web counter
LEXO PA REKLAMA!

SHKARKO APP

App Store
Google Play

E fundit!

x

Skema/ ”Dashuria” e Rilindjes dhe plani i realizuar i SPAK-ut

17 Mars 2024, 16:19, Editorial Elvi FUNDO

Skema/ ”Dashuria” e Rilindjes dhe plani i realizuar i SPAK-ut

Në fakt, diçka thelbësore ka me SPAK-un kjo mazhorancë, që po përpiqemi ta sqarojmë shkurt.

Duket qartë se Edi Rama kërkon që të ketë dy linja, një për diplomatët që nuk ndërhyn në punët e SPAK-ut dhe e dyta që ai e kontrollon, lëshon e balancon arrestimet siç do ai.

Dy rastet e fundit, i besuari i Veliajt, Taulant Tushe, dhe arrestimi i të besuarit të Ballukut, Evis Berberi, u shitën si të menaxhuar nga vetë Rama si balancë në qarqet politike e mediatike të dirigjuara nga propagandistët e Rilindjes.

Qasja e Ramës me ndërkombëtarët është drejtësi e pavarur duke parë edhe qëndrimet e forta të tyre.

Në partinë e tij sa socialiste, rilindëse dhe sekt 99-çash kërkon ta shesë sikur kontrollon gjithçka, por në fakt tenton komision “Ad Hock” kundër SPAK-ut, që pasi e pranojnë publikisht vartësit e tij, del vetë Naltmadhënia dhe e mohon.

Kjo zbulon dhe më mirë menaxhimin e pjesshëm të SPAK-ut, nga Rilindja duke bashkuar këtu edhe deklaratat e kreut të këtij institucioni, zotit Altin Dumani, për “flirtime” të prokurorëve me pushtetin.

Skema është e qartë, Edi Rama, Rilindja dhe 99-çat kërkojnë që gjithçka në aksionin e SPAK-ut të ngelet në nivel drejtorësh. Pra, merren drejtori i rrugëve, drejtori i punëve në bashki, drejtorë të niveleve të ndryshme, dosjet të ndahen të bëhen tërkuzë.

Prokurorët e Rilindjes të mos ngrenë akuza për ministrat, korrupsioni dhe çështjet të mbyllen me ata që akuzon vetë Rama.

SPAK-u të mos ketë standardet e duhura, por të jetë zgjatim pjesor pushteti i kontrolluar nga vetë i madhi, që shpesh Dumani e bën me stres dhe e shqetëson pa masë, sidomos kur i refuzon takimet jozyrtare, nuk i hapet telefoni apo i përcillen në shtëpi të deleguarit/at e institucioneve ligjzbatuese.

Sipas skemës, Edi Rama ka një qëllim të qartë, për ata jashtë SPAK-ut është i pavarur, por këtu brenda duhet ta dinë të gjithë se Kryeministri ynë i kontrollon të gjitha deri tek arrestimet e të korruptuarve që janë disa drejtorë që po bëjnë namin.

A thua se Shqipërinë e qeverisin drejtorët!

Disa drejtorë të arrestuar nga SPAK-u, nga të cilët kryeministri ynë të jep me thasë sa të duash, thotë po luftohet korrupsioni dhe rezultatet janë të duhurat. Ujku, ujku, por çakalli bën kërdinë. Në fakt, këta drejtorët janë nivel qenushësh bubuleshë që kocka më e madhe e tyre është ndonjë krah pule i thyer e lënë në tavolinë.

Sipas skemës, në fund të muajit prokurorët e SPAK-ut marrin rrogën 6 milionëshe, dhjetëra milionëshe vjetore, gjithashtu edhe gjyqtarët, lufta kundër krimit zhvillohet në tryeza politike, debati publik vazhdon me drejtorët.

Duke dorëzuar përpara drejtësisë disa drejtorucë, të cilët na qenkërkan njerëzit më të korruptuar në vend, Rama do të heqë akuzat nga vetja.

Shqiptarët në fakt e shohin se ende nuk kanë dalë përpara bankës së të akuzuarve instrumentet e vërteta politike të inceneratorëve, të “check up”-it, të sterilizimit, të koncesioneve, të PPP-ve, të tenderëve, krimi në politikë, paratë që blenë votat, e kështu me radhë.

Punën e SPAK-ut, KM-ja ynë siç i thonë vartësit, kërkon ta mbulojë me drejtorucë të pavlerë, për të na thënë se po fiton Reforma në Drejtësi dhe po luftohet korrupsioni.

Në fakt, kjo është një betejë e drejtuar me timon të kontrolluar duke e mbajtur në drejtimin e duhur./ CNA





Lajmet e fundit nga