në Luftën e Dytë Botërore.

Antonio Scurati është një shkrimtar i vlerësuar jo vetëm në Itali. 54-vjeçari ka marrë disa çmime. Ai trajton intensivisht temën e fashizmit. Për romanin e tij "M. djali i shekullit" mbi Benito Mussolinin ai është vlerësuar me çmimin më prestigjioz italian për letërsinë, Premio Strega.

Scurati u ftua nga "RAI" të mbante një fjalim për ditën e çlirimit nga fashizmi. Por pak përpara emisionit atij ia anuluan ftesën duke mos e lejuar të mbajë fjalimin. Moderatorja e emisionit nuk donte ta pranonte një gjë të tillë dhe me vendosmëri lexoi drejtpërdrejt në transmetim përpara kamerës fjalët e tij. Si Meloni edhe menaxhmenti i "RAI"-t i kanë hedhur poshtë akuzat për censurë. Menaxhmenti i "RAI"-t publikoi më pas fjalimin e shkrimtarit në rrjetet "online"./DW 

 





Lajmet e fundit nga