web counter
LEXO PA REKLAMA!

SHKARKO APP

App Store
Google Play

E fundit!

x

Kuvendi vendos më 12 shtator për mandatin e Olta Xhaçkës

27 Gusht 2024, 12:09, Politikë CNA
Kuvendi vendos më 12 shtator për mandatin e Olta Xhaçkës
Olta Xhaçka

Seanca plenare e 12 shtatorit pritet të jetë vendimtare për mandatin e Olta Xhaçkës. 

Në mbledhjen e sotme të Këshillit të Legjislacionit, opozita dhe socialistët ranë dakord që t'i kërkojnë kryetares së Kuvendit, Elisa Spiropali, të përfshijë në seancën më të parë plenare për vendimmarrje nga Kuvendi projektvendimin “Për dërgimin në Gjykatën Kushtetuese të mocionit të jo më pak se 1/10 së deputetëve për konstatimin e papajtueshmërisë së mandatit të deputetes znj. Olta Xhaçka”.

"Ne kemi detyrimin të veprojmë me përparësi, të respektojmë dhe kërkojmë të zbatohet vendimi i Gjykatës Kushtetuese. Përmes një vendimmarrje të detyrueshme të Kuvendit të dërgohet në Gjykatë Kushtetuese", tha kryetarja e Këshillit të Legjislacionit, Dhurata Çupi.

Por socialistët dhe opozita në këtë mbledhje u ndanë në një pikë. Kryetarja e Këshillit të Legjislacionit, Dhurata Çupi, ka hartuar një draftraport me 4 pika ku i sugjeron kuvendit hapat qe duhet të ndërmarrë për zbatimin e vendimit.

Për socialistët nuk ka pse të jetë një raport i tillë pasi ata janë dakord dhe sipas tyre raportin e bën administrata. 

Mandati i Olta Xhaçkës duhet të shqyrtohet pa vonesa në Gjykatën Kushtetuese dhe deputetët janë të detyruar ta dërgojnë atë sa më shpejt, tha Gjykata Kushtetuese në vendimin e marrë më 10 korrik 2024. Kryetarja e Gjykatës Kushtetuese ia bëri të qartë Kuvendit se nuk mund kurrsesi të vërë në diskutim fuqinë detyruese të vendimeve të saj.

Çështja “Xhaçka” është dërguar në Gjykatën Kushtetuese nga opozita e cila pretendon se deputetes socialiste duhet t’i hiqet mandati me argumentin e konfliktit të interesit, për shkak të statusit të investitorit që ka bashkëshorti i saj./CNA 





Lajmet e fundit nga