E fundit!

16:22 Aktualitet

Vrasja e policit në Maliq/ Hita: Nëse DVP Korçë do kishte kërkuar ndihmë do ishin marrë masa më të forta

Kreu i Policisë së Shtetit Skënder Hita ka zbarkuar në Kor...

Përfundon edicioni i 8-të i MIK Festival me një sukses të jashtëzakonshëm

14 Korrik 2025, 15:08, Kulturë CNA

Përfundon edicioni i 8-të i MIK Festival me një sukses të

Pas disa ditësh të mbushura me art, emocione dhe tinguj të lartë muzikorë, ka përfunduar edicioni i 8-të i MIK Festival, një nga ngjarjet më të rëndësishme kulturore të verës në Korçë dhe më gjerë. Mbyllja e këtij edicioni u konceptua në dy etapa domethënëse, me një koncert në kishën e vjetër të fshatit Vithkuq, dhe më pas koncerti final në lulishten “Themistokli Gërmenji”, në zemër të qytetit të Korçës.

Ky edicion solli pesë koncerte në një kohë të shkurtër, me një intensitet dhe cilësi të lartë artistike, ku publiku ishte i pranishëm në çdo natë, duke e kthyer festivalin në një përjetim të veçantë shpirtëror dhe kulturor. Artistja Adelina Mula, e cila interpretoi muzikë kishtare për të dytin vit radhazi në MIK, tha se këto vepra të shkruara shekuj më parë vazhdojnë të flasin për shpirtin dhe janë një pasuri e vërtetë që sjellin dritë dhe qetësi te dëgjuesit. Ajo e cilësoi festivalin një ngjarje me rëndësi jo vetëm për Korçën, por për gjithë Shqipërinë, falë pjesëmarrjes së artistëve vendas dhe të huaj.

Përfundon edicioni i 8-të i MIK Festival me një sukses të

“Ky është viti i dytë që unë marr pjesë me muzikë kishtare dhe e kam shumë përzemër. Më pëlqen shumë sepse janë vepra shumë qiellore, vepra që janë shkruar shumë shekuj përpara, dhe përsëri ne na bëjnë mirë për shpirtin. Pesë koncerte në një kohë kaq të shkurtër, me një intensitet të tillë, me një cilësi të këtyre koncerteve ku spektatori u pa në pjesëmarrje dhe duartrokitje, është shumë e rëndësishme jo vetëm për Korçën, por për gjithë Shqipërinë. Kur marrin pjesë, jo vetëm artistë shqiptarë, por edhe të huaj, duke i dhënë bashkëpunimit një lloj tjetër force më të madhe që e bën vetëm muzika, mendoj se ka vlerë shumë të madhe”,-tha Mula.

Ndër risitë e këtij edicioni ishte edhe koncerti në Vithkuq, një vend i zgjedhur me kujdes për të sjellë jo vetëm muzikën, por edhe vëmendjen kulturore dhe turistike. Bajana Çeveli theksoi rëndësinë e promovimit të fshatit dhe traditës së tij, duke shtuar se përveç muzikës, në këtë aktivitet u përfshinë edhe elementë të kulinarisë vendase, të sjella nga gra të zonës, me gatime tradicionale si lakrorë, pispili dhe ëmbëlsira karakteristike.

Përfundon edicioni i 8-të i MIK Festival me një sukses të

“Këtë vit menduam të kemi një risi në Vithkuq për të kuptuar që ai është një perlë. Vithkuqi duhet promovuar dhe pikërisht kjo ishte biseda e Inva Mulës që vitin e shkuar. Menduam ta promovojmë Vithkuqin e kush më mirë se Inva mund ta bëjë një gjë të tillë? Këtu kemi bërë diçka tjetër. Durrësi ka ardhur me gjërat e veta, me traditën që ka ky qytet kryesisht në ëmbëlsira. Në Vithkuq kemi një zonjë që ka një javë që mendon se çfarë gatimesh do të sjellë. Pse jo mos ta sjellim traditën e vjetër në tavolinat tona, për sa kohë këto gra dinë t'i bëjnë këto receta e t'i shpërndajmë. Kemi edhe zonën e Voskopojës e të Pogradecit që kanë ardhur me pispili, lakror, bukë me qiqër”,-tha Çeveli.

Pikërisht këtë synim kishte edhe Inva Mula, ideatorja dhe fryma drejtuese e MIK Festival. Ajo tregoi se dëshironte që tingujt e festivalit të përhapeshin edhe në vende si kisha e Shën Mëhillit në Vithkuq, që për të ishte një zbulim i mrekullueshëm. Sipas saj, çdo ditë e festivalit kishte veçantinë e vet, me koncerte shumëgjuhëshe dhe pjesëmarrje të mbi 100 artistëve nga Shqipëria dhe vende të tjera.

“Ne donim të vinim në Vithkuq pasi ky është një nga fshatrat më të bukur që e rrethon Korçën, e sidomos kjo kisha e Shën Mëhillit që unë e vizitoj për herë të parë. E shihja në fotografi e doja patjetër që të kishim tingujt e Festivalit MIK në këtë vend të bukur. Ju keni qenë dëshmitarë të një suksesi të jashtëzakonshëm në gjithë këto ditë. Çdo ditë ka pasur veçantinë e vet, kanë qenë koncerte të mrekullueshme me më shumë se 100 artistë, me tema e gjuhë të ndryshme. Ne jemi shumë të lumtur për këtë sepse MIK rritet çdo vit dhe ky rrugëtim 8-vjeçar i tij ka dhënë rezultatin e vet”,-tha Mula.

Përfundon edicioni i 8-të i MIK Festival me një sukses të

Edicioni i 8-të i MIK Festival u përmbyll mes duartrokitjesh dhe emocioneve të thella, duke dëshmuar edhe njëherë se muzika ka fuqinë të bashkojë njerëzit, kulturat dhe gjeneratat. Me një program të pasur artistik dhe një përkushtim të jashtëzakonshëm nga organizatorët dhe artistët pjesëmarrës, ky festival u kthye në një udhëtim përmes harmonisë, historisë dhe trashëgimisë shpirtërore të rajonit të Korçës.

Festivali mbylli siparin e këtij viti duke lënë pas jo vetëm kujtime të bukura për artdashësit, por edhe një mesazh të fortë, se muzika, kur lidhet me identitetin dhe frymën e vendit, mund të krijojë ura të reja midis njerëzve dhe brezave, duke i dhënë vlerë çdo cepi të Shqipërisë që merr frymë nëpërmjet artit. Me këtë sukses të radhës, MIK Festival ngjitet edhe më lart në hartën kulturore të vendit, duke e bërë Korçën dhe gjithë zonën përreth një pikë referimi për artin dhe shpirtin shqiptar./CNA