Abuzim me çmimet e ilaçeve/ KLSH: Çmimi i rimbursimit, disa herë më i lartë se ai i miratuar zyrtarisht

7 Shkurt 2026, 13:18, Denoncim CNA

Abuzim me çmimet e ilaçeve/ KLSH: Çmimi i rimbursimit, disa

Kontrolli i Lartë i Shtetit në një raport për Fondin e Sigurimit të Detyrueshëm të Kujdesit Shëndetësor ka evidentuar aplikimin e çmimeve për disa barna, shumë herë më të larta se ai i miratuar zyrtarisht.

Sipas KLSH-së, konkretisht barnat Mestinon dhe Dintoina janë përfshirë në listë pa pasur çmim CIF të miratuar dhe pa deklarim të këtij çmimi në 12 muajt e fundit. Megjithëse të importuara me leje të veçantë, është aplikuar një çmim rimbursimi disa herë më i lartë se ai i miratuar zyrtarisht, në kundërshtim me kriteret ligjore në fuqi. Kjo ngre dyshime të forta për abuzim, korrupsion apo vjedhje.

“Nga auditimi i Listës së Barnave të Rimbursueshme u konstatua se dy barna, përkatësisht Mestinon dhe Dintoina, janë përfshirë në Listën e Barnave të Rimbursueshme për vitin 2024, ndonëse nuk kanë pasur çmim CIF të miratuar për vitin përkatës dhe mungonte deklarimi i këtij çmimi në 12 muajt e fundit. Të dyja barnat janë importuar me leje të veçantë dhe për to është aplikuar një çmim rimbursimi disa herë më i lartë se çmimi i miratuar zyrtarisht. Përfshirja në listë dhe rimbursimi i barnave në fjalë me çmime të aplikuara më të larta se ato të miratuara nga Komisioni i Çmimit të Barnave përbën devijim nga kriteret e parashikuara në pikat 11 dhe 15 të VKM-së nr. 645, datë 1.10.2014 “Për ngritjen dhe mënyrën e funksionimit të Komisionit të Çmimit të Barnave” e ndryshuar dhe krijon precedent për shmangie nga procedurat ligjore të miratimit dhe kontrollit të çmimeve”, thuhet në raport.

Sipas KLSH-së, buxheti i rimbursimit është ngarkuar me një kosto shtesë prej mbi 3.5 milionë lekësh, duke rritur rrezikun e keqadministrimit të fondeve publike dhe duke cenuar transparencën dhe trajtimin e barabartë të operatorëve farmaceutikë. Në fakt, më shumë se kaq kjo duket një vjedhje e koordinuar e fondeve publike që ka nevojë për hetim konkret nga organet kompetente.

“Efekti financiar i diferencës ndërmjet çmimeve të miratuara dhe atyre të aplikuara për barnat Mestinon dhe Dintoina ka rezultuar në një kosto shtesë për buxhetin e rimbursimit në shumën totale prej 3,558,352 lekë. Kjo situatë evidenton dobësi në verifikimin dhe miratimin e çmimeve gjatë përgatitjes së LBR-së, duke rritur rrezikun e keqadministrimit të fondeve publike, duke cenuar transparencën dhe parimin e trajtimit të barabartë të operatorëve farmaceutikë”, shtohet më tej.

Auditimi rekomandon që Ministria e Shëndetësisë dhe Fondi i Sigurimit të Detyrueshëm të Kujdesit Shëndetësor të garantojnë përfshirjen e barnave në listë vetëm pas miratimit të çmimit CIF dhe në përputhje me afatet ligjore, për të mbrojtur fondet publike dhe për të mos krijuar hapësira për abuzime që duket të jenë përtej kësaj fjale.

“MSHMS dhe FSDKSH të garantojnë që përfshirja e barnave në LBR të bëhet vetëm pas miratimit të çmimit CIF dhe në përputhje me afatet ligjore. Të shmanget rimbursimi me çmime të pambështetura me dokumentacion, për të mbrojtur fondet publike dhe siguruar trajtim të barabartë për të gjitha kompanitë farmaceutike”, theksohet në raportin e KLSH-së.

Në ditët e mëparshme, CNA ka publikuar disa pjesë nga ky raport i KLSH-së, që ka evidentuar probleme serioze që prekin drejtpërdrejt jetën e pacientëve që përdorin barna antitumorale, duke rrezikuar cilësinë dhe sigurinë e trajtimit mjekësor në vend.

Barnat antitumorale pa kontroll laboratorik/ KLSH: Mungojnë analizat në AKBPM, rrezik për sigurinë e pacientëve
6 Shkurt, 14:59

Një situatë shqetësuese ishte ajo në Laboratorin e Kontrollit pranë Agjencisë Kombëtare të Barnave dhe Pajisjeve Mjekësore, ku gjatë viteve 2021, 2023 dhe 2024 nuk është kryer asnjë analizë laboratorike mbi barnat për trajtimin e sëmundjeve tumorale, ndërsa gjatë periudhës janar-mars 2025 është kryer vetëm një analizë laboratorike. /CNA