“Ballkani i Hapur”/ Berisha zbërthen deklaratën e Lavrovit: Projekt ruso-serb, anti-NATO dhe anti-BE

7 Qershor 2022, 20:55, Politikë CNA

“Ballkani i Hapur”/ Berisha zbërthen deklaratën e

Kryetari i Partisë Demokratike, Sali Berisha

Kryetari i Partisë Demokratike, Sali Berisha, ka reaguar sërish me tone të ashpra lidhur me nismën e Edi Ramës "Ballkani i Hapur".

Me anë të një statusi në rrjetet sociale, Berisha e cilëson atë si një projekt destabilizues që ka si qëllim madhor vendosjen e hegjemonisë serbe dhe influencës ruse në rajon.

Duke përmendur deklaratat e ministrit të Jashtëm rus, Sergei Lavrov, ish-kryeministri deklaron se "Ballkani i Hapur" është një projekt ruso-serb, anti-NATO dhe anti-BE.

Sipas tij, Aleks Soros ka përfaqësuar të atin në çdo samit, duke filluar nga samiti i themelimit në Novi Sad e në vazhdim, deri sot në Ohër.

“Sergei Lavrov and George Soros së bashku për 'Open Balkan'!

Miq, Minishengeni i themeluar në Novi Sad si Aleancë trilaterale Beograd-Shkup-Tiranë dhe më vonë për të nderuar George Soros coo-frymëzuesin e tij u quajt 'Ballkani i Hapur'.

Ky projekt destabilizues për rajonin ka si qëllim madhor vendosjen e hegjemonisë serbe dhe influencës ruse në rajon.

Këtë e konfirmoi dje haptas Sergei Lavrov, i cili pas anulimit të vizitës së tij në Beograd për shkak të bllokimit të hapësirës ajrore për avionin e tij nga disa vende anëtarë të NATO-s deklaroi se:

“Natyrisht, ata që po i tërheqin fijet në Bruksel nuk e kanë dashur këtë, nuk kanë dashur që ne t'i shprehim mbështetjen tonë për Beogradin, ndër të tjera, projektin e 'Ballkanit të Hapur'. Tashmë është e qartë për të gjithë se Brukseli, NATO dhe BE-ja duan ta kthejnë Ballkanin në projektin e tyre të quajtur 'Ballkani i Mbyllur'.

Me këtë deklaratë ministri i diktatorit gjakatar Putin vetëm sa konfirmon se 'Ballkani i Hapur' është një projekt ruso-serb, anti-NATO dhe anti-BE. Nuk kam pasur asnjë dyshim se 'Ballkani i Hapur' është projekt ruso-serb. Por me këtë rast rikujtoj gjithshtu se mbështetësi më i fuqishëm i 'Ballkanit të Hapur' është George Soros. Trashëgimtari i tij, Aleks Soros, ka përfaqësuar të atin në çdo samit duke filluar nga samiti i themelimit të tij në Novi Sad e në vazhdim deri sot në Ohër. Në këtë nismë gjeostrategjike anti-BE dhe anti-Nato, Lavrov dhe George Soros janë së bashku dhe kanë qëndrime identike! Sb”, shkruan kryetari i PD-së./ B.A. - CNA.al