Bardhi, ironi ndaj Ballukut për mbetjet toksike: Me vetëdeklarim, kokaina na u shënuaka miell

28 Gusht 2024, 13:54, Politikë CNA

Bardhi, ironi ndaj Ballukut për mbetjet toksike: Me vetëdeklarim,

Gazment Bardhi

Kryetari i Grupit Parlamentar të PD-së, Gazment Bardhi, ka reaguar në lidhje me deklaratat e zv.kryeministres Belinda Balluku për transportin e mbetjeve toksike drejt Tajlandës.

Pas mbledhjes së qeverisë, Belinda Balluku deklaroi se Autoriteti Portual i Durrësit nuk ka lidhje me transportin e mbetjeve të rrezikshme drejt Tajlandës.

Por Bardhi thekson se sipas logjikës së Ballukut nga ky port mund të kalohet edhe kokainë dhe të shënohet si miell.

Ai hedh akuza duke thënë se prej kohësh Porti i Durrësit është shndërruar në një han pa porta.

"Afera e trafikut ndërkombëtar të mbetjeve të rrezikshme toksike nuk mund të realizohet kurrë pa mbështetjen, mosveprimin apo symbylljen e autoriteteve shtetërore. Edhe përgjegjësia, mosveprimi apo shkelja e ligjit nga entet private nënkupton mosveprim dhe mungesë mbikëqyrjeje nga autoritetet shtetërore që kanë lejuar abuzimin e privatit", u shpreh ai.

Reagimi i plotë:

Porti i Durrësit sipas “tortës Belinda” nuk ka asnjë përgjegjësi se çfarë hyn dhe çfarë del prej tij. Sipas qeverisë kushdo me një vetëdeklarim, fut dhe nxjerr nga Porti i Durrësit çfarë të dëshirojë. Me pak fjalë, me vetëdeklarim kokaina mund të shënohet si miell; helmi mund të shënohet si bimë kurative; makina mund të shënohet si biçikletë; paratë e pista mund të shënohen si letra higjienike.

Në fakt prej kohës Porti i Durrësit është shndërruar në një han pa porta, që nuk kontrollohet nga autoritetet shtetërore, por nga krimi i organizuar. “Torta Belinda” e di më mirë se kushdo tjetër këtë, prandaj dhe nervozizmi, sulmi ndaj medias e opozitës dhe “faji i mbetur jetim” është e vetmja rrugë që i ka mbetur.

Afera e trafikut ndërkombëtar të mbetjeve të rrezikshme toksike nuk mund të realizohet kurrë pa mbështetjen, mosveprimin apo symbylljen e autoriteteve shtetërore. Edhe përgjegjësia, mosveprimi apo shkelja e ligjit nga entet private nënkupton mosveprim dhe mungesë mbikëqyrjeje nga autoritetet shtetërore që kanë lejuar abuzimin e privatit.

Grupi Parlamentar i Partisë Demokratike do të përdor të gjitha mekanizmat e kontrollit parlamentar për zbardhjen e plotë të kësaj çështjeje, duke siguruar qytetarët shqiptarë se nuk do të lejojë në asnjë rast, që për shkak të një qeverisjeje kriminale dhe të papërgjegjshme të Edi Ramës, Shqipëria të jetë në një rrezik permanent për shkak të sasive të konsiderueshme të mbetjeve të rrezikshme brenda territorit shqiptar./CNA