web counter
LEXO PA REKLAMA!

SHKARKO APP

App Store
Google Play

E fundit!

x

Akuzat e kandidatit të PD-së për Bashkinë e Kamzës/ Rakip Suli ka shkatërruar sistemin e meritokracisë

17 Janar 2023, 13:55, Politikë CNA

Akuzat e kandidatit të PD-së për Bashkinë e Kamzës/

Kandidati i Partisë Demokratike për kryetar bashkie të Kamzës, Arjan Hoxha, ka hedhur akuza ndaj kreut aktual të bashkisë, Rakip Suli.

Në një deklaratë për mediat, Hoxha është shprehur se PS dhe Rakip Suli kanë shkatërruar sistemin e meritokracisë.

Sipas vendimit nr. 266/15 të 27 dhjetorit të Komisionerit, deklaron Hoxha, Bashkia Kamzë ka emëruar në shërbimin civil, në kundërshtim me ligjin, të paktën 65 nëpunës.

Ndër të tjera ai është shprehur se 14 maji është dita kur administrata do t'u kthehet sërish profesionistëve.

Deklarata e plotë nga Arjan Hoxha

Qeverisja e Kamzës dhe Paskuqanit nuk mund t’i besohet më Rakip Sulit dhe PS. Ka shkatërruar sistemin e meritokracisë. 14 maji, dita kur administrata do t’i kthehet sërish profesionistëve.

Ajo që Partia Demokratike ka përsëritur dhe qytetarët e Kamzës kanë konstatuar, politizimin dhe paligjshmërinë që ka uzurpuar Bashkinë e Kamzës lidhur me punësimet në administratë, tashmë është konfirmuar nga Komisioneri për Mbikëqyrjen e Shërbimit Civil.

Sipas vendimit nr. 266/15 të 27 dhjetorit të Komisionerit, Bashkia Kamzë ka emëruar në shërbimin civil, në kundërshtim me ligjin, të paktën 65 nëpunës.

Për të gjithë këta nëpunës, Komisioneri ka ka kërkuar konstatimin e pavlefshmërisë absolute të akteve të emërimit në shërbimin civil, pasi 59 nëpunës janë emëruar në kundërshtim të hapur dhe flagrant me procedurën e parashikuar në ligj, ndërsa gjashtë nëpunës të tjerë, janë promovuar në pozicione më të larta në shërbimin civil, po në kundërshtim me ligjin.

Prej paaftësisë së Rakip Sulit për të qeverisur Kamzën, qyteti është duke u boshatisur dhe veçanërisht, të rinjtë, janë duke u larguar.

Kur përgjegjës të çështjeve që lidhen me arsimin, rininë dhe sportet apo drejtor i këtij sektori është një person i emëruar, që për meritë të vetme ka teserën e Partisë Socialiste, dhe që emërohet në atë pozicion në kundërshtim me çdo procedurë që parashikon legjislacioni në fuqi për shërbimin civil, nuk ka asnjë mundësi që një i ri të planifikojë dhe të ndërtojë të ardhmen në Kamzë.

Për aq kohë sa në krye të drejtorive më të rëndësishme si ajo e prokurimeve, projekteve dhe investimeve vendosen militantë, dhe jo individë të arsimuar dhe të kualifikuar, pasuria publike nuk mund të mirë administrohet apo të përdoret me eficencë dhe as qyteti nuk mund të zhvillohet nëpërmjet investimeve.

Qeverisja e Kamzës dhe Paskuqanit nuk mund t’i besohet më Rakip Sulit dhe Partisë Socialiste, të cilët duke larguar profesionistët nga administrata publike dhe duke shkatërruar sistemin e meritokracisë dhe ligjshmërisë në pranimin në shërbimin civil, e kthyen administratën publike në një strukturë partiake, duke e kthyer mbështetjen sociale përmes skemave të strehimit dhe ndihmës ekonomike në mjet ndëshkues ndaj të gjithë atyre qytetarëve që mendojnë ndryshe.

Përfytyroni që një ditë të jeni specialist i sektorit të licensave në një institucion dhe ditën tjetër, të zgjoheni si veterineri i këtij institucioni. Gjithkush, madje edhe ne do të dëshironim që kjo të ishte një shaka, por në fakt, ky është realiteti absurd i Bashkisë së Kamzës nën drejtimin e Rakip Sulit, realitet i cili tashmë është provuar nga ana e Komisionerit për Mbikëqyrjen e Shërbimit Civil.

Të dashur qytetarë të Kamzës dhe Paskuqanit, 14 maji është dita kur, përmes votës suaj, paligjshmëria e Kryetarit të zgjedhur vetëm me 6% të votave do të marrë fund.

14 maji është dita kur, administrata e Bashkisë së Kamzës do t’i kthehet sërish profesionistëve, pa kurrë farë dallimi, por vetëm duke u bazuar mbi parimin e meritokracisë dhe me qëllimin e vetëm, ndërtimin e një administrate profesioniste, me integritet moral dhe të paanshme politikisht.

Dhe në të njëjtën ditë që administrata do t’ju kthehet profesionistëve, qytetarëve do t’ju rikthehet Bashkia e Kamzës, bashkë me shërbimet cilësore, nga të cilat do të përfitojë çdo qytetar dhe banor i Bashkisë.

Të dashur qytetarë,

14 maji nuk do të jetë vetëm dita e fitores mbi regjimin e Ramës dhe kujdestarin e tij në Kamzë Rakip Suli, por dhe dita në të cilën do të fitojë Bashkia e Kamzës, nëpunësit profesionistë dhe të gjithë banorët e Kamzës dhe Paskuqanit.





Lajmet e fundit nga