E “sabotoi” fushata elektorale/ “Lojtari i fatit” në stendat e librarive të kryeqytetit

29 Qershor 2025, 11:17, Kulturë CNA

E “sabotoi” fushata elektorale/ “Lojtari i fatit”

Xhovan Shyti

I dalë nga shtypi javë më parë, libri i ri i autorit Xhovan Shyti, me titull “Lojtari i fatit,” sapo ka zënë vend në raftet e disa prej librarive të kryeqytetit.

Sikurse shpjegon z. Shyti vonesa kohore, midis daljes nga shtypi dhe shpërndarjes në pikat e shitjes, ka ardhur për arsye të fushatës elektorale të zgjedhjeve parlamentare të 11 majit 2025.

“Shpërndarjen e librit tim të shtatë “Lojtari i fatit” e shtyva pasi gjykova se motorët zhurmëmëdhenj të fushatës elektorale 2025 do ta eklipsonin vëmendjen e dashamirësve të pakët të librave. Vendosa të pres momentin kur zhurma shurdhuese e motorëve elektoral të fashitej. Besoj se tani është momenti, megjithëse shqiptarët tifoza të politikës, që për fat s’merren fare më librin, do të vijojnë të shtyjnë muajt me “e lagu se lagu”-n e procesin e rezultatit e ndershmërisë së zgjedhjeve”, saktëson autori Shyti.

I pyetur rreth tematikës së librit “Lojtari i fatit,” pas artikulimit të frazës “Gjithmonë e kam patur dhe vijoj ta kem bezdi tregimin e përmbajtjes, pasi e vlerësoj fyerje për libërdashësit, një lloj joshje artificiale për të imponuar blerjen më çdo kusht të veprës”, autori Shyti, veteran i shqueshëm i gazetarisë paskomuniste, shprehet përmbledhtazi:

”Përmbajtja e “Lojtari i fatit” trajton fundin e individit, shoqërive e popullsive pasive, që jetojnë duke pritur e shpresuar tek fati, duke mos kuptuar se vetë pritja e ardhjes së fatit, minimalisht frymëzon me shumicë humbjen e viteve të jetës që rrjedhin në shtratin e vet pa ndikim.

“Lojtari i fatit”, i cili është personazhi qendror i librit është me fat se triumfon një ditë, i troket në portë fati i shumëvitepritur, mirëpo çfarë ndodh me të…?

Përveçse kujtesë historike e viteve të shkuara në paskomunizëm, në tërësinë e vet ngjarja e librit vjen e trajtuar në rrafshin psiko-filozofik. Po ashtu dhe personazhi qendror, fati pritës i të cilit është paralel me atë të shqiptarëve të cilëve pritja e mbërritjes së fatit, mosreagimi ndaj asaj që u ka e i servir politika mashtruese, u ka kushtuar humbje të rënda. Jo vetëm financiare, nga piramidat mashtruese ’96-‘97, por, pse jo, dhe të lirisë e jetës së munguar në demokraci.

S’duhet harruar se me pasivitetin, me shpresën e mbërritjes së fatit, që do na vijë një ditë, për tre dekada kemi kontribuar e po kontribuojmë për demokraturën jo për demokracinë e premtuar në fillimvitet ’90” vlerëson autori, gazetari Shyti./ CNA