“Nëse ti më harron”/ Teatri lëvizës “Gjergj Fishta” shkon në Devoll

8 Shtator 2024, 15:22, Kulturë CNA

“Nëse ti më harron”/ Teatri lëvizës

Teatri lëvizës "Gjergj Fishta” vjen në Devoll me shfaqjen “Nëse ti më harron”, një teatër poetik nga autorët më të mëdhenj të poezisë. Rreth 30 poezi të përzgjedhura nxjerrin në pah të gjitha emocionet që përjeton njeriu nën petkun e dashurisë. Mesazhi që përcillet përmes kësaj shfaqjeje shkon për femrat dhe meshkujt, që të mos reshtin kurrë së dashuruari dhe të mësojnë se si të dashurojnë.

Me gërshetimin e poezive më të mira të autorëve botërore, dy aktorët Izabela Doda dhe Xhilberto Gega, sollën doza intrige, dëshire, trishtimi, urrejtjeje e dashurie me performancat e tyre.

Për Xhilberton, lëvizjet e shfaqjeve teatrale janë shumë të rëndësishme për publikun e rretheve, të cilët duhet të mbështeten dhe njihen me produkte të ndryshme artistike si shfaqjet teatrale, ashtu si ndodhi në Devoll me këtë bashkëpunim.

"Gjëja kryesore që ne duhet të përmendim është që ardhja në Devoll, lëvizjet e shfaqjeve teatrale, produksionet që prodhohen dhe del produkti artistik për publikun, çdo gjë prej tyre duhet të lëvizë e duhet të shëtitë. Kur ndodh që teatri dhe çdo produkt artistik po kryesohet në një vend, i cili është larg, në rrethe, që duhet të jenë të përditësuar me çdo produkt artistik që del. Produksionet artistike që nxjerrin shfaqje të tilla të konceptuara në formë që të shëtisin në vende të tjera është diçka që duhet të mbështetet. Fatmirësisht Devolli i hapi dyert direkt sa iu dërgua ftesa për bashkëpunim dhe është një gjë shumë e mirë. Jemi fatlumë sepse çdo shfaqje që mikpritet është festë për ne dhe për publikun."

Aktori tregon detaje sa i përket shfaqjes "Nëse ti më harron", një teatër poetik me 30 poezi të gërshetuara për të përcjellë te publiku emocione të një çifti të dashuruarish, dukë dhënë mesazhin për përkushtim dhe vëmendje mes çifteve.

"Ky është një teatër poetik, 'Nëse ti më harron', janë diku te 30 poezi dashurie të gërshetuara bashkë duke krijuar një ngjarje të dy personazheve tragjikë të një historie dashurie, ku aty dalin të gjitha ngjyrat e mundshme dhe karakteristikat që ka një njeri kur dashuron. Janë dy personazhe, personazhi i femrës dhe i mashkullit, i cili tregon se si ata e shohin dashurinë dhe në fund fare, del se çfarë ndodh nëse ne harrojmë atë që duam, nuk i përkushtohemi dhe nuk i japim vëmendjen e duhur."

Për aktoren Izabela Doda, pjesëmarrja në Devoll është një eksperiencë e re, ashtu si performanca e saj. Kjo shfaqje tregon se një çift lufton për të nxjerrë të mirat e të këqijat e në fund të jenë bashkë.

"Ndihem shumë e mirëpritur, ku së pari Devolli ishte një eksperiencë e re për ne, ashtu si edhe performanca që do japim. Është një performancë poetike, roli i femrës është i ngjashëm me atë të mashkullit në performancë sepse të dy luftojnë dhe mundohen të nxjerrin te njëri-tjetri më të mirën e më të keqen e tyre. Çdokush që e sheh mund të futet thellësisht në atë petkun edhe të aktorit, sepse flet për dashurinë. Është një luftë që fitohet në fund. Të them të vërtetën nuk ka një diferencë, mendoj që të dy e kanë shumë të vështirë, është e bukur dhe sfilitëse, të gjitha ndodhin aty. Me poezitë e përzgjedhura nga autorë të ndryshëm shqiptarë e të huaj vijnë në pah 4 stinët, momenti para njohjes, njohja, zënkat dhe përfundimi me një bashkim që ti e kupton që jeni për njëri-tjetrin."

Nën interpretimin e dy aktorëve Izabela Doda dhe Xhilberto Gega, shfaqja solli emocione të veçanta duke përcjellë mesazhe reflektimi për të vlerësuar më mirë njëri-tjetrin. Në një "luftë", gjithmonë fiton dashuria./ CNA