web counter
LEXO PA REKLAMA!

SHKARKO APP

App Store
Google Play

E fundit!

x

Dhunimi barbar i Egli Progës/ Gjykata e Korçës përfshihet në skandal, ndryshohet akuza për autorin

13 Gusht 2024, 14:08, Aktualitet CNA
Dhunimi barbar i Egli Progës/ Gjykata e Korçës përfshihet
Egli Proga pak minuta para ngjarjes së rëndë

Vrasja e 42-vjeçarit Egli Proga në Pogradec, që ndodhi të shtunën e 10 gushtit, ngre shumë pikëpyetje, që nga ndihma e dhënë në vendngjarje dhe deri te hetimet për personat e përfshirë.

Fillimisht u raportua në media se viktima u gjet i rrëzuar në rrugë në gjendje të dehur dhe më pas ndërroi jetë në spital nga frakturat. Mbrëmjen e 10 gushtit, policia nuk dha asnjë njoftim zyrtar për ngjarjen, duke e anashkaluar atë, edhe pse u raportua nga të gjitha mediat në vend. 

Të dielën e 11 gushtit reagoi policia, me më shumë se 12 orë vonesë, ku njoftoi se ngjarja kishte ndodhur në lagjen nr. 1 në Pogradec, "gjatë një konflikti për motive të dobëta". Sipas policisë, "Denis Meçe M., 29 vjeç, dyshohet se jashtë ambienteve të një lokali është konfliktuar fizikisht me shtetasin E. P., 42 vjeç, i cili gjatë konfliktit fizik është rrëzuar në tokë pa ndjenja dhe për pasojë ka ndërruar jetë".

Pra, policia, jo vetëm që nuk njoftoi në kohë, por e raportoi si një konflikt fizik për motive të dobëta, ndërkohë që nga hetimet rezultoi se kemi të bëjmë me një dhunë barbare që rezultoi vrasje. 

Madje, kalimtarë të rastit në vendngjarje treguan për CNA se 42-vjeçari u dhunua barbarisht mes qytetit dhe kishte plagë në trup dhe gjymtyrë të thyera. Të njëjtët persona u shprehën se ai u la për më shumë se 30 minuta në rrugë dhe askush nuk ndërhynte. Madje edhe ambulanca erdhi me vonesë. Një ndihmë e shpejtë ndoshta mund t'i kishte shpëtuar jetën 42-vjeçarit. Këtu lindin edhe dyshimet për fshehje të ngjarjes dhe mosveprim në kohë të bluve të Pogradecit. Pas njoftimit të policisë, sërish pati heshtje.

24 orë më vonë, mëngjesin e së hënës së 12 gushtit, reagoi drejtori i Përgjithshëm i Policisë së Shtetit, Muhamet Rrumbullaku, i cili pas dyshimeve urdhëroi inspektim në Drejtorinë Vendore të Policisë Korçë, lidhur me ngjarjen në qytetin e Pogradecit, ku u vra 42-vjeçari. Rrumbullaku urdhëroi Drejtorinë e Standardeve Profesionale për kryerjen e vlerësimit të zbatimit të detyrave të efektivëve të Komisariatit të Pogradecit lidhur me ngjarjen. Ende nuk ka një njoftim zyrtar se çfarë është bërë me vlerësimet e punës së efektivëve, edhe pse ka 4 ditë që ka ndodhur vrasja. 

Skandali vijon më tej me ndryshimin e akuzës mbi 28-vjeçarin Denis Meçe 

Në njoftimin e policisë të datës 10 gusht u theksua se mbi të riun rëndonte vepra penale “Vrasja me dashje”. Ndërkohë për 3 personat e tjerë: Voltan Shulku, Arian Manellari dhe Leonidha Guçe rëndojnë akuzat "Moskallëzim krimi", dhe "Veprime që pengojnë zbulimin e së vërtetës". Këta të fundit kanë qenë të pranishëm kur ka ndodhur ngjarja dhe nuk kanë kallëzuar krimin duke penguar zbardhjen e së vërtetës.

Por akuza mbi të riun Denis Meçe ka ndryshuar. Prokuroria nuk e akuzon atë për "Vrasje me dashje”, por për "Vrasje nga pakujdesia", një vepër penale kjo që parashikon më pak vite burg. 

Gjithçka duket qartë në vendimin e sotëm të Gjykatës së Korçës. 

Në seancën e sotme gjyqtarja Luljeta Kole pranoi kërkesën e prokurorisë për masën e sigurisë "Arrest në burg" për autorin. Rrjedhimisht edhe akuzën që rëndon mbi të, duke mos kërkuar hetime më të thelluara në lidhje me ngjarjen e rëndë, ku ka dyshime se 42-vjeçari u dhunua qëllimisht në mënyrë barbare nga Meçe, dhe nuk ishte ngjarje nga pakujdesia. 

Gjoba që Egli Proga nuk i pagoi Denis Meçes

Në media është raportuar se Denis Meçe i kishte vënë “gjobë” viktimës, duke i kërkuar atij xhiron ditore të lokalit të tij. Këtu ka lindur edhe përplasja mes tyre.

Por, viktima refuzoi që t'i jepte para, duke u shprehur se ka për të mbajtur dy fëmijët e tij, dhe në këtë moment është dhunuar rëndë nga Denis Meçe në mënyrë barbare, derisa humbi jetën në spital. Detaj ky shumë i rëndësishëm që është konfirmuar edhe nga afërmi i viktimës për CNA, i cili është shprehur se gjobëvënia dyshohet të jetë motivi që ka çuar Denis Meçen të rrahë për vdekje Egli Progën.

Në këtë kronologji të kësaj ngjarjeje lindin shumë dyshime për mënyrën se si po hetohet dhe vendimin që mori sot Gjykata e Korçës, e cila la në detyrim paraqitje edhe 3 personat e tjerë për moskallëzim krimi. Këta të fundit, edhe pse kishin djeni të ngjarjes së rëndë dhe nuk treguan, qënduan vetëm 3 ditë në qeli dhe u lanë të lirë. Mbi ta është vendosur masa "detyrim paraqitje". 

Kjo ngjarje tregon qartazi problemet që ka sot në Shqipëri sistemi i drejtësisë dhe se sa vështirë është të vihet drejtësia dhe autorët marrin dënimin e merituar. Familjarët bëjnë thirrje vetëm për drejtësi. Ata hedhin akuza mbi policinë, prokurorinë, gjykatën dhe shprehen se po mbulohet vrasja makabre në mes të qytetit liqenor./CNA 





Lajmet e fundit nga