Programi i koalicionit “Djathtas për Zhvillim”/ Spahiu: Të ndryshojmë Kushtetutën

28 Mars 2025, 20:24, Politikë CNA

Programi i koalicionit “Djathtas për Zhvillim”/ Spahiu: Të

Ekrem Spahiu, një nga përfaqësuesit e koalicionit “Djathtas për Zhvillim” ka ndarë sot një pjesë të programit elektoral të këtij koalicioni. Në një postim në rrjetet sociale, Spahiu ka shpjeguar tri nga pikat kryesore të këtij programi.

Spahiu thekson se koalicioni synon të ndërmarrë reforma të mëdha në në fushën institucionale dhe kushtetuese.

Pika kryesore e programit zgjedhor shpreh angazhimin për të bërë ndryshime të Kushtetutës.

Spahiu deklaron se është momenti për ç’bërë rrënimin kushtetues të vitit 2008, që sipas tij prodhoi autokracinë e kryeministrave.

Spahiu u ndal edhe të ndryshimi i sistemit zgjedhor, ku Shqipëria të jetë një kolegj i vetëm dhe jo i ndarë në rajone.

Gjithashtu, Koalicioni synon ndryshimin e ndarjes territoriale të vitit 2015.

“Pjesë e Programit elektoral të Koalicionit “Djathtas për Zhvillim”:

Reforma në fushën institucionale dhe kushtetuese.

Shqipëria e para! Voto

a. Ndryshimi i Kushtetutës

Koalicioni angazhohet që sapo të fillojë punimet Kuvendi, të kërkojë referendum për ndryshime kushtetuese, për të ç’bërë rrënimin kushtetues të vitit 2008.

Marrëveshje që prodhoi autokracinë e kryeministrave dhe eleminoi rolin e kreut të shtetit si garant mbi palët në jetën politike. Me kushtetutën e re do të balancohen pushtetet.

b. Ndryshimi i Sistemit Zgjedhor

Koalicioni është i vendosur për ndryshimin e sistemit zgjedhor. Ne duam një sistem zgjedhor ku Shqipëria të jetë një kolegj i vetëm dhe jo i ndarë në rajone.

Deputetët të zgjidhen me lista të hapura që qytetarët të marrin në dorën e tyre fatin e jetës politike dhe jo të jetë në dorë të kryetarëve të partive.

c. Reformë e re e ndarjes territoriale dhe administratës lokale

Koalicioni është për ndryshimin e ndarjes territoriale të vitit 2015. Reformë e cila rezultoi e dështuar që u bë për qëllime elektorale dhe jo në shërbim të demokracisë, qytetarëve dhe efiçencës administrative.

Ne propozojmë një ndarje të re administrative të përbërë nga 93 bashki ku në qendrat e mëdha të jenë të ndarë zonat urbane nga zonat rurale në mënyrë që të kemi më shumë efiçencë ekonomike, përfaqësim demokratik dhe specializim të administratës lokale.

Kryefjala jonë është autonomi për pushtetin lokal. Autonomi financiare, autonomi në kompetenca dhe në vendimmarrje.

Shqipëria e para! Voto”,-shkruan Spahiu./CNA