E fundit!

19:25 Kronika

Aksident i rëndë në aksin Cërrik-Mollas/ Raportohet për dy viktima

Një aksident i rëndë raportohet se ka ndodhur në aksin Cër...

PD kërkon heqjen e mandatit/ Vullnet Sinaj: Këngë e gjobëvënësve mediatikë, rrogën e dhuroj për të varfrit

7 Gusht 2024, 09:45, Politikë CNA

Vullnet Sinaj

Grupi Parlamentar i Partisë Demokratike do t’i kërkojë Kuvendit të dërgojë në Gjykatën Kushtetuese mandatin e deputetit socialist, Vullnet Sinaj.

Nga verifikimi i të dhënave të thesarit të shtetit, demokratët akuzojnë Sinajn se në kundërshtim flagrant me nenin 70, pika 3 e Kushtetutës, ka përfituar të ardhura nga buxheti i shtetit, në vlerë disa miliona lekë, përmes 9 kompanive të tij private, gjatë periudhës kur ushtron edhe mandatin e deputetit.

Nuk ka munguar edhe një reagim nga vetë deputeti, i cili shprehet se gjobëvënësit mediatikë e përsërisin këtë këngë gjinkallash nga viti 2017.

Ai thekson se surpriza është që thashethemet e portaleve përdoren nga opozita duke i kthyer në akte politike.

Deputeti sqaron se që nga viti 2017 ka dhënë dorëheqje nga administrimi i të gjitha bizneseve dhe se nuk ka përfituar asnjë lek nga buxheti i shtetit.

"Për më tepër, dhuroj prej vitesh rrogën mujore të deputetit për të ndihmuar njerëz në nevojë dhe as më shkon mendja të përfitoj financiarisht nga buxheti i shtetit", shprehet ai ndër të tjera.

Reagimi i plotë:

Mësova me habi dhe jo pa humor, kërkesën për mocion të Partisë Demokratike për heqjen e mandatit tim si përfaqësues i Partisë Socialiste në Kuvendin e Republikës së Shqipërisë.

Gjobëvënësit mediatikë e përsërisin këtë këngë gjinkallash nga viti 2017. Por, surpriza është që thashethemet e portaleve përdoren nga opozita duke i kthyer në akte politike.

Për sa më sipër, deklaroj me përgjegjësi të plotë:
- Në zbatim të nenit 70, pika 3 e Kushtetutës, nga viti 2017 kam dhënë dorëheqje nga administrimi i të gjitha bizneseve të mia, duke iu përkushtuar vetëm politikës.

- Me vendimet e depozituara në QKB në vitin 2017, kam vendosur transferimin e të gjitha kuotave të kompanive, sipas ligjeve në fuqi.

- Nuk kam përfituar nga buxheti i shtetit asnjë lek, as kur nuk kam qenë deputet, as kur jam zgjedhur deputet.

Për më tepër, dhuroj prej vitesh rrogën mujore të deputetit për të ndihmuar njerëz në nevojë dhe as më shkon mendja të përfitoj financiarisht nga buxheti i shtetit./CNA