E fundit!

10:38 Kulturë

Ndahet nga jeta mjeshtri i humorit, Todi Llupi

Ndahet nga jeta në moshën 78-vjeçare mjeshtri i humorit To...

FBI të arrestojë ish-kryeprokurorin/ Zbardhet kërkesa e Arben Krajës për Adriatik Llallën

21 Shtator 2022, 11:27, Aktualitet CNA

FBI të arrestojë ish-kryeprokurorin/ Zbardhet kërkesa e Arben

Ish-kryeprokurori Adriatik Llalla u arratis në kohën që pritej të shpallej vendimi i Gjykatës pas akuzave të SPAK-ut në lidhje me pasurinë.

Për arrestimin e Llallës, kreu i SPAK-ut, Arben Kraja, dhe prokurori i çështjes kishin kërkuar që të ndërhynte edhe FBI-ja.

Kjo e dhënë ka dalë së fundmi, nga e-mailet sekrete që i janë dërguar ish-kreut të Policisë së Shtetit nga një zyrtar OPDAT, indentitetin e të cilit nuk po e publikojmë.

Në e-mailin dërguar Nanos zyrtari i huaj shkruante se ka biseduar me Atasheun Ligjor të FBI-së dhe se i kishin ofruar të ndihmonin në gjetjen e zotit Llalla.

“Tema e dytë që doja të diskutoja me ju është Adriatik Llalla. Unë fola me Atasheun Ligjor të FBI-së dhe më ofruan të ndihmonin në gjetjen e zotit Llalla. Për të filluar, ata kanë nevojë për një letër nga ASP që kërkon ndihmën e tyre, plus identifikuesit e tij, emrat e anëtarëve të familjes, vendndodhjen e fundit të njohur, adresat e mëparshme në Shqipëri dhe jashtë saj, dhe çdo pistë tjetër që mund t'i ndihmojë ata ta gjejnë atë. Unë fola me Arben Krajën dhe prokurorin për këtë çështje dhe ata të dy janë të interesuar që FBI-ja të ndihmojë në gjetjen e zotit Llalla”, thuhet në e-mailin dërguar Nanos.

Kujtojmë se Llalla në dhjetor të vitit 2021, u arrestua nga Interpoli në Itali.

Dhe në shkurt të këtij viti, Gjykata e Posaçme ka pranuar kërkesën e SPAK-ut për pushimin e çështjes ndaj Adriatik Llallës për fshehje pasurie.

Ish-kryeprokurori ka qenë nën hetim për fshehje të ardhurash, por duke qenë se ai është dënuar një herë për të njëjtën çështje, SPAK-u kërkoi pushim të këtij hetimi.

Më herët, Apeli i Posaçëm e dënoi Llallën me 2 vite burg për tri vepra penale, përfshirë fshehjen e pasurisë. Gjithashtu, atij ju sekuestruan edhe 11 mijë m2 tokë arë dhe 1 apartament.

Llalla ishte i pari ish-zyrtar i lartë i drejtësisë që dënohej me burg.

Në vitin 2018 Llalla u përfshi në listën e personave “non grata” nga SHBA-ja. Atij dhe familjarëve të tij iu ndalua udhëtimi për në Shtetet e Bashkuara.

Referuar dosjes hetimore të SPAK-ut, ish-kryeprokurori dyshohet të mos ketë deklaruar pasuri në tri episode.

Më konkretisht ai ka fshehur një shumë prej 7400 dollarësh të shpenzuara në SHBA, për lindjen e djalit të tij. Episodi tjetër është një shumë për ndërtimin e një banese, ndërsa episodi i tretë ka të bëjë me disa shpenzime të kryera në Gjermani, për shkollimin e vajzës./CNA.al