Të ikë Saliu!

25 Shkurt 2026, 20:59, Editorial CNA

Të ikë Saliu!

Ka një tezë të përdorur rëndom, kryesisht nga “mendjet e majta”, analistët e banaqeve televizive, siç i quan kryeministri ynë, të cilët thonë që “opozita është në këtë gjendje se është Saliu”, “Rama bie po iku Saliu”, “Saliu nuk vjen kurrë në pushtet”.

Teza dhe teori këto që fokusohen pandalim tek Saliu, sepse analistët janë të majtë dhe nuk duan Sali Berishën.

Disa kanë dhe problematikat e tyre personale në dekada, por problemi i tyre nuk është të ikë Saliu. Halli i tyre është që opozita të bëhet kashtë e koqe.

Dëgjojmë të thonë se opozita nuk bashkohet dhe nuk vjen në pushtet po nuk iku Saliu, që është kryetari i partisë më të madhe opozitare.

Nëse duan që Saliu të ikë, kanë alternativa të tjera.

T’i bashkohen Agron Shehajt dhe deputetit të ri Erald Kapri, që kanë marrë 50 mijë vota, kauzave të tyre, të shkojnë në protestë me Agron Shehajn, le të bëhen më të mëdhenj se Saliu dhe ta rrëzojnë Ramën, e më pas të bashkohen.

Nëse nuk iu pëlqen Agron Shehajn, kanë një alternativë tjetër, është Adriatik Lapaj i vetëm para Kryeministrisë, nuk shkon njeri ta mbështesë. Në rast se nuk ju pëlqen as Lapaj mund të gjejnë të tjera alternativa.

Të ikë Saliu!

Por edhe nëse bashkohen këta si opozita, si një front i vetëm përsëri do thonë u bashkuat me Saliun, dhe Saliu duhet të ikë.

Pse duhet të ikë Saliu, që PD të bëhet copash? Të bëhen 7 apo 8 Adriatik Lapaj apo Agron Shehaj dhe opozita të vazhdojë të jetë e ndarë, me alterantiva të kota, ku njëri merr 50 mijë vota, tjetri 20 mijë e një tjetër 30 mijë me një skemë përçarje vetëm që të ikë Saliu.

Kjo duket qartë, e tregojnë dhe analistët e servilët e pushtetit, mbështetësit e tij të cilët në artikulimet e tyre theksojnë se "12 vjet janë shumë për Ramën. Ndoshta duhet të ikë Rama po nuk ikën, qëndron në pushtet se është Saliu".

Jo. Partia Socialiste është më e madhe, opozita nuk ka votat e së majtës. Ky është fakt. Opozita nuk arrin dot të mbledhë të pakënaqurit.

Cilat janë arsyet? Duhet t’i gjejë te vetja. Humbet votat, ia vjedhin, është e paaftë të mbrojë votat e saj.

Ka 1001 argumente pro dhe kundër, por nuk mund të thuash "ik ti tani zotëri se kemi qejf ne, se po ike ti do vijnë në pushtet ata".

Në fakt, po iku Saliu dhe të bëhen 4 apo 5 parti, si vjen opozita në pushtet? Si bie Edi Rama?

Të ikë Saliu!

Ndaj dhe këto artikulime janë thjesht dhe vetëm mesazhe të përsëritura pa mbarim, thjesht dhe vetëm për t'i ngulur në mendje njerëzve që Saliu duhet të ikë, se kështu e kanë hallin e tyre.

Është njësoj si historia që ndodhi me Erion Veliajn, që gazetari i familjes Veliaj, Mero Baze artikuloi se çështja e Ajolës ishte punë brekësh, dhe më pas tha këta përflasin dhe brekët, ndërkohë që ishte ai vetë që e përdori si skemë për ta bërë çështjen poshtëruese dhe neveritëse.

Vetë i hedhin tezat, vetë i përdorin ato, vetë i kërkojnë dhe i përsërisin pambarim që të arrijnë qëllimin e tyre, në rastin konkret me goditjen që duan t'i bëjnë PD-së, është qëllimi final: shkrirja e kësaj partie.

Kjo parti e cila në fakt, mirë apo keq ka 500 mijë vota, 600 mijë vota. Dhe, nëse nuk fiton dot me Saliun le të dalë një më i zoti dhe të fitojë.

Faji në këtë rast nuk është i Saliut. Faji është i sjelljes tonë alla shqiptarçe, që ndoshta fillon dhe nuk mbaron tek Saliu, por fillon dhe mbaron te mendjendriturit tanë./ CNA