web counter
LEXO PA REKLAMA!

SHKARKO APP

App Store
Google Play

Shpallja "non grata" e Berishës/ Luli Basha rrëfen ndjesitë: U shokova

13 Dhjetor 2024, 10:39, Politikë CNA

Shpallja "non grata" e Berishës/ Luli Basha rrëfen

Lulzim Basha ka folur për shpalljen "non grata" të Sali Berishës dhe përjashtimin që i bëri nga grupi parlamentar pas këtij vendimi.

I ftuar në "MCN TV", Basha tha se ishte tronditur nga vendimi i SHBA-së dhe deklaroi se ai negocoi që Berisha të quhej i pezulluar dhe jo i përjashtuar, pasi amerikanët, sipas tij, nuk e donin as në Parlament.

“Ndjesia e parë kur është publikuar vendimi ka qenë një ndjesi shoku, tronditjeje, e cila vinte për shkak të gjuhës jashtëzakonisht të ashpër dhe të drejtpërdrejtë që përdorej, korrupsion madhor, pasurim i vetvetes, familjarëve, aleatëve, ndërhyrje në procese publike dhe dua të them, po, tronditja vinte në dy aspekte. E para e punës, sepse vetë zoti Berisha kishte investuar në imazhin e një njeriu që luftonte korrupsionin dhe një imazh që PD kishte vazhduar të luftonte në këtë imazh dhe e dyta, vinte pikërisht nga fakti që ky njoftim vinte vetëm javë pas rezultatit të 25 prillit dhe asaj që ne kishim përjetuar si një masakër zgjedhore. Pra, ta them troç, nuk isha i vetmi që mendonim, ne presim të shpallet Rama 'non grata', për gjëra shumë më të rënda, kur na vjen ky njoftim për Berishën. Nëse më pyet për atë ditë ky ka qenë reagimi i parë.

Natyra e vendimit, është e kotë ta mohoj se në ato ditë të para kemi menduar lloj-lloj skenarësh. Natyrisht që kemi pasur komunikimet tona zyrtare, diplomatike, por edhe të drejtpërdrejta, me aktorë të ndryshëm të administratës së atëhershme dhe miq tanët në SHBA. Nga miq të besueshëm, jo vetëm të mitë, por edhe të Berishës, na është thënë që ky është vendim që nuk merret lehtë, nuk merret nga një person i vetëm, nuk merret nga një agjenci e vetme dhe na është përmendur se vendimi shpallet nga DASH, por merret nga 15 përfaqësues agjencish të ndryshme. Pra, si me thënë shoku i ditëve të para i la vend realizmit që përballeshim me një realitet politik, institucional dhe jo me akt të thjeshtë lobimi, siç për fakt të keq, ndoshta nga shoku dhe pastaj nga agjenda që ndoqi është përpjekur ta paraqesë zoti Berisha. Ky vendim është marrë në një procedurë, e cila përfshinte 15 institucione amerikane.

Kërkesa ishte për përjashtimin e tij, madje që të mos hynte as në Parlament. Ndërkohë që duke përdorur të gjithë kapitalin tim politik ndërkombëtar, që nuk ka qenë asnjëherë i paktë apo modest, vendimi që kam komunikuar ka qenë pezullimi i tij nga anëtarësia, deri në zbardhjen e çështjes, që kishte deklaruar se do ta ndiqte në rrugë gjyqësore dhe institucionale. Si një vendim që u përshëndet nga SHBA, reflektonte një kompromis të dukshëm edhe nga pala amerikane, me kërkesën fillestare. Ky duhet të kishte qenë një stacion i mbyllur në atë moment, që do t'i jepte mundësi një partie demokratike, të pashkalafitur nga lufta që nisi zotëria, të bënte betejën e vërtetë të cilën prisnin shqiptarët, për zgjedhjet, korrupsionin, krimin e organizuar, duke lënë mënjanë problemin individual të zotit Berisha dhe duke pritur që investimet që ai do të bënte të jepnin ose jo rezultatin e duhur, por duke i dhënë mundësinë PD-së të vazhdonte misionin. Dhe misioni i një partie nuk mund të jetë kurrë fati personal i një individi, por duhet të jetë fati i shoqërisë dhe vendit”, tha Basha./ CNA





Lajmet e fundit nga