E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Vrasja në Pogradec, Gentian Çela: Të shkarkohet menjëherë shefi i komisariatit

12 Gusht 2024, 12:04, Politikë CNA

Gentian Çela

Për vrasjen e 42-vjeçarit Egli Proga në Pogradec ka reaguar edhe kreu i PD-së në këtë qytet, Gentian Çela.

Në një deklaratë për mediat nga selia blu Çela kërkoi që të shkarkohet menjëherë dhe të ndiqet penalisht shefi i komisariatit, i cili tentoi të mbulojë krimin për qëllime politike.

Për vrasjen e Egli Progës është arrestuar autori i ngjarjes D. M., 29 vjeç. Mbi të rëndon akuza "vrasje me dashje".

Në prangat e policisë kanë rënë edhe 3 persona të tjerë V. S., 40 vjeç, A. M., 55 vjeç, dhe L. G., 47 vjeç, për veprat penale "Moskallzim krimi", dhe "Veprime që pengojnë zbulimin e së vërtetës".

Fillimisht ngjarja u raportua se 42-vjeçari u gjet i plagosur në rrugë dhe më pas ndërroi jetë në spital. Nga hetimet rezultoi se kemi të bëjmë me një vrasje.

Deklarata e kryetarit të PD-së Pogradec, Gentian Çela:

Pogradeci është tronditur nga vrasja e një 42 vjeçari, babai i dy fëmijëve të vegjël.

I ndjeri Egli Proga ndërroi jetë pas dhunës barbare të shkaktuar nga Denis Meçe, familjar i një drejtuesi të Partisë Socialiste, i njohur për bëmat në korrupsion dhe përfitues tenderash në Bashkinë e Pogradecit.

Deklarata e parë e dalë nga Komisariati i Policisë në Pogradec, fshihte vrasjen e ndodhur në zonën më të populluar të qytetit duke e raportuar si vdekje natyrale.

Falë reagimit, presionit qytetar dhe dëshmitarëve okularë, ngjarja u raportua dhe autori u ndalua.

Partia Demokratike, se pari i shpreh ngushëllimet më të sinqerta familjes se të vrarit.

Në emër të qytetarëve të Pogradecit ne kërkojmë shkarkimin e menjëhershëm të drejtuesit të komisariatit Elton Halili, ndjekjen penale të tij për fshehje të krimit. Institucioni i cili duhet të parandalojë dhe zbulojë veprat penale, nuk mund t’i mbulojë ato për qëllime politike.

Jeta e qytetarëve është më e shtrenjte se interesi i partisë.

Policia e narkoshtetit është sot qartësisht e nënshtruar nga dora e krimit të veshur me pushtet, që merr jetë njerëzish të pafajshëm.

Pogradeci ka nevojë për siguri dhe një polici që mbron qytetarët nga krimi edhe kur kryhet nga njerëzit e pushtetit.

Pogradeci ka nevojë për qetësi, pa banda të mbështetura dhe promovuara që nga kreu i qeverisë prej 3 mandatesh dhe deri të patronazhisti lokal.

Mandatet e qeverisë së Edi Ramës janë kthyer në mandata për njerëzit e thjeshtë dhe leje për të vrarë për njerëzit e pushtetit.

Kjo duhet të marrë fund! O sot, o kurrë!/CNA