“Ilaçi i hepatitit është në mungesë”, QSUT nuk ka ilaç/ Në treg 21 milionë lekë

12 Shkurt 2026, 21:22, Denoncim CNA

“Ilaçi i hepatitit është në mungesë”,

Ziflo Gjonca denoncon në emisionin “Stop” mungesën e antiviralit për Hepatitin C, konkretisht ilaçin “Epclusa”, që është në listën e barnave të rimbursueshme.

Ai thotë se nëna e tij vuan nga kjo sëmundje dhe po përballet me vështirësi serioze për sigurimin e trajtimit. Sipas tij, pamundësia për ta gjetur ilaçin me rimbursim, po e rëndon gjendjen shëndetësore të saj, ndërsa blerja në mënyrë private është e papërballueshme financiarisht.

“Kam nënën sëmurë me Hepatit C, e kemi kapur në fillim të nëntorit 2025. U shtrua një javë në spital dhe më pas e nxorën që të bënte disa ekzaminime të tjera. Kemi ardhur dy herë në Tiranë te Qendra e Konsultave dhe analizat kanë dalë shumë keq. Kemi shkuar përsëri te Qendra e Konsultave dhe mjeku më tha që gjendja është e rëndë dhe duhet të nisë urgjentisht antiviralin. E pyeta se ku mund të gjej dhe më tha që kushton, e siguron shteti, por nuk ka gjendje. Më tha që mund ta gjesh vetëm në mënyrë private. Kam pyetur një njeriun tim në Itali dhe më tha që kushton 28 mijë euro deri në 80 mijë euro. Ne nuk i kemi mundësit. Nuk më dhanë datë, më thanë vetëm që vonon, nuk dihet. Është urgjente sepse nëse nuk e merr nëna kalon në kancer të mëlçisë dhe vdes njeriu. Nëna tani ka këpute, nuk qëndron dot në këmbë, është dyllë e verdhë dhe nuk ka oreks. Nëse ka ilaç ta marrë, se më dhimbset shpirti që nëna ime të vdesë për një ilaç. Që ta marr rrugë për ta blerë 28 mijë euro, nuk e blej dot”, tha denoncuesi.

“Stop” u interesua pranë Qendrës Spitalore Universitare, ku një mjeke konfirmoi mungesën e ilaçit, duke deklaruar, se kompanitë farmaceutike aktualisht nuk po e furnizojnë tregun. Sipas saj, për momentin asnjë nga kompanitë nuk e ka futur këtë medikament.

Qytetari – Për Epclusën bëhet fjalë!

Mjekja – Po pra, po nuk ka! Nuk ka!

Qytetari – S’ka?

Mjekja – Jo! Kam fol dhe me kompanitë, nuk ka. Për momentin, as njëra, as tjetra s’kanë futur ilaçe.

Qytetari – Ne pamë çikë kshu në treg dhe ishte shumë e shtrenjtë.

Mjekja – Sa ishte në treg?

Qytetari – 25 mijë euro deri në 80-të vinte.

Mjekja – Jo mo vlla, është me 3 milionë. Mund të gjendet me 3 milionë.

Qytetari – Ku?

Mjekja – Është një kompani!

Qytetari – Lexoje këtë! Është nga spitali i Sarandës. E ke atë.

Mjekja – Nuk ka për momentin. Kam fol me kompanitë, nuk e kanë futur akoma, as njëra, as tjetra.

Qytetari – Po kur mund të vijnë? Apo s’e ke idenë?

Mjekja – S’di, të të them gjë. S’di të të them. Ca thonë, që nga fundi i shkurtit. Unë sot i bëj Fondit e-mail, që i them, që unë nuk kam asnjë, nga të dy kompanitë s’ka sjellë asnjë në farmaci me rimbursim.

Në farmacitë private, trajtimi i plotë me 3 kuti Epclusa, kushton rreth 21 milionë lekë të vjetra. Farmacistët shpjegojnë, se për shkak të vlerës së lartë, zakonisht ky medikament merret përmes skemës së rimbursimit.

Qytetari – Antiviralin “Epclusa”! Shikoje njëherë, sa lekë është, ke, a s’ke!

Farmacia – Zakonisht, për antivirale të këtij lloji, merret shefi im. Tani fola me doktorin, që punojmë këtu edhe më tha, që meqë ti e do vetëm çmimin, domethënë je i interesuar për “epclusën”, që është në listën e barnave të rimbursuara dhe mund ta gjesh në…

Qytetari – Nuk kanë moj, nuk kanë në spital. Prandaj po vij, po interesohem këtu.

Farmacia – Për 3 kuti vlera në total është kaq!

Qytetari – 2 milionë, apo 21 milionë?

Farmacia – 21!

Qytetari – 21 milionë?

Farmacia – Për 3 kuti, për trajtimin e plotë me “epclusa”. Jo, jo, ne nuk është se e kemi vetëm ne. Ne furnizojmë me këtë. Më kupton? Ti mund ta gjesh ndoshta edhe në vende të tjera. Nuk është ideja aty, por prej vlerës së lartë, që ka, e marrin vetëm të rimbursuar.

Qytetari – 21 milionë e 134?

Farmacia – Po!

Qytetari – Pu, pu, pu!

Farmacia – Kape foto këtu!

Qytetari – Kjo është origjinali? Jo…!

Farmacia – Kjo është origjinali, jo derivati. Derivati është çështje tjetër. Është më pak në kosto, por që më mirë hajde ndoshta, kur të jetë vetë doktori këtu!

Ndërkohë, Fondi i Sigurimit të Detyrueshëm të Kujdesit Shëndetësor deklaron se ilaçi nuk është në mungesë./ Tv Klan