web counter
LEXO PA REKLAMA!

SHKARKO APP

App Store
Google Play

Gjithë drejtësia shkartiset për zdromsin

2 Maj 2026, 15:29, Editorial CNA

Në GJKKO prej 10 muajsh kanë shkuar 13 akuza të rënda penale për Erion Veliajn, ndërkohë ka dhe një dosje tjetër në hetim për vëllain e tij, Arbër Veliaj, dhe fondet që ai ka lëvruar.

Seanca pambarim shtyhen. Merret një avokat, dorëhiqet një avokat, shkarkohet një avokat deri në fund sa doli fytyra më e bukur e drejtësisë, Plarent Ndreca, i cili ka dhe kurajën të kërcënojë hapur drejtësinë kur në fakt është dhe vetë një i akuzuar për shpërdorim detyre dhe ndaj tij po zhvillohet çështja në GJKKO.

GJKKO dhe SPAK

10 muaj, GJKKO dhe SPAK, hetime, data gjyqesh, seanca, përplasje, beteja në GJKKO, ku në fakt mungon i pandehuri Erion Veliaj. Shkojnë vetëm avokatët e zdromsit të Bashkisë së Tiranës dhe bashkëpunëtorëve të tjerë që akuzohen.

Gjykata Administrative

Përtej GJKKO, Gjykata Administrative nga muaji janar ka një padi ndaj prokurorit Ols Dado i bërë nga Erion Veliaj. Dhe aty një lëmsh.

Seanca, avokatë që flasin, kërkojnë ndërkombëtarët të marrin pjesë në gjyq, presion i hapur, shantazh ndaj drejtësisë, lobistë që flasin, çështje në Gjykatën Administrative.

Erion Veliaj shkartis Administrativen që të rrëzojë emërimin e prokurorit Ols Dado me qëllim që të quajë aktet e pavlefshme dhe të shpëtojë nga akuzat e rënda penale dhe në vend që të përballet me drejtësinë, shkon dhe gjen skemat dhe skenarët që ndoshta ia këshillojnë lobistët, avokatët e tij apo ndoshta dhe i bën vetë se, ai qëndron mbi lobistë dhe avokatë sepse siç ka thënë vetë është një zdroms.

Gjykata Kushtetuese

Më datën 31 tetor, Gjykata Kushtetuese u mblodh në një seancë për të shqyrtuar kërkesën e Veliajt për rrëzimin e shkarkimit të tij fillimisht nga Këshilli Bashkiak e më pas nga qeveria, të bërë më datë 25 shtator të 2025.

Gjykata Kushtetuese e gjeti të padrejtë shkarkimin nga qeveria pa u dëgjuar Veliaj në Këshillin Bashkiak.

Në fakt, Veliajt në atë rast iu dha mundësia të dëgjohej përmes avokatit të tij, me një letër apo në forma të tjera, por nuk pranoi.

Veliaj vijon në burg prej rreth 15 muajsh dhe Bashkia e Tiranës mbahet peng prej tij në burgun e Durrësit.

Pra, Gjykata Kushtetuese pati një kërkesë, tashmë ka një kërkesë të dytë për shfuqizimin e masës së sigurisë. Shkartiset dhe Gjykata Kushtetuese nga Erion Veliaj.


Gjykata e Lartë

Një tjetër gjykatë, ajo e Larta, vazhdon të gëlojë nga vendimi i ndërmjetëm i Sokol Sadushit, partizanit të rilindjes, që është bërë kryetar gjykate. Tani duke kërkuar të rrëzojë një vendim të Kolegjeve të Bashkuara të vitit 2011 kërkon të heqë shallin e pionierit dhe të bëhet president i Republikës në pazar me pushtetin.

Shkartiset Gjykata e Lartë. Këtë të hënë është vendimi. Të presim çfarë do të ndodhë. A do të mundet Sokol Sadushi që me shkundjet që i dha Gjykatës së Lartë për interesat e Veliajt të rrëzojë me Kolegjin Administrativ apo Civil një vendim të Kolegjit Penal?

GJKKO vazhdon gjykimin. Në apelin e kësaj gjykate shkojnë çështje pambarim, nga Erion Veliaj në Administrative ka filluar një proces, sido të jetë vendimi Veliaj do ta çojë në Apel, në Gjykatën e Lartë, një tjetër situatë me Erion Veliajn.

Përveç çështjeve të tij ka dhe skema e skenarë të tjerë. Gjithashtu dhe në Gjykatën Kushtetuese.

E gjithë drejtësia e shkartisur për zdromsin e Tiranës që ndodhet në burgun e Durrësit që mban peng bashkinë e kryeqytetit duke ruajtur karrigen e kryetarit.

Veliaj vazhdon në qeli me skema dhe skenarë, shantazhe dhe kërcënime nga format më të ndryshmet thjesht dhe vetëm për të mos u përballur me drejtësinë, për të mos shkuar para prokurorëve dhe gjyqtarëve në një betejë të vërtetë ligjore, por për të gjetur mënyrën që të dalë i lirë me shpresën se kjo mund të quhet fitore dhe të ndryshojë rrjedhën e ngjarjeve./ CNA





Lajmet e fundit nga