E fundit!

08:09 Kronika

E rëndë në Maliq/ Një person vret efektivin e policisë, plagos 1 tjetër

Një ngjarje e rëndë është shënuar këtë të enjte në Maliq, ...

12 arsye për të mos dalë sot në shesh!

12 Mars 2026, 08:20, Opinione Besart Xhaferri

Nëse dëshiron që Parlamenti të kthehet në zyrë avokatie të grabitësve më sadistë të taksave të shqiptarëve, sot mos eja në shesh, se ata që kanë vendosur të dalin në këtë protestë aty e kanë ndarë mendjen të mos e lejojnë një gjë të tillë.

Nëse mendon se shëndetësia falas është një realitet dhe ti nuk detyrohesh të japësh lekë nën dorë mjekëve dhe infermierëve, por përkundrazi të japin ata ty, nuk ke asnjë arsye të vish sot në shesh.

Po të duket normale që fëmijëve me kancer t’u reduktohen dozat e ilaçeve se paratë do të shkojnë për Kopshtin e Edenit ku frymëzohet Edi Rama për të vjedhur taksat tona, sot mos eja me ne.

Nëse do të jetosh gjithë jetën me qira se ti dhe fëmija yt nuk do të blejnë dot kurrë shtëpinë e parë se Edi Rama pastron në ndërtim paratë e korrupsionit, sot mos u duk në shesh.

Nëse nuk të bën përshtypje se në raport me pagën paguan për naftën dhe ushqimin e strehimin më shumë se çdo qytetar në Evropë, sot mos na u bashko në tubim.

Nëse je dakord që deputetët që kanë hyrë në atë parlament të diktuar nga kartelet e drogës të miratojnë ligje për ty e fëmijët e tu, sot mos eja në protestë.

Nëse je dakord që kjo qeveri të mos japë pashaportën evropiane, por atë të Serbisë së Millosheviçit e Çubrilloviçit, nuk ke pse të na bashkohesh sot para Parlamentit.

Nëse je dakord që shkollat tona të nxjerrin analfabetë funksionalë, nuk ke arsye për të dalë sot në protestë.

Nëse mendon se rrugët i shembi natyra dhe jo babëzia e Edi Ramës që izoloi juglindjen, sot do të ishte mirë që protestën ta shohësh nga televizori se nuk i duhesh atij sheshi.

Nëse je dakord me devizën e Ramës se pa krim nuk ka zhvillim dhe narkoeuro është shpëtimi i ekonomisë, je i lutur të mos dalësh sot në tubim.

Nëse dëshiron që ky vend të lindë fëmijë që nesër të kthehen në ushtarë të krimit të organizuar për të shpërndarë drogë në Evropë, s’ke asnjë motiv që të dalësh në protestë.

Nëse mendon se vota jote vlen të blihet sa një kafshë në pazar të Milotit je i lutur që sot të mos vish në shesh.

Protesta kundër qeverisë që vjedh popullin e vet është privilegj vetëm i atyre burrave e grave që më darkë kanë guximin t’i shohin në sy prindërit dhe fëmijët.

Unë do jem sot para Parlamentit, për vete, për familjen time, për Shqipërinë.