web counter
LEXO PA REKLAMA!

SHKARKO APP

App Store
Google Play

E fundit!

x

Heshtja kriminale e Bashkisë së Tiranës

27 Qershor 2026, 14:23, Denoncim CNA

Katër muaj më parë, më datë 11 mars, CNA iu drejtua me një shkresë zyrtare Bashkisë së Tiranës, ku kërkonim informacion në lidhje me sipërfaqet e reklamave të vendosura në eventet që zhvillohen nga Bashkia e Tiranës.

Heshtja kriminale e Bashkisë së Tiranës

Pra, e thënë thjesht kërkuam informacion se sa reklama, banera, LED-wall-e janë vendosur në evente të ndryshme, në sheshin “Skënderbej”, sheshin “Nënë Tereza”, por dhe për vende të tjera ku janë zhvilluar aktivitete të ndryshme.

Me kërkesa zyrtare duke ju referuar Kushtetutës dhe ligjit kërkuam sipërfaqet e përdorura për reklamime, kontratat që ka bërë Bashkia e Tiranës me kompaninë që do të bëjë menaxhimin e aktivitetit.

Përveç kontratave apo sipërfaqeve, kërkuam informacion për të dhënat dhe të ardhurat e gjeneruara, pra që ka përfituar Bashkia e Tiranës, pra të ardhurat që kanë përfituar qytetarët e Tiranës nga zhvillimi i këtyre aktiviteteve, sepse bashkia ka qenë dhe sponsore, por edhe përfituese.

Për këtë çështje kemi dërguar disa shkresa si Bashkisë së Tiranës po ashtu dhe Komisionerit për Të Drejtën e Informimit dhe Mbrojtjen e Të Dhënave Personale, po ashtu kemi shkruar dhe publikisht për këtë çështje. Kemi zero përgjigje vetëm lojëra fjalësh.

Bashkia e Tiranës në vend që të bëjë transparencën dhe të japë përgjigje për një kërkesë që nuk i intereson vetëm medias, hesht duke fshehur atë që vetëm zyrtarët e bashkisë e dinë.

Informacioni i kërkuar ka interes për publikun, për taksapaguesit, që duan të dinë se çfarë ndodh me të ardhurat që bashkia mbledh dhe supozohet se duhet t’i mirëmenaxhojë apo t'i shtojë.

Cila është arsyeja që Bashkia e Tiranës i fsheh të dhënat që i kërkon CNA?

Mos vallë kontratat për dhënien me qira të sipërfaqeve të reklamimit në aktivitete të ndryshme, të zhvilluara nga Bashkia e Tiranës, në letra janë shumë herë më të vogla sesa në realitet? Mos vallë kalojnë nga kompanitë e marketingut të lidhura direkt dhe indirekt me vëllanë e kryebashkiakut të Tiranës, Erion Veliaj?

Në fakt, fshehja e këtyre të dhënave nga Bashkia e Tiranës bën bashkëpunëtorë të gjithë zyrtarët e bashkisë që nuk përgjigjen, por me mënyra të ndryshme shmangin kërkesat dhe nuk bëjnë transparencë.

Në përgjigjen e vetme të dërguar nga Bashkia e Tiranës na kanë dërguar shembull një kontratë boshe, duke treguar mënyrën se si aplikohet.

Me aktin e moskthimit të përgjigjes, zyrtarët po shpërdorojnë detyrën, të cilët edhe pse kryetari i tyre është në burg, edhe pse drejtorë apo zyrtarë të këtij institucioni janë nën hetim, ende guxojnë të fshehin informacionet.

Kjo përbën një tjetër skandal në të cilin përfshihet Bashkia e Tiranës, duke mos u përgjigjur kërkesave për transparencë mbi atë që mund të jetë një aferë e radhës./ CNA





Lajmet e fundit nga