Raporti i inteligjencës britanike/ Këlliçi ngre alarmin: Shqipëria është bërë një vend i pajetueshëm

9 Gusht 2022, 14:45, Politikë CNA

Raporti i inteligjencës britanike/ Këlliçi ngre alarmin:

Deputeti, Belind Këlliçi

Pak ditë më parë, mediat e huaja publikuan raportin, i cili tregonte se 40% e shqiptarëve kanë kaluar kanalin anglez me gomone.

Në lidhje me këtë raport ka reaguar deputeti Belind Këlliçi i cili ngre alarmin, se pavarësisht se Shqipëria nuk është në kushte lufte dhe as nuk vuan nga ndonjë pandemi, prodhon më shumë emigrantë se të gjitha vendet.

Ndër të tjera, Këlliçi shprehet se: “Kur nga një tokë e bekuar si jona qytetarët ikin, në dyfishin e shifrave në raport me vendet e rajoneve në luftë, atëherë Shqipëria është bërë një vend i pajetueshëm. Qeveria është bërë e padurueshme. Vend më të mirë se yni, nuk gjejmë, dhe as nuk duam”.

Deklarata e plotë e Belind Këlliçit

Një raport i inteligjencës ushtarake britanike ka zbuluar se, 40 për qind e atyre që kalojnë Kanalin Anglez, me gomone, drejt Mbretërisë së Bashkuar, janë shqiptarë.

Në periudhën 1 qershor - 12 korrik, 1075 shqiptarë kanë kaluar ngushticën detare mes Francës dhe Anglisë në gomone dhe varka të vogla.

Ajo që duam të theksojmë sot nuk është fenomeni i emigracionit, i vjetër sa vetë bota.

Pyetja që ngremë nga kjo foltore është se, pse Shqipëria, një vend jo në konflikt, dhe që as nuk vuan nga ndonjë epidemi, thatësirë apo krizë tjetër, prodhon më shumë emigrantë se të gjitha ‘vendet e tmerrit’?

Sipas raportit britanik, ndër ata që e kanë kaluar Kanalin Anglez, në një periudhë 6 javore, 13 për qind janë iranianë, 12 për qind afganë, 7 për qind irakenë, ndërsa me 5 për qind janë sirianët dhe eritreasit. Kreun e tabelës e kapin shqiptarët me 40 për qind.

Nëse bëjmë një bilanc të shpejtë të gjendjes së këtyre shteteve rezulton se:

Irani është në një regjim ajatollahësh, një diktaturë fetaro-politike, që shtyp dhe përndjek popullatën duke mohuar çdo liri dhe të drejtë.

Afganistani është rikthyer nën regjimin e talebanëve, persekutorë të kundërshtarëve dhe civilëve, që i kërkojnë popullatës të jetojë sipas kodeve të një islami fanatik. Dhuna sektare dhe aktet e terrorizmit janë pjesë e jetës së përditshme.

Iraku është një vend i dalë nga një luftë e gjatë sektare, shesh-betejë për ndikim dhe pushtet e disa fuqive dhe fraksioneve fetare e politike. Thënë shkurt: një prej vendeve më të pasigurta në botë.

Historia e Sirisë është e njohur për shqiptarët, duke qenë se disa familje u bllokuan në kampet e luftës atje. Vendi është një prej shesh - betejave të ISIS dhe pre e një lufte të gjatë civile dhe sektare.

Eritrea, një vend afrikan është prej kohësh territor i një lufte të përgjakshme në rajonin e Tigrey-t. Sipas një raporti të fundit të OKB, burrat merren me forcë për t’i çuar në luftë. Një vend i dalë nga një konflikt 30-vjeçar me Etiopinë, Eritrea e ka 66 për qind të popullatës nën linjën e varfërisë.

Duke parë këtë tablo tmerri, kur shqiptarët janë të lirë për të lëvizur në Europë, vijnë nga një vend anëtar i NATO-s, kanë një pozicion gjeografik dhe klimë të mrekullueshme, nuk rrezikohen nga konflikte, sëmundje apo uria në shkallë të gjerë, atëherë përse rrezikojnë më shumë se bijtë e këtyre vendeve të sfilitura?

Përgjigja është: duke qenë europianë, duke i njohur dhe përqafuar parimet europiane të garës së ndershme, mundësive të barabarta, shtetit social, solidaritetit etj., dhe duke mos i parë të materializuara dhe të mundshme këto mundësi në atdheun e tyre, shqiptarët largohen.

Duke parë se qeveria manipulon votat, vjedh me inceneratorët dhe fondet e BE, nuk ofron siguri jete për qytetarët, promovon elementët kriminalë në shoqëri, nuk ka prioritet arsimin dhe as shëndetësinë, shqiptari detyrohet të marrë rrugët e botës.

Kur nga një tokë e bekuar si jona qytetarët ikin, në dyfishin e shifrave në raport me vendet e rajoneve në luftë, atëherë Shqipëria është bërë një vend i pajetueshëm.

Qeveria është bërë e padurueshme. Vend më të mirë se yni, nuk gjejmë, dhe as nuk duam.

Qeveri më të mirë, sigurisht që po./ CNA.al