web counter
LEXO PA REKLAMA!

SHKARKO APP

App Store
Google Play

E fundit!

x

Hetimet për sterilizimin/ Biznesmeni Rrapaj lëvizte me makinën e Ministrisë së Shëndetësisë

31 Gusht 2023, 16:40, Aktualitet CNA
Hetimet për sterilizimin/ Biznesmeni Rrapaj lëvizte me makinën e
Ish-zv.ministri i Shëndetësisë, Klodian Rjepaj dhe biznesmeni Ilir Rrapaj

CNA ka siguruar vendimin e Gjykatës së Posaçme të Shkallës së Parë për dosjen e koncesionit të sterilizimit, një nga çështjet e “nxehta" në duart e SPAK-ut që ka sjellë edhe reagime të shumta politike.

Pas kallëzimit të bërë nga “Nisma Thurje” në dhjetor të vitit 2019, Prokuroria e Posaçme ka ngritur akuza ndaj 8 personave, si të përfshirë për veprat penale “falsifikim i dokumenteve”, “mashtrim” dhe “shpërdorim detyre”.

Pas hetimeve gjykata ka dhënë masat “arrest me burg” për ish-zv.ministrin e Shëndetësisë, Klodian Rjepaj dhe biznesmenin Ilir Rrapaj.

Ish-zv-ministri i Shëndetësisë, Klodian Rjepaj akuzohet për “mashtrim”, “falsifikim i dokumenteve” dhe “shpërdorim detyre”. Ndërsa mbi biznesmenin Ilir Rrapaj rëndon akuza e mashtrimit.

Ndërkohë gjykata ka dhënë masën e sigurisë “arrest shtëpie” për Saimir Kadiun dhe masën “detyrim paraqitje” për 4 të tjerë, Arben Gjatën, Petraq Mersinin, Genc Byrazerin, dhe Naile Abazin.

Rrapaj lëvizte me makinën e Ministrisë së Shëndetësisë

Në dosjen e SPAK, nënvizohet se ish-zv/ministri Klodian Rjepaj dhe biznesmeni Ilir Rrapaj kanë njohje të hershme dhe ata kanë studiuar në Universitetin e Mjekësisë në vitet 1991 dhe 1994. Këta të fundit kanë përfunduar studimet me Artan Leshin, që rezulton të jetë drejtor në kompaninë “Saniservice”.

Miqësinë e tyre ata e kanë vazhduar dhe kanë bashkëpunuar me qëllim që të përfitonin nga kontrata e sterilizimit. 

Sipas Prokurorisë së Posaçme, Ilir Rrapaj ka hyrë në territorin e Shqipërisë në dhjetor të 2014 me automjetin e Ministrisë së Shëndetësisë, i cili ishte në përdorim nga ish-zv-ministri Klodian Rjepaj.

Ky udhëtim është bërë pak ditë para se bashkimi i operatorëve të ekonomisë, ku përfshihet kompania "Investital" e Rrapajt të shpallej fitues për koncesionin. 

“Saniservice” është kompania koncesionare e sterilizimit, aksionet më të mëdha i ka “Investital LLC”, ku themelues është Ilir Rrapaj.

"Sa më sipër vërehet se shtetasi Ilir Fejzo Rrapaj ka hyrë në territorin e Republikës së Shqipërisë me automjetin me targë TR4112R, e cila ka rezultuar se është në pronësinë e Ministrisë së Shëndetësisë. Kjo periudhë përkon me kohën e ardhjes në Shqipëri të delegacionit të rajonit Umbria, për nënshkrimin e Memorandumit të Mirëkuptimit në datë 11.12.2014, ku nga këqyrja e të dhënave në faqen zyrtare të Ministrisë së Shëndetësisë, janë fotografitë e publikuara ku pjesëmarrës është edhe shtetasi Ilir Rrapaj. Gjithashtu, kjo periudhë përkon me përfundimin e veprimeve të studimit të fizibilitetit për Koncesionin e sterilizimit dhe pritej konfirmimi nga Ministria e Financave, të cilin më pas e ka fituar pikërisht bashkimi i Operatorëve Ekonomikë i përbërë dhe nga Investital me administrator Ilir Rrapaj. Automjeti TR4112R ka qënë në përdorim të Zëvëndës Ministrit Klodian Rjepaj", thuhet në dosjen e SPAK. / CNA





Lajmet e fundit nga