Disa zona të Tiranës pa ujë/ Partia e Lirisë thirrje SPAK: Të nisë hetimi mbi abuzimet e Ujësjellës Kanalizimeve

18 Shtator 2023, 14:07, Kosova & Bota CNA

Disa zona të Tiranës pa ujë/ Partia e Lirisë thirrje SPAK:

Nënkryetari i Partisë së Lirisë, Endrit Braimllari në një deklaratë për mediat ka folur lidhur me mungesën e ujit në disa zona të Tiranës.

Ai denoncon se Veliaj dhe pse ka rritur çmimin e ujit i cili rëndon drejtëpërdrejtë mbi qytetarët e Tiranës, nuk ka përmirësuar furnizimin me ujë në kryeqytet.

Braimllari i bëri thirrje Prokurorisë së Tiranës dhe SPAK-ut të nisë hetimin mbi abuzimet dhe paligjshmërinë e Ndërmarrjes së Ujësjellës Kanalizime Tiranë, në të gjithë vitet e drejtimit të bashkisë nga Erion Veliaj.

Deklarata e plotë:

Prej disa ditësh disa zona në Tiranë po vuajnë mungesën e furnizimit me ujë të pijshëm. Zonat më problematike janë Tirana e Re dhe Unaza e Re, e cila prej 10 ditësh ka mungesë të theksuar furnizimi me ujë.

Para 6 vitesh, Erion Veliaj duke justifikuar rritjen e çmimit të ujit garantonte qytetarët e Tiranës që do të kishin 24 orë furnizim me ujë.

Me arrogancën e tij duke i bërë karshillik qytetarëve, Veliaj shpreh se me çmim Bathorje Tirana do të kishte cilësinë e ujit të Korçës.

Erion Veliaj dhe me rritjen e çmimit të ujit i cili rëndon drejtëpërdrejtë mbi qytetarët e Tiranës, nuk ka përmirësuar furnizimin me ujë në kryeqytet.

Sot, pas 6 vitesh Tirana ka të njëjtën problematikë, madje në zona të veçanta situata është më e rënduar se 6 vite më parë duke pasur kufizime të shumta.

Para disa muajsh në emër të Partisë së Lirisë kemi evidentuar këtë problematikë dhe kemi paralajmëruar Bashkinë e Tiranës të marrë masa mbi furnizimin me ujë të qytetarëve.

Arroganca dhe papërgjegjshmëria e Erion Velisë kundrejt qytetarëve ka kaluar çdo kufi.

Interesi i tij janë tenderat dhe investimet korruptive në UKT të cilat nuk shkojnë për të përmirësur shërbimin por vidhen.

Erion Veliaj dhe drejtori i UKT, Elton Kacillja kanë detyrimin t’i japin shpjegime qytetarëve të cilët paguajnë çdo muaj një faturë me çmim të lartë për ujë në Tiranë i cili jo vetëm nuk është i pijshëm por mungon për orë dhe ditë të tëra.

Erion Veliaj dhe Elton Kacillja kanë detyrimin t’i përgjigjen qytetarëve mbi këtë problematikë dhe jo të fshihen pas karriges dhe pushtetit.

I bëjmë thirrje Prokurorisë së Tiranës dhe SPAK-ut të nisë hetimin mbi abuzimet dhe paligjshmërinë e Ndërmarrjes së Ujësjellës Kanalizime Tiranë, në të gjithë vitet e drejtimit të bashkisë nga Erion Veliaj.

Tirana e vitit 2023, nuk mund të jetë një kryeqytet i lënë në harresë nga arroganca dhe korrupsioni i Erion Veliajt. Tirana e vitit 2023 nuk mund të jetë një kryeqytet kur mungon uji i pijshëm./ CNA