web counter
LEXO PA REKLAMA!

SHKARKO APP

App Store
Google Play

E fundit!

x

Kaso i kundërpërgjigjet Ramës: Nuk nxore asnjë dokument kadastre për 224 mijë metër katrorë tokë

6 Gusht 2024, 13:54, Politikë CNA
Kaso i kundërpërgjigjet Ramës: Nuk nxore asnjë dokument
Ivi Kaso

Sekretari i Çështjeve Ligjore në PD, Ivi Kaso, iu kundërpërgjigj kryeministrit Edi Rama pas akuzave për pronën në Vuno. 

Kaso theksoi se Rama nuk nxori dot asnjë asnjë dokument kadastre të vjetër apo të ri dhe asnjë dokument shpronësimi si dëshmi se 224 mijë metër katrorë tokë në zonën më turistike dhe më panoramike të bregut të jugut ishin të klanit Rama.

"Ai tregon në Google Maps se ku është ‘Maja e Kolekajve’, për të dhënë përshtypjen se është larg nga deti, por nuk tregon asnjë nga hartat që kanë përdorur kushërinjtë e vet, dhe e ndjera nëna e tij palë në gjyq madje as Gjykata e Apelit për të pozicionuar pronën", u shpreh ai. 

Kaso i bëri thirrje SPAK-ut që të nisë hetimet për këtë çështje. 

Deklarata e plotë:

Kryeplakut të Surrelit dhe piratit të Gjipesë i ka djegur shumë denoncimi i medias dhe Partisë Demokratike për vjedhjen e radhës, kësaj here si ‘kryeministër strategjik’.

Në zbatim të porosisë së ‘kolegut’ të tij në SPAK, ai ka bërë një punë të paqme ‘intelektuale’ për të fshehur krimin, por në vjedhje gjithmonë ngelet një këmbë jashtë. Sidomos kur hajdutët janë mbi 2 metra.

Në një deklaratë që zgjatej shumë, Edi Rama mundohej të mbulonte diellin me shoshë, por në fakt binte brenda me të dyja këmbët. Siç bën zakonisht, ai citonte veten, por asnjë dokument kadastre të vjetër apo të ri, dhe aq më pak ndonjë dokument shpronësimi nuk nxori dot si dëshmi se 224 mijë metër katrorë tokë në zonën më turistike dhe më panoramike të bregut ishin të klanit Rama.

Në këtë mënyrë ai pranon se nuk ekziston asnjë akt regjistrimi kadastral që të faktojë se toka prej 224 mijë metër katrorë në zonën më panoramike dhe më turistike të bregut është e gjysh Petros dhe baba Pilos. Po kështu ai pranon se nuk ekziston asnjë akt shpronësimi të 224 mijë metër katrorë toke të Petro dhe Spiro Kolekës që të provojë se kjo tokë ka qenë ndonjëherë e tyre.

Rama lodhet shumë për t’i mbushur mendjen vetes se edhe familjarët po ‘i hanë kumbulla pas shpine’, por nuk lodhet fare duke dezinformuar.

Aty ku thotë se qeveria e tij ka miratuar ligjin e pronave, i cili nuk e njeh vendimin e gjykatës si dokument orgjinë, mashtron. Ky parashikim ligjor është futur qysh në vitin 2006, me një amendim të ‘qeverisë Berisha’.

Ai tregon në Google Maps se ku është ‘Maja e Kolekajve’, për të dhënë përshtypjen se është larg nga deti, por nuk tregon asnjë nga hartat që kanë përdorur kushërinjtë e vet, dhe e ndjera nëna e tij palë në gjyq, madje as Gjykata e Apelit, për të pozicionuar pronën.

Vetëkuptohet se Rama fsheh hartat se i del në shesh maja e mashtrimit.

Ai thekson me forcë faktin që është pyll dhe kullotë, ndërkohë që zëri kadastral i të gjitha pronave aty, sipër dhe poshtë rrugës deri në det, është pyll dhe kullotë.

Edhe këtu devijon dhe gënjen sepse, edhe nëse janë pyll dhe kullotë, nuk do të thotë se janë larg bregut. Shumë prej resorteve në bregdetin e Jugut janë ndërtuar pikërisht aty ku më parë kanë qenë pyje dhe kullota.

Në 224 mije metër katrorë tokë të marrë nga Rama, nëpërmjet nënës së tij të ndjerë apo Endrit, mbi 13 hektarë sipas VKM janë poshtë rrugës kombëtare, pra afër detit. Ajo që dihet është se në të gjithë shtrirjen e bregut 13 hektarë poshtë rrugës nacionale Vlorë-Himarë, të kategorizuar si kullota e pyje, kanë mbetur te kanioni i Gjipesë.

Edi Rama mund të angazhohet me fjalor ordineri për të mbuluar vjedhjet si kryeministër. Me sa duket, ashtu siç u fut, nëpërmjet sharjeve dhe mashtrimeve, edhe do të dalë nga politika. Me ndryshimin e vetëm se u fut duke sulmuar pushtetin e të tjerëve dhe do të dalë duke mbrojtur korrupsionin e vet dhe të familjes biologjike e politike.

Partia Demokratike i ka bërë publike dokumentet dhe i mbetet SPAK-ut që t’i marrë ato dhe të nisë hetimet. Nëse përtojnë, nuk ua mban, apo e konsiderojnë krim intelektual të vështirë për t'u hetuar, apo siç pretendojnë ‘nuk kanë staf’, ua bëjmë ne gati siç kemi bërë me qindra dosje të tjera.

Nëse shpresojnë se do t'ua çojë Taulanti edhe këtë denoncim, është tjetër punë…/CNA 





Lajmet e fundit nga