web counter
LEXO PA REKLAMA!

SHKARKO APP

App Store
Google Play

“Vetëvrasja” publike e prokurorit Dritan Prençi

18 Shkurt 2026, 14:24, Editorial CNA

CNA është një nga mediat që nuk ka ndalur publikimet, investigimet, denoncimet për çështjen e inceneratorëve, por edhe dosje të tjera me ndjeshmëri të lartë, siç ka qenë dosja “5D”, dosja e kryebashkiakut Veliaj, etj.

Denoncime mbi afera, të cilat kryesisht janë marrë nga SPAK-u dhe shumë persona përgjegjës kanë shkuar në bankën e të akuzuarve përballë drejtësisë.

Një nga më kryesoret është dosja e inceneratorëve, e cila prej 5 vitesh nuk është mbyllur nga prokurori Dritan Prençi, që nuk ka guxuar as ta marrë e ta pyesë kryetarin e Bashkisë së Tiranës, Erion Veliajn, në lidhje me këtë çështje.

Inceneratori është në Tiranë, ishte në administrimin e Bashkisë Tiranë, në territorin e këtij qyteti në zonën e landfillit ku u humb dhe një jetë fëmije që ishte Ardit Gjoklaj. Ka letra zyrtare dhe deklarime të kryebashkiakut në lidhje me këtë çështje, por prokurori Dritan Prençi duket se po fle mbi këtë dosje.

Ai mund të jetë alamet gjumashi në këtë çështje dhe ndoshta shumë agresiv me dosje të tjera, këtë e zgjedh vetë, por në këtë rast ai bën një “vetëvrasje” publike, jo vetëm të vetes si prokuror, për reputacionin që duhet të ketë, për kolegët e një institucioni si SPAK-u, sepse damkën ia vë SPAK-ut që ka një prokuror që “fle”.

PSE?

Dritan Prençi tregon standarde të dyfishta se si një prokuror për çështje të caktuara ecën shpejt, kurse për një çështje madhore që ka qindra miliona euro dëme e vjedhje, fle gjumë.

Kjo ngre dyshime për sjelljen e tij: Që është një prokuror me standarde të dyfishta kjo duket, por mund të jetë edhe i paaftë. Më pas lind pyetja si ka mundësi që ndodhet në SPAK?

Le të marrim rastin e zëvendëskryeministres Belinda Balluku.

Dritan Prençi kërkoi masën e pezullimit nga detyra, argumenti ka qenë i thjeshtë: mund të prishë provat.

Në fakt, Belinda Balluku ishte ministre e Energjetikës edhe Infrastrukturës dhe zëvendëskryeministre.

Dritan Prençi në një praktikë normale ligjore mund të shkonte t’i bënte kërkesë Parlamentit për heqjen e imunitetit, ta hetonte në gjendje të lirë siç pretendon mazhoranca.

Le të shohim një rrjedhë ndryshe të ngjarjeve.

Së pari, Edi Rama e largon Belinda Ballukun nga ministre dhe e mban zëvendëskryeministre, çfarë do të thotë Dritan Prençi?

Nuk është ministre atje ku pretendon prokurori përkatës se do të prishë provat, Rama e çon në një detyrë tjetër. Është zgjedhja e kryeministrit ta çojë ku të dojë.

Vazhdon detyrën ose jo është në kompetencën e kreut të qeverisë.

Kujtojmë këtu rastin e ish-drejtorit të Tatimeve, Arben Sefgjini, i cili, edhe pse ishte me masë sigurie, ushtronte detyrën nga shtëpia, pasi kishte masë arresti në shtëpi. Erion Veliaj është kryetar bashkie, ushtron detyrën nga burgu i Durrësit.

Dritan Prençi që kërkoi masën e pezullimit, çfarë do t’i thotë një kontrolli të ILD-së apo KLP-së?

Si mundet që të kërkohet një masë sigurie pezullim nga detyra për një detyrë që nuk ka lidhje me hetimin, siç është posti i zëvendëskryeministrit?

E pezulluan nga detyra si ministre e Infrastrukturës, po në rast se e çon ministre Bujqësie Edi Rama, Belinda Ballukun, çfarë do të na thotë Dritan Prençi?

Do të shkojë ta ndjekë ministri më ministri që ta pezullojë nga detyra?

Në momentin e parë në Gjykatën Kushtetuese u dha një vendim, prokurori hodhi një hap të dytë, kërkoi heqjen e imunitetit për të vendosur një masë tjetër sigurie, ndërkohë Gjykata Kushtetuese pa vendim la në fuqi kërkesën e SPAK-ut që zonja Balluku duhej pezulluar nga detyra.

Balluku është e pezulluar, ndërkohë Dritan Prençi ka kërkuar një masë më të rëndë, heqje imuniteti, për të ndryshuar masën e sigurisë.

Gjykata Kushtetuese e ka dhënë pezullimin (pa vendim) çfarë do të bëjë Dritan Prençi, do të heqë dorë nga masa e dytë e sigurisë që kërkoi me shpejtësi pa pritur të zbardhej vendimi i Gjykatës Kushtetuese?

Ka shumë pikëpyetje që lindin nga juristët dhe këto nuk janë të artikuluara thjesht dhe vetëm nga ne si media, por edhe nga juristë, konstitucionalistë, prokurorë, ish-prokurorë dhe gjyqtarë, që thonë se këtu ka një ngërç.

Një ngërç të krijuar nga paaftësia e prokurorit.

Prokurori që fle mbi dosjen e inceneratorëve shpik pezullimin nga detyra, veprim që Dritan Prençi duket se e bëri me protagonizëm politik dhe publik. Dosja e inceneratorëve “fle”, pezullimi “zgjohet”?!

Ngërçe ligjore dhe publike, debate të lindura mes një institucioni siç është SPAK-u dhe kryeministrit, të krijuara nga paaftësia e një prokurori si Dritan Prençi.

Ky është fakt, ashtu siç është dhe paaftësia e Dritan Prençit për të çuar deri në fund çështjen e inceneratorëve ku ka frikë të marrë në pyetje kryebashkiakun e Tiranës, i cili ishte përgjegjës i territorit ku do të ndërtohej inceneratori që nuk u ndërtua kurrë.

Pa folur më tej për marrjen dhe administrimin e dokumenteve dhe akteve që janë gjetur në kompjuterat e Ajola Xoxës që lidhen me kompanitë e inceneratorëve.

Këtu fillon dhe mbaron debati për “vetëvrasjen” e Dritan Prençit, nga paaftësia, nga “zgjuarsia” apo nga rrethana të tjera që lidhen me kafe, takime, negociata me të burgosurin e Durrësit para se të binte në pranga diku në periferi të Tiranës./ CNA





Lajmet e fundit nga