Ndryshimet në Urdhrin e Mjekut/ Gjergji: Gjueti shtrigash, UMSH shndërrohet në drejtori

8 Gusht 2024, 19:54, Politikë CNA

Ndryshimet në Urdhrin e Mjekut/ Gjergji: Gjueti shtrigash, UMSH

Kryetarja e Komisionit të Shëndetësisë, Zheni Gjergji

Kryetarja e Komisionit të Shëndetësisë, Zheni Gjergji ka reaguar pas ndryshimeve të bëra së fundmi në Urdhrin e Mjekut pas skandalit që përfshiu Spitalin Onkologjik.

Gjergji ka deklaruar se qeveria e ka shndërruar Urdhrin e Mjekut nga një organizëm të pavarur në një sektor të Ministrisë, me një akt normativ të marrë në errësirë, pa asnjë dëgjesë a konsultim publik.

Sipas saj, kjo që po bën qeveria është gjueti shtrigash.

“Qeveria thellon skemën tinzare të fajësimit të mjekëve për një prej dështimeve të saj më të mëdha në 3 mandate, që është shëndetësia.

Ajo që ishte premtimi më i madh i rilindjes, “shëndetësia falas”, rezuloi sektori ku ndodhën aferat më të rënda financiare, e që i kushtoi shqiptarëve më shumë se kujtdo tjetër në Europë.

Teksa tentuan të mbulojnë mungesën e ilaçeve jetike, mungesën e paisjeve mjekësore, mungesën e shërbimit të Urgjencës, vjedhjet skandaloze me konçesionet, përmes një skandali tek Onkologjiku, duke ja faturuar gjithë fajin ca mjekëve, qeveria tanimë ka një plan të qartë kundër bluzave të bardha.

Një gjueti shtrigash, të cilës ja ka hapur rrugën më nje akt normativ të marrë në errësirë, pa asnjë dëgjesë a konsultim publik.

Qeveria ndërhyn tek Urdhri i Mjekut, dhe këtë organizëm të pavarur të rregulluar me ligj, e anekson, e shndërron në një sektor të Ministrisë.

Urdhëri i Mjekut funksionin mbi një model europian dhe mbi betimin e Hipokratit.

Tani, qeveria kampione e abuzimit me financat për shëndetësinë, me dosje të hapura në SPAK, merr përsipër të shkruajë rregullat etike të mjekëve.

Shkelësja më e madhe e etikës në rajon e në Europë, do përcaktojë vijën e sjelljes për bluzat e bardha.

Qeveria me aktin normativ merr rol vendimtar në karrierën e mjekut, ndëshkimit apo promovimit të tyre, rrit kontrollin ndaj tyre, trysninë e shtypjen, pasi parashikohet deri në heqjen e përjetshme të së drejtës së profesionit.

Atribute këto vetëm të organizmit të mjekëve vetë, ose të gjykatave.

UMSH shndërrohet në një drejtori. Pavarësia e këtij urdhëri është thelbi, arsyeja e ekzistencës, por kjo tanim? bie me aktin e qeverisë”, ka shkruar Gjergji në rrjetet sociale.

Ndryshimet në Urdhrin e Mjekut përfshijnë nga vërejtje, tek pezullimi i shërbimeve mjekësore për një kohë, pezullimi i licencës, gjoba 100 mijë deri në 1 milionë lekë të reja. Penaliteti më i rëndë është heqja e licencës për ushtrimin e profesionit të mjekut./ CNA