web counter
LEXO PA REKLAMA!

SHKARKO APP

App Store
Google Play

E fundit!

x

Motra e viktimës në Pogradec i "drejton gishtin" policisë: Na thanë u rrëzua, atë e vranë në grup

12 Gusht 2024, 13:27, Kronika CNA
Motra e viktimës në Pogradec i "drejton gishtin"
Jonida Proga

Motra e viktimës Egli Proga, Jonida Proga, ka reaguar për herë të parë në lidhje me vrasjen e vëllait të saj.

Ajo ka folur për CNA duke i drejtuar gishtin e akuzës policisë, e cila sipas saj ka thënë se është rrëzuar.

Jonida Proga është shprehur se ambulanca po ashtu ka shkuar me vonesë në vendngjarje.

Sipas Jonidës, vëllai i saj është vrarë nga disa persona me gjakftohtësinë më të madhe.

Ajo u bën thirrje të gjithë atyre që kanë qenë prezentë dhe kanë parë masakrën që i ishte bërë vëllait të saj të flasin.

Jonida kërkon nga autoritetet që të hetohet me hollësi çdo lëvizje që ka ndodhur ditën e ngjarjes.

Ajo thotë se është vrasje në bashkëpunim dhe nga ana e shtetit që ka pritur, e ka fshehur ngjarjen.

"Më ka marrë djali tezes në telefon dhe më tha urgjent në spital. Vrapoj për atje, futem tek urgjenca, shoh Eglin të shtrirë, të masakruar. Mjekët ishin duke i dhënë ndihmën e fundit, ne s'e pranonim dot që kishte ndodhur derisa mjekët thanë që t’i hiqnin pajisjet. Në shok kam dalë jashtë, pyes policët çfarë ka ndodhur dhe më thonë është rrëzuar. Kanë folur për pjesën që është rrëzuar e deri që nuk e dimë, por jo të thoshin kemi lëshuar njerëz, po mbledhim prova, po marrim kamerat, po pyesim dëshmitarë. Policia ka lëvizur shumë vonë. Do të thotë që kanë qenë në lëvizje nga të tjerët për t'u sjellë kështu. Akoma asnjë gjë, informacioni vetëm është marrë nga mediat. Mirë që s'i lexova që ka vdekur në gjendje të dehur nga rrëzimi, se nuk e di si do ta përballoja.

Dallohej qartazi që ishte dhunuar, por nuk thuhej nga askush që ishte i dhunuar. E kanë vrarë, e kanë masakruar në mes të rrugës në tufë, e kanë braktisur, e kanë lënë. Ambulanca nuk vinte, u vonua gjysmë ore që nga Pogradeci për 2 minuta arrin. Policia nuk pranonte të lëvizte trupin pa ardhur ambulanca, mund të ishte gjallë aty, mund ta shpëtonin.

Egli ishte njeriu më i butë, më i dashur, e donin të gjithë, ishte familjar, ishte në punën e tij. Sa ka mbyllur punën, ishte në qejf, nuk e di çka ndodhur. E kanë kthyer, e kanë provokuar, dhe më pas e kanë vrarë. Është vrasje në bashkëpunim, s'është vetëm një njeri, këtu është në bashkëpunim dhe shteti që ka pritur, e ka fshehur ngjarjen. Nuk ka pasur shirita, makinat kalonin aty, njerëzit pinin kafe.

Kjo është vrasje nga të gjitha anët, me gjakftohtësinë më të madhe, nuk është një vrasës, kjo gjë sapo ka filluar dhe mos guxojë askush të bëhet palë. Kushdo që ka guxuar mos të guxojë më.

Të hetohet çdo gjë në detaje, çdo gjë që ka ndodhur, çdo gjë që është bërë në bashkëpunim, çdo frymë që ka kaluar atje, çdokush që e ka parë, gjithë plehrat që janë fshehur, çdo kafshë që ka guxuar të jetë atje e ka frikë e fshihet. Si thonë që nuk kemi parë gjë kur shohin të masakrohet një njeri i pambrojtur? Kush është i forti këtu kur goditet i pambrojturi?", tha Jonida Proga./ CNA





Lajmet e fundit nga