web counter
LEXO PA REKLAMA!

SHKARKO APP

App Store
Google Play

E fundit!

x

Agron Shehaj i bindur: Partia “Mundësia” do të marrë mandat në Korçë

29 Mars 2025, 13:36, Politikë CNA

Agron Shehaj i bindur: Partia “Mundësia” do të marrë

Kryetari i Partisë "Mundësia", Agron Shehaj, zhvilloi një takim elektoral në Korçë, ku prezantoi programin politik dhe kandidatët e kësaj force politike për qarkun.

Në një intervistë për mediat, ai u shpreh se objektivi kryesor i partisë është të sjellë një alternativë të re për qytetarët, duke u fokusuar në ndryshimin real dhe jo thjesht në një rotacion politik mes forcave tradicionale.

“Ky është një projekt politik afatgjatë, që synon të japë një alternativë që të sjellë ndryshimin dhe jo thjesht rotacionin politik në Shqipëri. Ne synojmë, sipas sondazheve të kompanive të huaja, të na japin mesatarisht 10% të votave në rang kombëtar. Kjo mund të përkthehet në një mandat në qarqet ku ka më shumë se 10 deputetë dhe në Tiranë sigurisht se ka më shumë mandate atje. Ne do të luftojmë gjithandej për t’u paraqitur qytetarëve shqiptarë alternativën tonë, kandidatët tanë si p.sh. Ilirjani këtu që është një qytetar i thjeshtë që ka vendosur t’ia dalë me punë të ndershme dhe jo me pazare apo duke shfrytëzuar lidhjet politike”.

Duke iu referuar sondazheve të kompanive të huaja, Shehaj deklaroi se Partia Mundësia parashikohet të marrë mesatarisht 10% të votave në rang kombëtar, çka do të përkthehej në disa mandate në qarqet me më shumë se 10 deputetë, përfshirë Tiranën.

Në lidhje me garantimin e integritetit të votës, Shehaj theksoi se anëtarësia e partisë është e angazhuar për të mbrojtur votën e qytetarëve dhe për të siguruar një proces të drejtë dhe transparent.

“Meqë po më pyet se kush do ta mbrojë votën, këtu kemi një pjesë të anëtarësisë së Partisë Mundësia që unë të garantoj që do ta mbrojnë votën e qytetarëve shqiptarë”.

Shehaj foli edhe për largimin e disa kandidatëve të Korçës nga gara, duke e konsideruar këtë një sfidë të zakonshme për një parti të re. Ai vuri në dukje se mbështetësit e Partisë Mundësia janë të vetëdijshëm për sakrificat që duhen bërë në një projekt afatgjatë politik dhe se tërheqja e disa individëve nuk ndikon në forcën e lëvizjes.

“Kandidatët e Partisë Mundësia që pretendojnë se do fitojnë që të bëhen deputet, sipas sondazheve gjithmonë, sepse unë mund të them që mund të fitojmë 140 mandate apo edhe 71, të jemi realistë, kandidatët e Partisë Mundësia që janë 10-15, mund të themi dhe 20. Pjesa tjetër, të gjithë kandidatët e tjerë janë shumë të rëndësishëm, unë i falënderoj shumë, por janë mbështetës të kandidatëve që kanë mundësi të zgjidhen. Të jesh mbështetësh i një partie të re, që ka një projekt afatgjatë, ku je i vetëdijshëm që thjesht do japësh dhe sakrifikosh, është shumë e vështirë. Po disa prej tyre kanë vendosur të mos jenë pjesë e listës, por ne kemi me dhjetëra, mijëra mbështetës dhe është më se normale që nga 180 nga ata që janë mbështetës dikush mund të kthejë mendje, nuk është çudi.”

I bindur për suksesin në Qarkun e Korçës, Shehaj prezantoi Ilirian Agollin si deputetin e ardhshëm të Partisë Mundësia. Sipas tij, Agolli përfaqëson modelin e ri të politikanëve që duhet të dominojnë skenën shqiptare.

“Absolutisht po! Hajde të të prezantoj deputetin e ardhshëm të Partisë Mundësia. Ilirian Agolli është deputeti i ardhshëm i Partisë Mundësia i Qarkut të Korçës. Nuk ka djalë më të mirë dhe që mund të përfaqësojë më mirë qytetarët korçarë në parlamentin e ardhshëm. Është shembulli që duhet të japim në Shqipëri”.

Fushata e Partisë Mundësia vijon me intensitet, ndërsa mbetet për t’u parë nëse mbështetja e pretenduar do të përkthehet në vota në zgjedhjet e 11 majit./ CNA





Lajmet e fundit nga