A ka ngelur gjë pa ndodhur akoma?

3 Gusht 2022, 11:06, Editorial CNA

Rilindja, projekti i kryeministrit Edi Rama, njeriut që do të përmbyste korrupsionin e Sali Berishës dhe do të rikthente sigurinë dhe zhvillimin e Shqipërisë.

Por, në Shqipëri po ndodhin vetëm bëma dhe gjëma.

Këtu nuk po listojmë tërmete dhe pandemi, ato janë fatkeqësi natyrore, janë epidemi, por po flasim për këto bëmat e gjëmat e përditshme, për tri viktimat në plazhet shqiptare, për vrasjet mafioze që ndodhin në mes të ditës, rrugëve të Shqipërisë.

Atentati mafioz në Fushë-Krujë, ku humbën jetën tre persona

Për korrupsionin, për inceneratorët, për koncesionet për ministrat në burg dhe për kryeministrin që vjen vërdallë a thua se është Agushi që ha gjizë për t’u bërë esëll.

Por, në fakt thjesht dhe vetëm numëron viktimat dhe me një gjuhë të turpshme pas një fëmije viktimë dje në plazh, tha se drejtuesit e policisë duhet të nxjerrin mësim.

Në fakt përgjegjësia është e ministrave, e kryeministrit, e “strategëve” të turizmit shqiptar.

Leksionet dhe mësimet nuk duhet t’i nxjerrë një polic militant, një polic i përfshirë në trafik droge, i cili vrau një fëmijë dhe as shefat e tij.

Mësimet duhet t’i njxerrë dhe t’i marrë Ministri i Brendshëm i Edi Ramës, ministrja e Turizmit e Edi Ramës. Janë ata përgjegjësit!

Ministrat, Bledi Çuçi dhe Mirela Kumbaro

E kur ndodh që ti nuk mundesh dot të mbrosh më fëmijën, mendon se çfarë ka mbetur më akoma?

Një familje që vjen nga Anglia të shpenzojë para në vendin e tij dhe lë fëmijën viktimë në brigjet e Shqipërisë. Ndërsa kryeministri na tregon leksionet me mësime.

Çfarë duhet më akoma?

Çfarë ka ngelur pa ndodhur në këtë vend ku vidhet ditë e natë, ku vriten ditë e natë, ku merren jetë fëmijësh në mes të ditës nëpër plazhe, atje ku njerëzit shkojnë të çlodhen dhe të bëjnë turizëm.

Çfarë duhet të ndodhë më në këtë vend? Dikush mund të thotë ka edhe më shumë, nuk është fajtor vetëm qeveria.

Po ka edhe më shumë, çfarë duhet të ndodhë më shumë në këtë vend ku shohim si zë të opozitës, Ilir Metën e si shpresë hajdutëritë e tij e një tufë budallenjsh e të paaftësh që ndjekin nga mbrapa Sali Berishën me shpresën se do të vijë nesër në pushtet.

Të gjitha politikisht dhe jo politikisht, por përgjegjësja kryesore është Qeveria, është kryeministri për gjithçka që ka ndodhur.

Kur një prind nuk mbron dot fëmijën, kur nuk ka siguri për jetën, çfarë ka ngelur më pa ndodhur në këtë Shqipëri me kaq halle me kaq shumë plagë, pa rend pa siguri ku nuk mund ta lësh fëmijën bregut të detit se të çmendurit që punojnë në shtet dhe ky shtet i çmendur fare, në vend të bëjnë detyrën e tyre, marrin jetë dhe sjellin destabilitet./CNA.al