web counter
LEXO PA REKLAMA!

SHKARKO APP

App Store
Google Play

E fundit!

x

Kush janë lobistët dhe studiot ligjore që i vërsulen SPAK-ut dhe drejtësisë?

10 Korrik 2025, 13:37, Aktualitet REDAKSIONALE

Kush janë lobistët dhe studiot ligjore që i vërsulen SPAK-ut

Disa kompani lobiste apo studiosh ligjore, ato që mbrojnë Veliajn apo ato që ndjekin nga pas Berishën, Metën apo zyrtarë të tjerë të korruptuar në vazhdimësi mbajnë qëndrime publike duke goditur reformën në drejtësi në Shqipëri dhe në mënyrë të veçantë SPAK-un.

Që reforma në drejtësi ka nevojë për kritika, kjo nuk diskutohet dhe duhet të ketë patjetër përmirësim. Që SPAK-u ka dhe prokurorë që flenë mbi dosje, edhe ky është një fakt i ditur, por ama është i vetmi institucion që po lufton korrupsionin dhe kjo thuhet edhe në raportin e fundit të BE-së që “Europë pa SPAK nuk ka”.

Tani vijnë disa kompani lobimi apo studio ligjore, ndonjëra prej tyre nuk ka asnjë lidhje me të drejtën penale, vijnë nga Britania, SHBA-ja, kërkojnë të flasin publikisht, të mbajnë qëndrime, të krijojnë strategji dhe askush nuk i pengon.

Por, kur fillojnë dhe vendosin vulën meqenëse janë anglezë apo amerikanë, në Shqipëri SPAK-u e ka shkelur ligjin, siç është rasti specifik ku na thuhet nga studio ligjore britanike se mbahet pa akuzë në burg edhe këtë që po bën drejtësia do ta shikoni në Strasburg etj.

Studio ligjore që merren me 1001 gjëra që ndoshta nuk e njohin aspak të drejtën penale. Nuk e njohin aspak të drejtën penale sepse po ta njihnin qoftë edhe në dy rreshta, mjafton të pyesësh një penalist në kryeqytet, ligji është i qartë: Kur prish provat shkon në burg.

Dhe, Erion Veliaj ka shkuar në burg me 13 akuza deri tani, 9 prej të cilave për korrupsion dhe po prishte provat dhe e kanë lënë në burg të gjitha nivelet e gjykatave, pavarësisht pretendimeve.

Por, duan një akuzë, të ndiqet në gjendje të lirë dhe shpejt të shkojë akuza në gjykatë.

Dardha e ka bishtin mbrapa!

Shpejt në gjykatë që pastaj të thuhet që provat u mblodhën dhe Erion Veliaj duhet të jetë i lirë, apo të thonë se ja drejtësia nuk e bëri punën e saj tamam në afat, në rast se kërkohet shtyrje e hetimit 6-mujor.

Këto janë pjesë e strategjive, thelbi është në një pikë tjetër.

-Si mund të vijë një studio ligjore dhe një studio lobimi nga jashtë dhe të bëjë çorbë gjithë Shqipërinë me qëndrime, me mendime, me veprime, me kritika?

-Po të shkojë një studio ligjore nga Shqipëria në Angli dhe të thotë sistemi në Angli nuk është i mirë? Të thotë pse mbahet një kryetar bashkie padrejtësisht në burg?

-Po sikur të shkojë një studio ligjore nga Shqipëria në Greqi dhe të thotë këto që thonë këta anglezët në BE?

-Çfarë do të ndodhte nëse e njëjta studio ligjore do të shkonte dhe të fliste në Gjermani apo në Itali të tilla broçkulla, se Erion Veliaj mbahet në burg pa akuzë?

Erion Veliaj është arrestuar dhe gjykatat i kanë gjetur korrekte veprimet e bëra nga SPAK-u dhe e kanë mbajtur në burg.

Në Shqipëri Kodi e ka të përcaktuar, Akuza heton, Gjykata verifikon. Gjykata e ka verifikuar, e ka vlerësuar dhe në fund ka dhënë vendimin.

Tani vijnë disa të huaj dhe i vërsulen SPAK-ut bashkë me ca media të mjera, ndërkohë që BE del hapur dhe thotë që ky institucion është në rrugën e duhur dhe këto media e këto studio ligjore nuk e kanë bërë këtë as për Vangjush Dakon, as për Ilir Beqajn, as për dhjetëra të tjerë, por tani që ndodhi rasti “Veliaj” le të hidhet në erë. Le të digjet reforma në drejtësi, më mirë të shkatërrohet fare sesa të ketë institucione të pavarura që mund të veprojnë dhe të luftojnë korrupsionin.

Reforma, siç e theksuam më lart, mund të ketë probleme, drejtësia patjetër, por duhen korrigjuar, si rasti i kapjes së Gjykatës së Lartë nga njerëzit e PS-së që janë ndikuar nga Edi Rama dhe këtë e ka deklaruar “këshilltari kryesor i Ramës”, Mero Baze.

Patjetër që ka nevojë. Kemi një Gjykatë Kushtetuese të turpshme, por kemi dhe një SPAK institucional që lufton në zbatim të ligjit dhe në zbatim të Kodit të procedurës penale.

Erion Veliajn në burg e mban ligji, nuk e mban SPAK-u.

Nuk mund të vijnë anglezë e amerikanë dhe të bëjnë Maliqin mbi ligjin, sepse kanë qenë qytetarët amerikanë dhe britanikë, taksapaguesit e tyre, që kanë financuar reformën në drejtësi, që të bëhet betejë për luftën ndaj korrupsionit.

Dhe, tani ato para që kanë dhënë qytetarët, vijnë e marrin kompani lobiste, kompani ligjore, mbushin xhepat dhe krisin e ikin, siç ndodhi me lobistin e PD-së në SHBA, siç ndodhi me konsulentët e fushatës, siç ndodh me studiot e tjera ligjore që kemi dëgjuar në vazhdimësi, vijnë e marrin një tufë me para dhe pastaj shikojnë punën.

Por tani jo vetëm kanë ardhur, jo vetëm që flasin, por duan të shkatërrojnë reformën që të dalë Erion Veliaj nga burgu, ndërkohë që ka 13 akuza nga të cilat 9 janë për korrupsion./ CNA

 





Lajmet e fundit nga