web counter
LEXO PA REKLAMA!

SHKARKO APP

App Store
Google Play

“Trekëndëshi i Bermudës” kundër SPAK-ut

5 Mars 2025, 13:24, Editorial CNA

“Trekëndëshi i Bermudës” kundër SPAK-ut

“Trekëndëshi i Bermudës”, si njësi gjeografike e mistershme, në politikë zbërthehet në shumë terma. Një prej tyre, është më klasikja, lidhja krim-politikë-media.

Dhe në rastin e SPAK-ut po ndodh ky fenomen. Ka një lidhje të fortë të krimit me politikën dhe mediat.

SPAK ka zbardhur me dhjetëra dosje nga “Sky” dhe “Encrochat”, por dhe të tjera në lidhje me krimet elektorale të bëra nga bandat e përdorura nga politika.

Nga njëra anë media është një instrument që e ka përdorur krimi për të mos thënë shumëpërdorur, por nga ana tjetër dhe politika, për interesat e saj korruptive dhe klienteliste, përfitues koncesionesh, sponsorë pagatorë, të cilët ushtrojnë influencën e tyre në media për qëllime të caktuara kriminale.

 

Ajo që po ndodh me SPAK-un në këto momente është pikërisht kjo.

Krimi, politika dhe media janë bërë bashkë për të goditur këtë institucion në mënyrë të vazhdueshme. Deri dje ka pasur më pak zëra sepse njëra palë siç është ajo e mazhorancës e mbronte institucionin në momentin që goditeshin Ilir Meta, Sali Berisha apo zyrtarët e opozitës.

Tani është "çmendur" dhe mazhoranca. Ka filluar sulmin përballë SPAK-ut, për gjoja padrejtësi për të ndjekur në gjendje të lirë një hajdut me dy vepra të rënda penale që rrezikon deri në 15 vite burg.

Një herë deklarojnë se e kanë SPAK-un një fishkëllimë, dikush thotë se do ta shkrijë, dikush tjetër thotë se s’do ta shkrijë e kështu me radhë.

Nga ana tjetër media vërsulet në sulm. Në ditët e fundit është përdorur një përgjim ambiental me urdhër të prokurorit Klodian Braho si sulm ndaj SPAK-ut.

Një përgjim me vendim të rregullt ligjor askush nuk e konteston dot, dhe bëhet pikërisht zhurmë për të goditur SPAK-un. Ashtu sikundër është sulmuar për Erion Veliajn, ashtu sikundër është sulmuar për grupe të caktuara kriminale, ashtu sikundër është sulmuar nga mediat për interesat e saj.

Kujtojmë rastin e “Top Channel” apo “Report TV” pagesat nga inceneratorët dhe avokatia publike e frikshme që iu bë inceneratorit që nuk ekziston në Tiranë, por dhe sulmet që iu bënë prokurorëve të caktuar.

Ndaj këtu jemi përballë faktit që krimi, politika dhe media janë bashkë në një rrugë interesi që i përplas me SPAK-un.

I përplas sepse media ka interesat për të marrë paratë e inceneratorëve, politika kërkon që djemtë e saj të ndiqen të lirë, krimi kërkon që bandat të dëmtojnë dhe të trembin apo godasin integritetin e prokurorëve dhe gjyqtarëve e kështu me radhë.

Ndaj jemi përballë “trekëndëshit të Bermudës”: krim-politikë-media apo media-politikë-krim apo politikë-krim-media që tregon se janë e njëjta formë që në finale së bashku sjellin mbytjen e Shqipërisë, zhdukjen e saj, çmontimin e saj.

Kanë sjellë gjithçka ka kaluar Shqipëria në këto 34 vite tranzicion të lodhshëm dhe të pandalshëm./ CNA





Lajmet e fundit nga