Rojet e SPAK-ut me ekrane mbyllur

Shumë të vërteta që nuk i thonë në televizionet e tyre dhe vijnë në redaksinë tonë për dhjetëra çështje që ndodhin në Bashkinë e Tiranës, për dhjetëra afera korruptive në qeveri, për skandale nga më të ndryshmet në drejtori, institucione, që ekrani u mbyllet dhe nuk flasin dot një fjalë, sepse nuk i lë Carlo, nuk i lë Irfani, nuk i jep dot Lori dhe soji i tyre

21 Shtator 2024, 10:19, Editorial CNA

Përgjegjësinë nuk e kanë gazetarët që rrinë tek oborri i SPAK-ut, ata raportojnë. Kjo është përgjigjja për çdo fjalë të Sali Berishës apo disa personazheve mediatike që duan të viktimizohen.

Problemi është kur gazetarëve të terrenit u mbyllet ekrani që të thonë të vërtetën.

E pamë tek inceneratori, e pamë te dosja “5D”, e pamë te dosja e fundit e grupit të strukturuar kriminal me inceneratorët në Tiranë, e kemi parë me 5-6 dosje të Veliajt, me teatrin, me hetimin e tij pasuror që askush nuk thotë asgjë, që nga bashkëshortja, nëna e tij dhe vëllai tij, ky i fundit është shpërndarësi i miliona eurove reklama dhe këto media janë përftuese direkte.

Nuk flasin këto media, nuk i trajtojnë këto çështje të SPAK-ut dhe gazetarët që rrinë në oborrin e SPAK-ut nuk mund të çojnë informacione në lidhje me këto gjëra, fakte apo prova, në redaksitë e tyre, sepse ato nuk jepen kurrë dhe ata e kanë kuptuar.

Kjo është e vërteta dhe problemi i vërtetë që ka sot media që duhet të shqetësojë Sali Berishën e disa armiq të tij të vërtetë historikë, dikë e ka mbajtur dhe në prehër, dalin dhe broçkullisin dhe çfarë nuk thonë.

Të vërtetën në fund do ta shikojmë në vendimin e gjykatës, do ta pranojë apo jo Berisha koha do të jetë e gjatë, kurse llumi mediatik i pushtetit që mendon se korrupsioni i Edi Ramës, Erion Veliajt dhe qeverisë së sotme fajin për këto e ka Saliu apo duke trajtuar dosje të tilla në atë mënyrë që atë e bëjnë apo duke keqpërdorur informacione të ndryshme thjesht dhe vetëm po i bëjnë një nder Sali Berishës.

Po tregojnë se me të vërtetë e paskan shumë frikë se ndoshta po u vjen Saliu në pushtet, gjë që nuk duket të jetë e tillë.

Ndaj dhe të dyja palët dhe këta që e sulmojnë Saliun në mënyrë abuzive, që një i përkëdhelur pushteti mund ta quante dhe përndjekje, nuk janë gjë tjetër thjesht instrumente që kanë psikozë të caktuar te Saliu. Dhe fajin nuk e kanë gazetarët që raportojnë nga SPAK-u, por fajin e kanë të tjerë zagarë politikë që nuk janë problemi i medias dhe Saliu, më shumë sesa të shqetësohet për ta, duhet të shqetësohet për të vërtetën në SPAK, sepse shpesh edhe Saliu është po aq gënjeshtar sa dhe këta armiqtë e tij./CNA