web counter
LEXO PA REKLAMA!

SHKARKO APP

App Store
Google Play

E fundit!

x

Pse Rama qan linçimin e Veliajt?!

31 Dhjetor 2024, 12:33, Editorial CNA
Pse Rama qan linçimin e Veliajt?!
Edi Rama dhe Erion Veliaj

Kryeministri Edi Rama në daljen e tij mediatike të fundvitit artikuloi disa fjali për kryebashkiakun Erion Veliaj ai tha se Erion Veliaj ishte linçuar mediatikisht dhe se për shkak të publikimit të fakteve ishte cenuar familja e kryebashkiakut dhe ndihej i kërcënuar. (LEXO KETU)

Në fakt, kryeministri Rama harron të thotë apo bën sikur nuk e kujton se çfarë ka ndodhur me familjarët, fëmijët e shumë gazetarëve, të cilët kanë nxjerrë fakte dhe prova për qeverinë e tij dhe ministrat e tij të korruptuar që janë pas prangave.

Çfarë ka ndodhur me gazetarët, familjarët e tyre nga mediat e Edi Ramës, si janë linçuar, shantazhuar dhe kërcënuar me paratë e korrupsionit të inceneratorëve, të dosjes “5D”, të korrupsionit të Erion Veliajt, edhe të vdekurit në varr nuk janë lënë rehat.

Si janë linçuar dhe janë sulmuar në mënyrë brutale gra, bashkëshorte, motra vëllezër, familjarë, të afërm pa pasur asnjë limit.

Pse? Sepse gazetarët nxirrnin fakte dhe prova për korrupsionin e qeverisë.

A nuk është ky një linçim? A nuk e bënte këtë Erion Veliaj? A nuk e urdhëronte ai Mirel Mërtirin apo drejtorët e organizatës së tij kriminale të dosjes “5D”?

Pse shqetësohet Edi Rama?

Kryeministri duhet të ketë të njëjtin standard, nuk mund t’i digjet mjekra për Veliajn dhe të ndezë cigaren kur sulmohen të tjerët shumë herë më ashpër dhe shumë herë më rëndë se Erion Veliaj.

Erion Veliaj është një person nën hetim me katër akuza që është përgjegjës direkt për çështjen e inceneratorit të Tiranës.

E ka kërkuar vetë, e ka firmosur vetë pa mbledhur Këshillin Bashkiak të Tiranës dhe nuk e ka menaxhuar dhe dëmi i shkaktuar deri tani është 70 milionë euro të paktën të paguara nga shteti dhe inceneratori nuk ekziston në Tiranë.

Janë dhe 60-70 milionë euro të tjera të marra nga dherat me një kontratë të firmosur nga drejtorët e Erion Veliajt.

Dosja “5D” është një dosje kriminale korruptive e grupit të strukturuar i cili vidhte 100% paratë e taksave të qytetarëve dhe i bënte punët me punonjësit e bashkisë.

Është me video, me firma dhe vula.

“Harabeli” i bashkëshortes së Erion Veliajt është një tjetër mënyrë për të futur para nëpër xhepa apo në disa struktura OJF-sh për të injektuar para në banka, para korrupsioni të lidhjeve direkte apo indirekte të kryebashkiakut të Tiranës.

E këtu nuk ka asnjë linçim, këtu ka fakte. Nuk ka pse të ndihet dikush i kërcënuar se gazetarët nuk i bëjnë dikujt diçka.

Nuk kanë çfarë t’i bëjnë gazetarët me faktet dhe provat që publikojnë. Dhe, nuk është linçim, kujtoni pak çfarë i bëtë Berishës, Metës, familjarëve të tyre me soj dhe sorollop.

Ndaj dhe kryeministri përpara se të na qajë për Lali Erin, të cilit ndoshta i qan hallin se mos i merr malet dhe i ngelet një gur i varur në qafë, mirë është të ketë të njëjtat standarde kur flet për një çështje të caktuar apo do të mbrojë një parim. Jo ca të nënës dhe ca të njerkës siç i shikon Edi Rama, kur i goditen ata që ka pranë dhe fërkon duart kur goditen ata që ka përballë./ CNA





10:20 Editorial

Lotët e Lulit

Në disa dalje mediatike të javëve të fundit, Lulzim Ba...

Lajmet e fundit nga