web counter
LEXO PA REKLAMA!

SHKARKO APP

App Store
Google Play

E fundit!

x

SHËNIM/ Dhëmbi i prishur i Kryeministrit

17 Mars 2024, 15:30, Politikë CNA

SHËNIM/ Dhëmbi i prishur i Kryeministrit

Kryeministri Edi Rama, sot në një fjalim të gjatë në Asamblenë e radhës, e cila nuk prodhon më asnjë lajm, na shpalli shqetësimin e tij të radhës për komisionin “Ad Hoc”.

SHËNIM/ Dhëmbi i prishur i Kryeministrit

Në fakt, këto asambletë e Rilindjes tani janë thjesht dhe vetëm lëvizje të kryeministrit për të mbajtur vëmendjen te partia e tij dhe fillimi i asaj që mund të quhet fushata e parakohshme elektorale, i shkoi gjuha atje ku i dhemb dhëmbi, te një komision “Ad-Hoc”.

Kryeministri tha se komisionet “Ad-Hoc” janë thashetheme portalesh dhe broçkulla që duan të shuajnë suksesin e PS-së.

“Është folur lart e poshtë portaleve e socialeve, për trembje të socialistëve nga SPAK-u, për plane të fshehta dhe për vënien nën kontroll të drejtësisë së re. Të gjitha janë broçkulla që tregojnë se sa të vështirë e kanë një pjesë e bashkësisë sonë shqiptare e yshtur nga ata që dëgjon dhe ndjek në politikë, në media apo në mexhlisin e rrjeteve sociale, të kuptojë ose pranojë se PS e kësaj gjenerate po shkruan një kapitull të ri në historinë e marrëdhënieve të pushtetit politik me drejtësinë. Nëse nuk do donim drejtësi, do t'i kishim bërë të gjitha pazaret për ta ndaluar. Thonë e bëri SHBA-ja, por e bëri PS-ja, ishte në program që kur ishim në opozitë”, theksoi Rama.

Në fakt, gjuha shkon atje ku dhemb dhëmbi.

Lind pyetja e parë: Pse zotit Rama i shkoi gjuha kur dhëmbi nuk i dhimbte? Apo diçka kishte gatuar dhe zbulimi i skemës nga CNA sikur e shqetësoi dhe jo pak?

Kjo sepse për të njëjtën çështje janë shqetësuar edhe faktorët ndërkombëtarë. Ambasadorët në Shqipëri, vendet e BE-së dhe aleati ynë në SHBA kanë reaguar fort në lidhje me atë çështje dhe ne nuk besojmë, as mund ta mendojmë se ata i referohen vetëm CNA-së.

Ata kanë burimet e tyre diplomatike, ashtu sikundër ne u jemi referuar pikërisht atyre edhe për takimet me kryeministrin, duke i kërkuar të bëjë pas.

Kujtojmë se në momentin që ne raportuam lajmin, i pari doli Eduart Shalsi, i cili gati e mohoi komisionin “Ad-Hoc”, por tha pse të mos japë llogari edhe SPAK-u.

Në atë moment, pasi e panë se e djallosën si zakonisht dhe e vërteta doli në shesh, zotërinjtë e mazhorancës na shfaqën Elisa Spiropalin, e cila nuk e mohoi komisionin, por tha se nuk do të kishte asnjë lloj kontrolli mbi SPAK-un.

Më pas u shfaq Shalsi për të korrigjuar deklaratën e tij e kështu me radhë, sa njëri, sa tjetri, kush e kush kërkonin të ndreqnin atë që ishte bërë lëmsh.

Në fakt, e vërteta është një dhe vetëm një.

Mazhoranca përgatiti një komision “Ad-Hoc” me kërkesë të kryebashkiakut Erion Veliaj, një komision që do të drejtohej nga Fatmir Xhafaj. Gjoja në emër të integrimit dhe institucioneve të pavarura, strukturës së tyre, do të vërsuleshin mbi SPAK-un, mbi KLSH-në, mbi të gjitha institucionet e pavarura.

Pasi skema u zbulua, mazhoranca ka bërë një hap pas dhe tashmë thotë nuk kemi gjë me SPAK-un, por nga ana tjetër pretendon se lëshon sardele për të mbudhur rrjetën e SPAK-ut të cilët i quan peshq të mëdhenj kur në fakt janë vetëm disa drejtorë.

Ende në rrjetën e SPAK-ut s'kemi ministër në detyrë apo kryebashkiak të prangosur për korrupsion në zyrë.

Po lë t'i kthejmë pak memorien Ramës & Co

Kur raportuam për makinën luksoze në kulmin e pandemisë për ministrin e Brendshëm, kështu reagoi dhe në atë kohë ai, Elisa Spiropali, ministri i tij, i cili më pas iku me turp. Kështu reagoi për inceneratorët, kështu ka reaguar për tenderë dhe afera që ne kemi zbuluar dhe denoncuar.

Gjithmonë i mohojnë, gjithmonë nuk i pranojnë, më pas veprojnë sikur të vërtetën e kanë zbuluar vetë. Pak a shumë e njëjta teori e Shopenhauerit, sulmojnë fort, e pranojnë dhe zbulimin e quajnë Rilindas.

Të gjithë e kanë kuptuar skemën e kryeministrit tonë të nderuar, që kërkon me sulme, shpërthime të kontrolluara skandalesh, të tërheqë vëmendjen nga thelbi i çështjeve, siç ka bërë me inceneratorët, ashtu siç tentoi të bënte tashmë me komisionin “Ad-Hoc” dhe siç kërkon të bëjë me shumë skandale të qeverisë, të cilat kërkon t’i kalojë duke kthyer denoncimet dhe skandalet në debat të rëndomtë politik.

Kështu kërkon të kthejë edhe çështjen e komisionit “Ad-Hoc”, të cilin e mohon, por edhe njëherë na tregoi se ai është i shqetësuar për një të vërtetë, të cilën do ta ndërtojë sipas versionit të tij që tashmë s'e beson më as Baton Haxhiu./ CNA

 





Lajmet e fundit nga