Tensionet Ukrainë-Rusi/ Sa i fortë është pozicioni i NATO-s në Evropën Lindore?

22 Shkurt 2022, 13:13, Blog CNA

Nga Sanya Burgess ?Sky News?

Marrëdhëniet e ngrohta midis Ukrainës dhe aleancës ushtarake perëndimore të NATO-s luajnë një rol kyç në tensionet aktuale midis Kievit dhe Moskës. Aleanca e NATO-s përbëhet nga 30 vende, duke përfshirë Francën, Britaninë e Madhe, Turqinë dhe SHBA-në, shpenzuesit më të mëdhenj në botë sa i përket mbrojtjes. Nëse Ukraina do të anëtarësohej në NATO, ajo do të zgjeronte vijën kufitare që e ndan Rusinë nga aleanca ushtarake e udhëhequr nga SHBA-ja.

Sa baza ka NATO për ta mbështetur ushtarakisht Ukrainën?

Duke folur për Sky News, një zyrtar i NATO-s tha:?Në përgjithësi, NATO ka shumë pak forca të saj të përhershme?.?Kur Këshilli i Atlantikut të Veriut bie dakord të nisë një operacion, anëtarët kontribuojnë mbi baza vullnetare me forca ushtarake. Këto forca rikthehen në vendet e tyre, pasi të përfundojë misioni?- tha ai.

Por çfarë do të thotë kjo?

Aleanca e NATO-s ka aktualisht një forcë prej 40.000 ushtarësh, marinarësh dhe avionësh të gatshëm për t?u mobilizuar në çdo kohë. Trupat e saj luftarake strehohen në bazat që furnizohen nga vendi anëtar i NATO-s ku janë dislokuar. Ato mund të konsiderohen më shumë si ?baza pritëse?, sesa një bazë e drejtuar vetëm nga aleanca.

Forcat e NATO-s po operojnë tashmë në zona kyçe në Evropën Lindore, me 1000 grupe luftarake në Poloni, Letoni, Lituani dhe Estoni, të cilat drejtohen nga Britania e Madhe. Bazat kryesore përfshijnë selinë e trupave shumëkombëshe në verilindje në Poloni, si dhe një seli në juglindje të korpusit shumëkombësh, por edhe selinë e një divizioni juglindor shumëkombësh në kryeqytetin e Rumanisë, Bukuresht.

Në bazat pritëse, janë vendosur gjithashtu edhe mjetet ajrore të NATO-s. Zyrtari i NATO-s që foli në kushte anonimiteti na tha se baza ajrore Amari në Estoni, baza ajrore Siauliai në Lituani dhe baza ajrore Mihail Kogalniceanu në Rumani, janë pikat ku mund të vendosen avionët ushtarakë.

Në rast se tensionet do të përshkallëzohen dhe NATO-ja do të përfshihej drejtpërdrejt në një luftë, aleanca mund të mbështetej tek ushtritë individuale të secilit vend, dhe kjo do të përbënte një forcë totale prej rreth 3.5 milionë njerëzish si personel ushtarak.

Sa shpejt mund të angazhohet NATO në një luftë?

Fuqia ushtarake e NATO-s, përfshin forca të cilat operojnë në nivelin më të lartë të gatishmërisë për të luftuar, me aftësi shumë të mira në tokë, det dhe ajër. Forca e Reagimit të NATO-s (NRF), përbëhet nga 20.000 ushtarakë burra dhe gra.

Një pjesë e kësaj strukture përfshin Task-Forcën e Përbashkët të Gatishmërisë Shumë të Lartë, e cila u krijua nga aleatët për të forcuar mbrojtjen e aleancës, kur Rusia e aneksoi Gadishullin e Krimesë në vitin 2014.

Zyrtari i NATO-s tha se si Task Forca e Përbashkët e Gatishmërisë Shumë e Lartë e NATO-s, ashtu edhe Forca e Reagimit të NATO-s, mund të zhvendosen nga pozicionet e tyre në Poloni dhe Rumani.

Përveç këtyre bazave, NATO ka gjithashtu zyra për të cilat drejtuesit e saj thonë se janë ngritur për të ndihmuar në lehtësimin e vendosjes së shpejtë të forcave në pjesën lindore të aleancës. Këto zyra quhen Njësitë e Integrimit të Forcave të NATO-s, dhe janë të përfshira në planifikim, trajnim dhe stërvitje ushtarake./ Përshtatur nga CNA.al