Berisha, sërish akuza Ramës/ “224 mijë m2 tokë pa asnjë dokument kadastral”

9 Gusht 2024, 14:59, Politikë CNA

Berisha, sërish akuza Ramës/ “224 mijë m2 tokë pa

Kryetari i Partisë Demokratike, Sali Berisha

Kryetari i Partisë Demokratike, Sali Berisha, në një deklaratë për media, ka hedhur sërish akuza ndaj kryeministrit Edi Rama, për marrjen e 224 mijë metrave katrorë tokë në Gjipe.

Në një deklaratë për shtyp, Berisha i ka drejtuar disa pyetje të reja Ramës.

Sipas tij, kjo tokë nuk ka asnjë dokument kadastral dhe asnjë dokument shpronësimi.

Kreu i PD-së paralajmëroi Ramën se do të publikojë dokumente për të faktuar sipas tij plaçkitjen që i është bërë tokës në jug.

Deklarata e plotë:

Pyetje të tjera për Edvin Gjipenë

Edi Rama heshti si fija e barit dhe nuk guxoi të përgjigjet për asnjërën prej 6 pyetjeve asgjësuese lidhur me lumturimin e tij dhe të familjarëve të tij me 224 mijë metra katrorë tokë në zonën më panoramike dhe turistike të bregut, në Gjipe dhe gjirin e saj.

Pavarësisht se ai është lumturuar me këtë tokë, duke mos disponuar asnjë dokument kadastral, që dëshmon pronësinë e familjes së tij nga nëna, mbi këtë pronë dhe nuk disponon asnjë dokument zyrtar të faktojë se kjo pronë i është shpronësuar familjes së tij nga nëna dhe kushërinjve të tij nga regjimi komunist.

Para këtyre pyetjeve Edi Rama preferoi të qëndrojë i heshtur dhe i bukosur, në fakt me heshtjen e tij, ai foli më shumë se çdo gjë tjetër dhe në njëfarë mënyre konfirmoi akuzat me fakte e dokumente të medieve investigative dhe PD-së, se kemi të bëjmë me një zonë të madhe të 224 mijë metër katrorë tokë në zonën më panoramike, më turistike të vendit.

Kryeministri Edi Rama

Me gjithë këtë unë përsëri, pavarësisht nga kjo heshtje që në fakt nuk e nderon, por e fajëson, unë jam këtu sot prapë jo për t'i përsëritur pyetjet e para, por për t'i shtuar një seri pyetjesh të tjera, në mënyrë që publiku shqiptar të mësojë të vërtetën e plaçkitjes, e kësaj grabitje të 224 mijë metrave katrorë tokë në Gjipe, në zonën më turistike, më panoramike të bregdetit shqiptar.

Ndaj dhe po shtroj pyetjet që vijojnë:

1- Edvin Gjipeja, ju, në dacibaon koprolalike, shkruani se Gjykata e Vlorës njeh pronësinë e Petro dhe Spiro Kolekës mbi 22.4 ha pyll dhe kullota në fshatin Vuno të Bashkisë Himarë (diku lart në rripa malesh, shumë larg vijës bregdetare meqë flasin edhe për vlera dhjetëra milionëshe të truallit të “grabitur”).

Mirëpo ju këto fjalë, këtë pretendim, këto rripa malesh, këto distanca të largëta nga deti, nuk i faktoni me një hartën ku t'u tregosh shqiptarëve se ku vendoset vërtetë kjo parcelë me 224 mijë metra katrorë tokë. Ju nuk e bëni dot këtë, sepse mediat investigative kanë gjetur se, kjo tokë që ti pretendon se vendoset shumë larg nga vija bregdetare dhe lart, lart në rripa malesh, në fakt vendoset poshtë, poshtë dhe zbret gjer buzë detit.

13.1 hektarë të kësaj toke të grabitur janë ndën rrugën automobilistike Vlorë-Himarë dhe madje thuhet se zbresin gjer buzë ujit.

Por ju përsëri nëse keni kurajë dhe guxim nxirreni para publikut hartën, sepse ne do të nxjerrim dokumente. Po të paralajmëroj, do të nxjerrim dokumente që faktojnë vendndodhjen e tokës që po plaçkitet.

2 – A ke ndonjë dokument zyrtar ku të shkruhet se sipërfaqja prej 224 mijë metrave katrorë tokë në Gjipe është pronë e gjyshit tënd Petro Koleka dhe vëllaut të tij, baba Pilos se ata e kanë blerë atë tokë?

3 – A mundet një shtetar, në rastin tënd mender shtetar, të marrë 224 mijë m2 tokë pa asnjë dokument kadastral, se i përkasin atij dhe klanit të tij, si trashëgimi dhe pa asnjë dokument zyrtar për shpronësimin e saj?

Ju mashtruat përsëri publikisht kur pretenduat një ndryshim ligjor për mosregjistrimin e pronave me vendim gjykate, ndërkohë që ai ndryshim datonte në vitin 2006.

Edi Rama, shqiptarët presin përgjigje nga këto pyetje sepse, sepse në një mënyrë apo një tjetër kjo është vjedhja shtetërore, qeveritare më e madhe në historinë e vendit për qëllime private, personale./ CNA