web counter
LEXO PA REKLAMA!

SHKARKO APP

App Store
Google Play

Si gënjen Mero Baze për avokatin e Veliajt

2 Shkurt 2026, 11:46, Denoncim CNA

Si gënjen Mero Baze për avokatin e Veliajt

Kryebashkiaku i arrestuar i Tiranës, mbi të cilin rëndojnë 13 akuza të parashtruara në një dosje voluminoze prej 60 mijë faqesh të dërguara në gjykatë, Erion Veliaj, depozitoi një kërkesë për zëvendësimin e masës së sigurisë.

Kjo kërkesë u shqyrtua një ditë më parë në një seancë gjyqësore nga gjyqtarja Etleva Deda, e cila vendosi rrëzimin e kërkesë së Veliajt.

Pas rrëzimit të kërkesës, gazetari i familjes së Veliajt, ushtari i tij mediatik, që dirigjohet nga skutat e burgut të Durrësit, në gazetën e tij “Tema”, ka publikuar një shkrim ku na thotë se Veliaj është paraqitur pa avokat të zgjedhur, duke u mbrojtur personalisht.

“Në seancën e sotme për masën e sigurisë, Erion Veliaj është paraqitur pa avokat të zgjedhur, duke u mbrojtur personalisht në kërkesën për zëvendësimin e masës ‘arrest në burg’”.

Kjo, në fakt, është një gënjeshtër e radhës nga media e gazetarit të familjes Veliaj. Erion Veliaj në seancën për zëvendësimin e masës së sigurisë është mbrojtur nga avokati Sokrat Gjermeni.

Sokrat Gjermeni është djali i Artan Gjermenit, avokat mbrojtës i Veliajt, pra i studios së tij ligjore. Kështu, si rrjedhojë, Veliaj nuk është përfaqësuar pa avokat kryesisht, por nga një avokat që vjen nga e njëjta studio ligjore që e mbron, duke theksuar se Sokrat Gjermeni e ka përfaqësuar Veliajn vetëm në rastin e zëvendësimit të masës së sigurisë.

Si gjithmonë, Veliaj ndryshe shprehet e ndryshe vepron, por gjithnjë me taktika e strategji, megjithëse nuk po i funksionojnë, pasi me vendimin e djeshëm do të mbetet në burg.

Skenarët e tij, ashtu si edhe në herët e tjera, i mbështesin edhe mediat e tij, që paguhen nga ai dhe dalin në raportet ku tregohet lobimi i Veliajt dhe vëllait të tij, Arbër Veliaj, prej 220 mijë dollarësh, si Mero Baze, i cili vijon që për llogari të Veliajt të sulmojë drejtësinë, në këtë rast vendimin e gjyqtares Etleva Deda.

Erion Veliaj, njeriu që kërkon zëvendësimin e masës së sigurisë, është i njëjti, i cili vazhdon që me taktikat e tij si mashtrues kronik të shtyjë seancat në GJKKO, ku është dërguar për gjykim dosja me 13 akuza për 5 vepra të rënda penale.

Pse Erion Veliaj kërkon zëvendësimin e masës së sigurisë?

Në të vërtetë, për Veliajn nuk kanë ndryshuar rrethanat apo situata e tij ligjore. Nuk ka fakte apo prova të reja për ta liruar nga burgu. Ai është lënë në burg nga të gjitha nivelet e gjykatave, sepse jashtë në detyrën e kryebashkiakut prishte provat.

Sot jemi në situatën ku prej 14 seancave në GJKKO, sot zhvillohet e 15-ta, Erion Veliaj vijon të përdorë makinacione dhe teknikalitete për të shtyrë proceset gjyqësore, pasi ka frikë të përballet me faktet dhe provat e paraqitura nga prokurorët, ndërkohë nga burgu i Durrësit vijon dhe krijon skenarë duke sulmuar, akuzuar dhe shpifur për prokurorët dhe gjyqtarët, skenarë të cilët CNA ia ka zbuluar, si nga përgjimet, ashtu edhe dokumente të tjera./ CNA





Lajmet e fundit nga