Homazh për Gaqo Çakon në 90-vjetorin e lindjes/ Korça nderon “birin e saj” të shquar

12 Korrik 2025, 15:02, Kulturë CNA

Homazh për Gaqo Çakon në 90-vjetorin e lindjes/ Korça

Një mbrëmje e veçantë, e mbushur me emocione, kujtime dhe tinguj të paharrueshëm, u zhvillua në Teatrin “Andon Zako Çajupi” në Korçë, me rastin e 90-vjetorit të lindjes së lirikut të madh të skenës shqiptare, Gaqo Çako. Artistë të njohur nga Shqipëria u mblodhën për të nderuar figurën e tij të jashtëzakonshme përmes një koncerti festiv ku u interpretuan disa nga veprat më të bukura të repertorit të tij vokal.

Nën kujdesin e sopranos së famshme Inva Mula, mbrëmja solli në skenë një homazh të ndjerë, që nuk ishte vetëm muzikor, por edhe njerëzor, i mbushur me vlerësime për kontributin që Gaqo Çako i ka dhënë artit shqiptar ndër dekada.

Inva Mula, organizatore e koncertit dhe një nga zërat më të vlerësuar të skenës ndërkombëtare, ndau me publikun ndjesinë e fortë që e lidh me figurën e Gaqo Çakos, jo vetëm si koleg, por edhe si model në jetën e saj artistike.

"Unë e kam pasur shembull pasi Gaqoja kishte disiplinë, punonte shumë e me seriozitet, njeri që nuk të bënte komplimente nëse ai nuk ishte i bindur që ti ishe e denjë dhe unë sa herë këndoja para tij, ndihesha shumë keq se më dukej sikur asnjëherë nuk do më thoshte 'Të lumtë'. Ia arrita qëllimit, këndova, bëra shumë role me profesor Gaqon. Ishte një njeri shumë i dashur për mua, një njeri që më vlerësoi jashtëzakonisht shumë dhe më dha modelin e artistit. Të bësh këtë koncert homazh në vendlindjen e tij, në Korçë, 90-vjetori i lindjes, mendoj që emocioni ishte i jashtëzakonshëm. Publiku na dha gjithçka, dashurinë e tyre, kujtuan Gaqo Çakon me interpretimet e tij, me madhështinë e tij dhe brenda zemrës kanë menduar 'Gaqo është bir i Korçës'".

Dirigjenti Eno Koço, mik i hershëm dhe bashkëpunëtor i ngushtë i Gaqo Çakos, kujtoi momente nga miqësia dhe karriera e përbashkët, që nisën që në kohët e Liceut Artistik.

"Kemi pasur miqësi të hershme, që në liceun artistik, kemi bërë shumë incizime, shumë koncerte. Kemi qenë në disa turne, në Kosovë, Turqi. Shumë i dashur ka qenë, kishte një dashuri reciproke, por dhe një marrëdhënie muzikore shumë të mirë. Më vjen mirë që publiku i Korçës e respektoi protagonistin kryesor të kësaj mbrëmjeje."

Një tjetër zë i njohur i skenës shqiptare, sopranoja Tatjana Elmazi, që ka qenë edhe studente e Gaqo Çakos, e përshkroi profesorin e saj si figurë udhëheqëse në jetën artistike.

"Jam ngjitur në skenë me emocione të forta. Të jesh studente e Gaqos ka shumë peshë sepse në realitet bëra një karrierë të shkëlqyer falë profesorit tim që ishte njeri i përsosur, korrekt, rigoroz, kërkonte gjithmonë e më shumë. Tani kam përgjegjësi të tjera, të bëj nxënësit të ecin në rrugën e Gaqo Çakos. Sot mbrëmja ishte e mrekullueshme, Inva Mula është e paparë për energjinë dhe talentin që ka. Jam shumë e kënaqur që më bëri këtë ftesë, e falënderoj shumë. Falënderime edhe për korçarët që janë kaq muzikëdashës dhe frekuentojnë gjithmonë këto evenimente të rëndësishme."

Tenori i ri, Xhoiden Dervishi, i ftuar për të interpretuar në këtë koncert, për herë të parë u përball me krijimtarinë e Gaqo Çakos. Ai tregoi se si u ndie kur zbuloi pasurinë e këtij zëri të rrallë.

"Kur më erdhi ftesa në fillim dhe diskutonim për Gaqo Çakon, u futa dhe pashë shumë regjistrime. Kuptova që Shqipëria ka pasur një xhevahir të madh, një diamant që ka ditur ta ruajë, por e ka ruajtur vetëm për Shqipërinë. Ky xhevahir mund të ishte jashtë, në sytë e gjithë botës. Ky ishte një koncert i jashtëzakonshëm, i organizuar nga Inva Mula, koncert me shumë vlera e emocione dhe ka qenë një mbrëmje e jashtëzakonshme."

Mbrëmja përfundoi nën duartrokitjet e gjata të publikut korçar, që jo vetëm nderoi kujtimin e Gaqo Çakos, por edhe i dha zë një trashëgimie të çmuar që vazhdon të jetojë përmes brezave të rinj të artistëve shqiptarë. Korça edhe një herë tregoi se di të vlerësojë bijtë e saj më të mirë, duke i kujtuar me dashuri, dinjitet dhe krenari./ CNA