web counter
LEXO PA REKLAMA!

SHKARKO APP

App Store
Google Play

E fundit!

x

Shënim/ A ka fytyrë Ilir Meta?!

30 Prill 2021, 12:32, Politikë CNA

Nga Skifteri

“Merruni me kutitë, merruni me votat e pavlefshme, mos u merrni me dorëheqjen, mos u merrni me shkarkimin, nuk kam kandiduar në zgjedhje, kam patur vetëm një vilë”.

A ka fytyrë më Ilir Meta të dalë dhe të flasë më përpara shqiptarëve?! 

Në mos si President, të paktën si burrë. Se burri fjalën ka.

Ky ishte njeriu që dominoi fushatën, sidomos javët e fundit duke kërkuar referendum popullor kundër Rilindjes, kundër Kryerilindasit, kundër Kryeministrit të shkarkuar ende në detyrë, pra ky ishte njeriu që bënte fushatë edhe më shumë se Lulzim Basha dhe Monika Kryemadhi për të rrëzuar Ramën nga froni.

Aq shumë sa shkoi deri aty sa të vinte bast me dorëheqje.

Sot Ilir Meta thotë që nuk kam kandiduar.

Tani ose ky është përveçse i çmendur edhe budalla, ose është aq i zgjuar dhe i pafytyrë sa na konsideron të gjithë ne të tjerëve budallenj.

Konsideron budallenj të gjithë shqiptarët që motivoi për të votuar me inat kundër tij, me sjelljen dhe fushatën e tij personale për LSI-në dhe kundër Edi Ramës.

Konsideron budallenj edhe ata gazetarë që i shkojnë në konferencat për shtyp, që kanë dëgjuar me dhjetra herë për betimet se vendi nuk ka nevojë jo vetëm për rotacion, por për përmbysje. 

Dhe tani po kërkon t?i bëjë sërish budallenj duke i kërkuar të kontrollojnë nga e para të gjithë procesin, të shohin pamjet dhe të denoncojnë zgjedhjet, votat e pavlefshme, kutitë, numërimin, duke dhënë të kuptohet se kështu rezultati do të ndryshojë, vetëm e vetëm që të heqë presionin mbi veten.

Aq budallenj, sa mendon dhe ka shpresë se duke përqëndruar gazetarët te denoncimet e partive për një kuti këtu e një kuti atje do të gjejë alibinë që procesi është cënuar dhe se Rama nuk ka fituar 71 vota në mënyrë demokratike.

Edhe pse zgjedhjet janë certifikuar nga i gjithë faktori ndërkombëtar në unison dy ditë më parë, pikërisht pak orë pasi Meta nisi të kërcente dhe ta dridhte duke hedhur baltë mbi zgjedhjet.

Denoncimi i parregullsive në zgjedhje bashkon si Lulin dhe Metën për të mbajtur karriget, jo për të rrëzuar Ramën.

Luli ka nisur punën që me kërkesën për të marrë pamjet e të gjithë VNV-ve të nxjerrë sa më shumë probleme vetëm e vetëm për të fituar kohë, për të shuar zërat dhe zhurmën brenda partisë që kërkojnë largimin e tij tani.

Njësoj si Luli, edhe Meta ka urdhëruar LSI-në që doli vetëm një orë pas Metës që kërkoi rinumërim në disa zona se qënkërkan konstatuar parregullsi, që të kalojë sa më shumë kohë dhe të harrohet cmenduria e tij e fushatës dhe përbetimi për dorëheqje.

E të gjitha këto na bëjnë vetëm të shtrojmë një pyetje: Vertetë i kemi mësuar të na konsiderojnë kaq budallenj?! A kanë fytyrë këta njerëz?/CNA.al





Lajmet e fundit nga