web counter
LEXO PA REKLAMA!

SHKARKO APP

App Store
Google Play

E fundit!

x

Përplasjet në “Top News”/ Dorëhiqet autorja dhe stafi i “Breaking”

24 Nëntor 2022, 17:02, Aktualitet CNA
Përplasjet në “Top News”/ Dorëhiqet autorja dhe stafi
Fotomontazh - Godina e "Top Channel" dhe autorja e programit "Breaking", Elisa Gjerani

Ndryshimet e fundit në “Top Media”, ku pronarët kanë dhënë me qira kanalin e “Digitalb” “Top News”, kanë shkaktuar përplasje të shumta mes stafit dhe drejtuesve të rinj. Pasi “frerët” e “Top News” janë marrë në dorë nga Habilajt, të cilët përflitet se janë të lidhur me inceneratorët, menjëherë është ndryshuar politika editoriale dhe është ushtruar presion ndaj punonjësve për të pranuar kushtet e reja, ndonëse me kontrata të rregullta me “Top News”, që në muajin prill 2022, kur kjo shoqëri u krijua për herë të parë.

Shoqëria u krijua pikërisht, pasi “Top Channel” largoi nga drejtimi Ben Blushin dhe Endrit Habilajn, të cilët i cilësoi si gjobaxhinj, ndërkohë që vetëm disa muaj më vonë mësohet se Habilajt kanë marrë me qira kanalin “Top News” dhe drejtues është vendosur Erion Habilaj, kushëri i Endrit Habilajt. Erion Habilaj menjëherë i ka kërkuar stafit dyfishim të punës dhe u ka ndryshuar pagat dhe pozicionet që kishin, duke kërkuar riformatim me buxhet sa më të ulët.

Kjo ka hasur në kundërshtinë e stafit, ndaj të cilit është ushtruar presion dhe si pasojë, i gjithë stafi i programit “Breaking” ka dhënë dorëheqjen. Autorja dhe moderatorja e këtij programi, Elisa Gjerani, bashkë me stafin e saj mësohet se kanë paraqitur dorëheqjen zyrtarisht dhe që kanë kërkuar largimin nga “Top News”, pikërisht për shkak të klimës së krijuar.

Ndërkohë, burime pranë “Top News” bëjnë me dije se dorëheqje të tjera pritet gjatë ditëve në vijim, pikërisht për shkak të ndryshimit të kursit vetëm pak ditë pasi u mor me qira. Megjithatë, sipas burimeve pranë “Top Channel”, kontrata, e cila nuk është bërë publike dhe nuk është reflektuar në Qendrën Kombëtare të Biznesit mësohet se është bërë për një vit si kusht për mbylljen e gjyqit mes Habilajt dhe “Top Channel” për largimin që iu bë në muajin mars të vitit 2022 dhe për shkak të lidhjes së Lori Hoxhës me kompanitë e inceneratorëve, me të cilët janë të lidhur edhe drejtuesit e rinj të “Top News”./ CNA.al





Lajmet e fundit nga