E fundit!

15:38 Aktualitet

Goditi protestuesin në Zvërnec/ Ndryshon masa e sigurisë për një nga punonjësit e sigurisë së kantierit

Gjykata e Apelit ka ndryshuar masën e sigurisë për një ng...

Shqiptarët konsiderojnë prioritet për qeverinë: punësimin, sigurinë dhe ndërtimin e rrugëve

31 Gusht 2023, 14:34, Aktualitet CNA

Shqiptarët konsiderojnë prioritet për qeverinë:

Mundësitë më të mira për punësim janë fushe, ku duhet të përqendrohet më së shumti qeveria shqiptare, sipas një ankete që ka zhvilluar Barometri i Ballkanit për vitin 2022, kur i pyeti qytetarët në 6 vende se çfarë konsideronin prioritare nga qeveritë e tyre për 12 muajt në vijim.

Pas krijimit të mundësive për punësim, rendi dhe siguria publike u renditën si fusha e dytë më prioritare për investime nga shqiptarët dhe infrastruktura rrugore e treta.

Anketa tregoi se shqiptarët dhe boshnjakët e konsideruan punësimin fushën më të rëndësishme ku duhet të përqendrohen politikat e qeverisë, përkatësisht me 45 dhe 48%, ndërsa në vendet e tjera të Rajonit punësimi si prioritet është më pak i rëndësishëm.

Shqipëria dhe Bosnja kanë nivelet më të larta të emigrimit në Rajon. Në Shqipëri anketat kanë gjetur se rreth 85 për qind e largimeve bëhen për arsye ekonomike dhe mundësi më të mira punësimi.

Siguria dhe mbrojtja nga krimi janë shqetësimi i dytë më madhor i shqiptarëve. 39 për qind e të anketuarve në vendin tonë besojnë se Shqipëria duhet të ketë prioritet kryesor rendin publik dhe luftën kundër krimit të Organizuar. Shqipëria kishte përqindjen më të lartë të të anketuarve që rendisin rendin publik si prioritet kryesor nga qeveria për 12 muajt në vijim.

Në vendet e Rajonit kjo përqindje është më e ulët pasi rreth 1 e treta e konsiderojnë prioritet rendin dhe sigurinë.

Gjithashtu 23% e të anketuarve në Shqipëri janë shprehur se në 12 muajt në vijim qeveria duhet të ketë prioritet investimet në infrastrukturën rrugore, në një përqindje mesatarisht të ngjashme me vendet e tjera të Ballkanit që e konsiderojnë ende të mangët infrastrukturën e transportit.

Studimet e mëparshme të institucioneve financiare ndërkombëtare kanë vlerësuar se Shqipëria ende ka një hendek infrastrukturor të paplotësuar me rreth 50 për qind. Edhe pse prej gati dy dekadash qeveritë shqiptare kanë përqendruar investimet publike në infrastrukturën e transportit vendi ende nuk ka një sistem efikas dhe e ka totalisht jofunksional transportin hekurudhor.

Kur vjen puna te shërbimet e tjera publike si shërbimet e pastrimit dhe ato komunale shqiptarët janë më pak të shqetësuar se Rajoni./Revista Monitor