E fundit!

12:57 Aktualitet

“F*ck you”/ PDE "shuplakë" Ramës: Sheshi duhet dëgjuar, jo fyer

Partia Demokratike Europiane ka reaguar pas intervistës së...

Kalendar historik/ Çfarë ka ndodhur më 12 shtator

12 Shtator 2023, 15:22, Aktualitet CNA

1940 - Në shpellën Lasko në Francë zbulohet një koleksion i jashtëzakonshëm pikturash prehistorike

83 vite më parë pranë Montinjak të Francës, 4 adoleshentë zbuluan rastësisht në një shpellë një koleksion të rrallë pikturash prehistorike. Veprat murale 15.000-17.000-vjeçare, të përbëra kryesisht nga imazhe kafshësh, janë ndër shembujt më të mirë të artit të periudhës së Paleolitit të Sipërm.

Studiuar fillimisht nga arkeologu francez Henri Broil, shpella Lasko përbëhet nga një tunel kryesor 66 metra i gjatë dhe 16 metra i lartë. Muret e shpellës janë zbukuruar me rreth 600 kafshë dhe simbole të pikturuara, të vizatuara në rreth 1500 gdhendje.

Muralet përshkruajnë me detaje të shkëlqyera lloje të shumta kafshësh, përfshirë kuajt, drerët e kuq, drerët, lopët, macet dhe ato që duken të jenë krijesa mitike. Në shpellë ka vetëm një figurë njerëzore:një burrë me kokën e një zogu. Arkeologët besojnë se shpella është përdorur për një periudhë të gjatë kohore si qendër e gjuetisë dhe riteve fetare.

Shpella Lasko u hap për publikun në vitin 1948, por u mbyll në vitin 1963, pasi dritat artificiale i kishin zbehur ngjyrat e gjalla të pikturave, dhe kishin sjellë rritjen e algave mbi disa prej tyre. Një ekspozitë me kopje të muraleve të shpellës Lasko u hap aty pranë në vitin 1983, dhe vizitohet çdo vit nga dhjetëra mijëra njerëz.

Ngjarje të tjera të rëndësishme:

1873 - U shit për herë të parë makina e parë e shkrimit për përdorim personal.

1878 - Nisi procesi gjyqësor për patentën e shpikjes së telefonit. Në të “Bell Telephone Company” kishte ngritur një padi kundër “Western Union Telegraph Company” dhe Elisha Greit.

1918 - Gjatë Luftës së Parë Botërore, në Betejën e Shën Mikelit, personeli i ushtrisë amerikane përdori për herë të parë tanket, të cilat ishin prodhuar në Francë.

1938 - Gjatë një fjalimi, udhëheqësi nazist Adolf Hitleri kërkoi vetëvendosje për gjermanët që banonin në rajonin e Sudeteve në Çekosllovaki.

1943 - Gjatë Luftës së Dytë Botërore, lideri fashist Benito Mussolini u lirua nga një komando parashutistësh gjermanë nga burgu ku ishte mbyllur me urdhër të qeverisë së re italiane, që erdhi në pushtet pas kapitullimit të ushtrisë italiane para forcave aleate.

1953 - Nikita Hrushov u zgjodh sekretar i parë i Partisë Komuniste të Bashkimit Sovjetik.

1974 - Perandori Haile Selasie u rrëzua nga pushteti nga një grushti shteti i ushtrisë së Etiopisë pasi sundoi vendin për 58 vjet rresht.

1984 - Basketbollisti amerikan Majkëll Xhordan nënshkroi një kontratë 7-vjeçare me ekipin e Chicago Bulls. Me të do të fitonte shumë trofe, do të thyente shumë rekorde, dhe do të bëhej basketbollisti më i madh në historinë e këtij sporti./ Përkthyer nga CNA