Meta bllokon zgjedhjet vendore/ Pas arrestimit të Fatos Tushes, 7 Bashki pa kryetar

25 Dhjetor 2021, 09:01, Politikë CNA

Gjykata Kushtetuese me 4 nëntor 2021, vendosi të lërë në fuqi legjitimitetin e zgjedhjeve të 30 qershorit duke rrëzuar kërkesën e Shoqatës së Bashkive që kërkonte konstatimin si antikushtetues të këtyre zgjedhjes.

Por, Presidenti Ilir Meta, nuk e njeh verdiktin e Kushtetueses dhe për pasojë nuk ka ndërmarrë asnjë hap procedurial për të bërë zgjedhjet në bashkitë që janë pa kryetar.

Me anë të këshilltarit për çështjet ligjore Bledar Dërvishaj, Meta zbardhi qëndrimin e tij.

Me 6 Dhjetor 2021 Presidenca ka reaguar në lidhje me vendimin e Gjykatës Kushtetuese të Shqipërisë për rrëzimin e kërkesës për shpalljen antikushtetuese të zgjedhjeve vendore të 30 qershorit të vitit 2019, duke theksuar se gjykata nuk pati vullnet ta zgjidhte këtë çështje përmes juridiksionit gjyqësor kushtetues.

“Gjykata Kushtetuese, për interesa që nuk përkojnë me ato të popullit shqiptar, me këtë vendim hoqi dorë nga ushtrimi i funksionit të saj sublim dhe e shpalli veten jo kompetente, për të mbrojtur të drejtat dhe liritë themelore të shqiptarëve, parimeve dhe vlerave më të larta tona shoqërore e morale mbi të cilat ne si shqiptarë kemi vendosur të ndërtojmë jetën tonë, në një shoqëri me demokraci funksionale”, u shpreh BLedar Dervishaj.

Sipas tij, Gjykata Kushtetuese, si instanca e fundit e ngarkuar me kontrollin e kushtetutshmërisë së akteve apo vendimeve të nxjerra nga organet e pushtetit shtetëror, “nuk përmbushi rolin, misionin dhe përgjegjësitë që Kushtetuta i ka dhënë”.

“Gjykata Kushtetuese, për një çështje kaq të rëndësishme të karakterit kushtetues, nuk e përmbushi misionin e saj sublim, por me vendimin e marrë nuk dha asnjë zgjidhje siç do duhej të bënte, dhe siç interesat më të larta të vendit e kërkonin“, ka thënë më tej, Dervishaj.

Largimi i kryetarit të Bashkisë së Mallakastrës dhe arrestimi i kryetarti të Bashkisë Lushnje, Fatos Tushe nga SPAKA e kanë çuar në 7 numrin e bashkive që drejtohen pa kryetarët e zgjedhur.

Shkodra, Durrësi, Vora, Rrogozhina dhe Dibra janë bashkitëe tjera që aktualisht drejtohen nga kryetarë të emëruar dhe jo të zgjedhur nga qytetarët.

Në këtë listë është përfshirë edhe Bashkia e Lushnjes, pas arrestimit të Fatos Tushes nga SPAK.

Në zgjedhjet e vitit 2019 shkodranët ia besuan Valdrin Pjetrit drejtimin e Bashkisë Shkodër, ai dha dorëheqjen nga marrja e detyrës, për shkak se prekej nga ligji i dekriminalizimit. Për pasojë Voltana Ademi, me mandat të përfunduar kushtetues prej gati dy vjetësh, vazhdon të drejtojë bashkinë më të madhe në Veri të vendit.

Pak ditë pas tërmetit të 26 nëntorit, për shkak të një deklarate të pakujdesshme, kryetarja e zgjedhur e Bashkisë së Durrësit, Valbona Sako, dha dorëheqjen. Ajo u zëvendësua fillimisht në postin e nënkryetares e më pas atë të kryetares nga Emirjana Sako.

Po ashtu, edhe Vora po drejtohet nga një kryetar i pazgjedhur me votë, pas largimit të ish-kryebashkiakut Agim Kajmaku.

Ndërkohë, kryetari i Bashkisë Rrogozhinë, Haxhi Memolla u nda nga jeta dhe kjo solli një tjetër bashki që drejtohet nga kryetar i zgjedhur pa votë.

Dionis Imeraj, ish-kryetari i Bashkisë Dibër, dha dorëheqjen pak javë më parë për shkak të kandidimit të tij për deputet në zgjedhjet e 25 prillit. Aktualisht kryetar i bashkisë në detyrë është Shkëlqim Murrja.

Ndërsa lidhur me bashkinë e Lushnjës, ish-kryebashkiaku Fatos Tushe u arrestua nga policia për shpërdorim detyre dhe falsifikim dokumentesh.

Në vend të Tushes, është emëruar Eriselda Sefa, nënkryetarja e Bashkisë, pasi ka marrë votat e Këshillit Bashkiak./E.S-CNA.al