web counter
LEXO PA REKLAMA!

SHKARKO APP

App Store
Google Play

LOBIMET NË SHBA/ Milionat e eurove që paguhen prej dekadash nga partitë shqiptare

28 Prill 2025, 12:16, Editorial CNA

LOBIMET NË SHBA/ Milionat e eurove që paguhen prej dekadash nga

Lobimi i shtrenjtë i Partisë Demokratike prej rreth 6 milionë eurosh ka shkaktuar një debat të fortë në mes të fushatës elektorale. Prej dekadash partitë politike shqiptare lobojnë në SHBA dhe këto procese lobimi nuk kanë kaluar pa skandale.

Një ditë më parë doli kontrata që ka lidhur Partia Demokratike me një kompani amerikane, të zotëruar nga njerëz afër Presidentit Donald Trump. Qëllimi i kontratës është krijimi i marrëdhënieve me aktorët kryesorë në qeverinë dhe kongresin e SHBA-së për të lehtësuar zhvillimin e politikave, mbështetje për të promovuar demokracinë, nismat kundër korrupsionit dhe reformat qeveritare në përputhje me marrëdhëniet SHBA-Shqipëri.

6 milionë dollarë nuk është vlera e vërtetë e kontratës së PD-së. Deri më tani, vlera e kontratës është 750 mijë dollarë. Është një kontratë afatgjatë, që do të funksionojë me pagesë vetëm për muajt që do të ketë lobim në SHBA për llogari të PD-së.

Pra, kontrata në total është 6 milionë euro, por mund të përfundojë në vlera prej 750 mijë, 1.5 milionë, 4 apo 6 milionë euro. Bëhet fjalë për një kontratë lobimi të hapur që paguhet në bazë të kohës dhe shërbimit që merr PD për gjithçka që kompania lobuese bën në SHBA për interes të opozitës, apo nëse nesër do të vijë në pushtet.

Duke qenë se publikimi i kontratës erdhi në mes të fushatës elektorale, kjo çështje u përdor menjëherë nga pala kundërshtare. Nga një takim elektoral në Vlorë, kryeministri Edi Rama deklaroi se kontrata ka për qëllim heqjen e “non grata”-s për Berishën. Duke ngritur pikëpyetje se ku u gjetën paratë, Rama tha se qëllimi është interesi personal i Berishës. Nga ana tjetër, PD deklaroi se kontrata është konform ligjit, ndërsa SPAK nisi menjëherë verifikimet.

Por siç e theksuam edhe më sipër, kjo nuk është kontrata e vetme e nënshkruar në historinë e politikës shqiptare. Më poshtë do t'ju sjellim disa nga rastet.

LOBIMET E RAMËS

Një shqiptaro-amerikan nga Nju Xhersi, Bilal Shehu deklaroi në shtator të 2012 se mori një transfertë bankare prej 80 mijë dollarësh “nga një burim i huaj” me dijeni të plotë se këto para duhej të përdoreshin për të paguar pjesëmarrjen në një aktivitet për mbledhje fondesh për fushatën e Obamës. 

Në tetor të po atij viti, Edi Rama u fotografua me Presidentin Obama dhe është pikërisht kjo foto që u propagandua në atë kohë si një marrëdhënie e mirë me kreun e Shtëpisë së Bardhë gjatë zgjedhjeve parlamentare në vendin tonë, që e sollën Ramën në pushtet. Rama nuk i pranoi akuzat në lidhje më këtë lobim, ndërsa opozita kërkoi vazhdimisht marrjen nën hetim të Ramës për lobim. Bilal Shehu, së bashku me një shtetas amerikan për përdorimin e fondeve të huaja në zgjedhjet amerikane. Burimi i atyre parave nuk u hetua në Shqipëri.

LOBIMET NË SHBA/ Milionat e eurove që paguhen prej dekadash nga

Ky nuk ishte lobimi i vetëm i Edi Ramës. Vetëm në vitin 2017, PS pagoi 240 mijë dollarë për kompaninë lobuese Ballard Partners. Kompania njihej për lidhjet me presidentin amerikan, Donald Trump dhe si një ndër mbledhësit kryesorë të fondeve për fushatën presidenciale të Trump në shtetin e Floridës.

LOBIMI I BASHËS

Në listën e skandaleve të lobimit nuk kishte si të mungonte Lulzim Basha. Në kulmin e fushatës së zgjedhjeve në 2017, kreu i opozitës, Lulzim Basha, udhëtoi në SHBA dhe nxori një foto me Presidentin Amerikan Donald Trump. Pas kësaj fotoje dyshohet se fshihej çmimi i kripur prej rreth 1 milion dollarësh.

Skandali u thellua për shkak se transferta e parave u bë nga një kompani me lidhje ruse. Pagesat për kompaninë e lobimit për lobuesin Nick Muzin u bënë nëpërmjet dy kontratave të lidhura në fund të marsit nga Partia Demokratike dhe një kompani guackë e regjistruar në Skoci me emrin “Biniatta Trade LP”. Çështja u pushua dhe burimi i parave nuk u gjet kurrë, por u thanë 7 versione.

LOBIMET NË SHBA/ Milionat e eurove që paguhen prej dekadash nga

LOBIMI I ILIR METËS

Kreu i PL-së, Ilir Meta, i cili ndodhet në burg, akuzohet ndër të tjera edhe për lobim në SHBA. LSI për vitin 2016-2017 ka kryer pagesa të padeklaruara në shumën 369.785 USD për të kryer pagesat për shërbimet e ofruara nga kompania lobuese GSIS LLC. Burimi i fondeve që kanë financuar kontratat e lobimit dhe konsulencës së partisë LSI, nuk është deklaruar sipas ligjit.

Shpenzime të jashtëzakonshme dhe në miliona dollarë kanë paguar politikanët shqiptarë për lobim të Shtetet e Bashkuara të Amerikës përgjatë dekadave të fundit. Pothuaj në të gjitha rastet, nga kontratat e publikuara nga autoritetet amerikane, ka dyshime të forta për pagesa me para të pista.

Politika shqiptare ka shumë probleme me korrupsionin dhe transparencën, por problemi bazë që sjellin është mënyra e financimit të partive politike. Gjatë fushatave zgjedhore, lobimet rriten dhe bashkë me to pikëpyetjet, se paratë që mbulojnë këto kosto, vijnë nga burime të dyshimta./ CNA





Lajmet e fundit nga