web counter
LEXO PA REKLAMA!

SHKARKO APP

App Store
Google Play

E fundit!

x

Ligji për dekomunistizimin/ Godole: Mazhoranaca dhe opozita të pabesueshme, nuk synojnë transparencë

21 Shtator 2022, 08:25, Aktualitet CNA
Ligji për dekomunistizimin/ Godole: Mazhoranaca dhe opozita të
Jonila Godole

Drejtuesja e Institutit për Demokraci, Media dhe Kulturë, Jonila Godole, ka folur për nismat ligjore për dekomunistizimin, për të cilin IDMC, ka hapur dhe një peticion.

Ajo sqaron se nismat ligjore për dekomunistizim nuk kanë munguar, por janë votuar përherë nga një parti dhe kundërshtuar nga tjetra, duke mos arritur një konsensus mes tyre.

Sipas Godoles, Mazhoranca socialiste është e pabesueshme në ‘dëshirën’ e saj për të ndëshkuar ish-Sigurimsit, sa kohë që i ka promovuar ish-bashkëpunëtorët, ish-hetuesit. Nga ana tjetër, edhe opozita mbetet e pabesueshme për sa kohë nuk kërkon hapje dosjesh për eprorët e bashkëpunëtorëve të Sigurimit dhe ‘vetting’ për të gjitha kategoritë e shënuara më sipër.

Reagimi i plotë:

Sa për dijeni, në muajt prill-maj 1992, qeveria e PD ndërmori dy nisma ligjore simbolike që dënonin regjimin e shkuar.

1. Ligji nr.7588 më 7 prill 1992 ndalonte përdorimin e yllit komunist (sovjetik) në flamur, kapele, stemë republike etj,

2. Vendimi i dt.3 maj 1992 mundësonte zhvarrosjen e eshtrave të diktatorit Hoxha nga „Nëna Shqipëri“ në varrezën e Sharrës.

Pra, nismat ligjore për dekomunistizim nuk kanë munguar, përkundrazi. Problematike mbetet që ato janë votuar përherë nga një parti dhe kundërshtuar nga tjetra, duke mos arritur një konsensus mes tyre.

Nismat e tanishme i lexoj më shumë si politikë e ditës, që nuk synojnë as dekomunistizim dhe as transparencë mbi të shkuarën.

Mazhoranca socialiste është e pabesueshme në „dëshirën“ e saj për të ndëshkuar ish-Sigurimsit, sa kohë që i ka promovuar ish-bashkëpunëtorët, ish-hetuesit, ish-gjyqtarët dhe -prokurorët e regjimit komunist në të gjitha institucionet publike vendimmarrëse.

Opozita mbetet e pabesueshme për sa kohë nuk kërkon hapje dosjesh për eprorët e bashkëpunëtorëve të Sigurimit dhe „vetting“ për të gjitha kategoritë e shënuara më sipër.

Portretet e diktatorit Hoxha nuk duhet të shfaqen në hapësirën publike. Kjo është e padiskutueshme! Por censura e lirisë së shprehjes nuk është zgjidhje sot 30 vjet pas rënies së regjimit. Produktet kulturore, shkencore dhe materiale të diktaturës duhet të analizohen dhe kritikohen sipas rastit dhe jo apriori. Demokraci do të thotë të lejosh mendimin e lire dhe ndryshe, edhe kur ai është i lajthitur apo i painformuar. Por liria e shprehjes mbaron kur cënohen dhe denigrohen një person apo një bashkësi personash, kur shpifet pa të drejtë. Kjo duhet parë në mënyrë të diferencuar në të gjtha fushat, jo vetëm në debatin mbi filmat e Kinostudios.

Këto debate nuk sjellin gjë po u zhvilluan bardhezi; e shumta secila nga palët do forcojë pozicionin e vet dhe kaq.

Fakti që asnjë nga këto projektligje nuk u konsultua paraprakisht me grupet e interesit, institucionet dhe ekspertët e pavarur që merren me këto tema, flet shume për mënyrën se si bëhen politikat në Shqipëri.

Gjithsesi mua më mbetet t’i falënderoj mazhorancën dhe opozitën që kanë mbështetur me këto propozime 3 nga 7 pikat e #Peticionit për Dekomunistizim dhe Drejtësi, edhe pse jo në atë formë që do t’i duhej shoqërisë për t’u ndarë nga e shkuara./CNA.al

 





Lajmet e fundit nga