"EU Reporter", në aksion për pastrimin e figurës së Veliajt/ Gazetari Isa Myzyraj zbulon përgjigjen e kryeredaktorit

3 Korrik 2025, 09:59, Aktualitet CNA

"EU Reporter", në aksion për pastrimin e figurës

Pas publikimit të një artikulli nga "EU Reporter", ku theksohej se kryebashkiaku i Tiranës mbahej në burg pa akuzë, pas reagimit nga CNA dhe nxjerrja e të dhënave apo komenteve që bënte Inteligjenca Artificiale, gazetari i “Ora News”, Isa Myzyraj, i është drejtuar me letër Colin Stevens, botuesit dhe kryeredaktorit të "EU Reporter".

Gazetari Isa Myzyraj e ka pyetur kolegun e tij Colin Stevens, i cili i është përgjigjur se nuk është një shkrim gazetaresk, nuk është investigim, nuk është shkrim profesional, është çuar në redaksi nga një studio ligjore.

Pra, vetë botuesi dhe kryeredaktori i "EU Reporter" pranon se ky shkrim nuk ka lidhje me gazetarinë, investigimin, por është thjesht një PR i bërë për Veliajn, i cili më datë 8 korrik ka seancën në Gjykatën e Lartë dhe ka nisur luftën ashtu siç ka bërë më herët pas arrestimit ndaj tij, një fushatë sulmesh mediatike ndaj prokurorëve, duke përdorur mediat e paguara nga inceneratorët apo ato të paguara prej tij dhe vëllait të tij Arbër Veliaj.

Më poshtë gjeni shkrimin e Isa Myzyrajt dhe përgjigjen e botuesit dhe kryeredaktorit të "EU Reporter":

Më 30 qershor 2025, portali "EU Reporter", me seli në Bruksel, publikoi një artikull me titull:

“Erion Veliaj, Mayor of Tirana, held without charge for past five months”, një titull që ngrinte pretendime të rënda për ndalimin pa akuza të ish-kryetarit të Bashkisë së Tiranës, ndërkohë që çështja ndaj tij ndodhet ende në hetim aktiv nga SPAK-u dhe në duart e drejtësisë shqiptare.

Në përgjigjen e tij zyrtare me e-mail, Colin Stevens, botues dhe kryeredaktor i "EU Reporter", pranoi se:

“Artikulli nuk ishte rezultat i një hetimi të pavarur nga redaksia jonë. Ai përbëhej nga një letër e hapur nga nëna e z. Veliaj, e shoqëruar me një raport ligjor të përgatitur nga studioja ligjore Mishcon de Reya.”

Në thelb, artikulli i publikuar si një tekst informues nuk përmbante asnjë burim të verifikuar në mënyrë të pavarur nga vetë media. E pyetur nëse kishte kërkuar një reagim nga SPAK-u apo gjykatat shqiptare për të ofruar një paraqitje të balancuar të ngjarjes, përgjigjja ishte:

“Jo, nuk iu drejtuam institucioneve shqiptare për koment në atë fazë.”

Kjo është një shkelje serioze e parimit bazë të balancës dhe verifikimit të fakteve, thelbësor për çdo raportim etik në gazetari. Kur një media publikon pretendime të rënda pa dëgjuar palën tjetër, ajo nuk ndihmon në informimin e publikut, por ndikon drejtpërdrejt në perceptimin e një procesi gjyqësor që ende nuk ka marrë formë përfundimtare.

Legjitimimi përmes emrit të një studioje avokatie

Në përpjekje për të justifikuar publikimin, Stevens shkruan:

“Informacioni na u ofrua nga Mishcon de Reya, një nga firmat më të njohura ligjore në botë për të drejtat e njeriut. Kjo na dha siguri për kredibilitetin e shqetësimeve të ngritura.”

Por reputacioni i një studioje avokatie nuk mund të zëvendësojë standardet themelore të verifikimit gazetaresk.

Avokatët përfaqësojnë interesat e klientit, jo të së vërtetës objektive dhe çdo pretendim i tyre duhet t’i nënshtrohet shqyrtimit profesional nga gazetarët.

Një letër emocionale në vend të gazetarisë

Pjesë qendrore e artikullit ishte letra e nënës së Erion Veliajt, një tekst emocional që apelon ndaj publikut për mëshirë dhe ndërhyrje. E pyetur nëse u diskutua etikisht ndikimi i këtij publikimi në një proces ende të hapur gjyqësor, "EU Reporter" thotë:

“Po, pati diskutim redaksional. Vendosëm ta botojmë duke besuar se interesat publike për të drejtat e njeriut dhe proceset gjyqësore tejkalonin shqetësimet.”

Por një letër nga një familjar nuk përfaqëson as investigim, as analizë dhe as raportim. Në mungesë të burimeve alternative, kjo shndërrohet në instrument presioni publik ndaj sistemit të drejtësisë./ CNA